OSEAS 4 - Qullan Arunaka DC

III. ISRAEL MARKAN JUCHANAKAPAMPI, MUTUYÄWINAKAPAMPI(4.1—13.16)Tatitux Israel markampix ch'axwaruw manti

1Israel jaqinaka,

Tatitun arunakap ist'apxam.

Jupax jichhax aka markan jakirinakampiw ch'axwar manti,

jupanak pura jan sum sarnaqapxatapata,

jan chiqa chuymanïpxatapata,

Tatitur jan uñt'apxatapata.

2Ukampis k'ari juramentompi,

k'arisiñampikiw utjaski,

jaqi jiwayañampi, lunthatasiñampi,

wachuq jucha lurañampi, nuwasiñampi;

jaqinak pura jiwarayasiñampi.

3Ukat aka markax jacht'asis sarnaqaski;

aka markan jakirinakasti jan ch'amanikïxapxiwa;

pampankir animalanakasa, jamach'inakasa,

jach'a qutankir chawllanakas jiwarxapxarakiwa.

Tatitux sacerdotenakaruw juchañchi

4Tatitux siwa:

“¡Jan khitis maynirux juchañchkpati,

janirak tuqkpasa!

Sacerdote, jumampi ch'axwañaxaw utji.

5Jumax urpachaw aynacht'äta,

arumarusti,

jumamp chikaw profetax aynacht'ani;

taykamarus t'unjarakïwa.

6Markaxasti janiw amuyunïkxiti,

ukat t'unjat uñjasi.

Jumasti, sacerdote, yatiñsa apanuktawa,

ukat jichhax nayax jumar apanukuraksma.

Niyakixay jumax Tatitun yatichäwinakapsa armanukstaxa,

nayax wawanakamat armasirakïwa.

7“Sacerdotenakan waljanïpxatapatsti,

juk'ampikiw naya tuqix jucha lurapxi;

ukat nayax jach'añchäwipsa p'inqar tukuyä.

8Markaxax jucha luratanakapat luqtañatak apanipki ukanak manq'apxi;

ukat jupanakax jaqinakaxan jucha lurapxañap juk'ampi munapxi.

9Aka markarux jan wali sarnaqäwinakapatxa,

sacerdotenakarjamaw mutuyarakï.

10Niyakixay Tatitur yupaychañ apanukupxchixa,

manq'asipkanisa, janiw sist'asipkaniti,

yaqhanakampis wawanïñatak sarnaqasipkaniwa,

ukampis janiw wawanïpkaniti.Israel markax jaqin lurat diosanakaruw yupaychi

11“Wachuqa juchanakan sarnaqañampi,

vino machañanakampixa,

jaqirux jan amuyun tukuyi.

12Markaxax k'ullut khitsut diosanakaparuw jiskt'asi,

thujrunak tuqirakiw yatiñanaksa thaqhi.

Wachuqa juchampi apnaqataxa,

markaxax pantjat thakhinakan sarnaqaski;

Diosap apanukusaw yaqhanakampi juchanakan sarnaqi.

13Uka alay qullunakan

incienso q'aphinakampi luqtäwinak churasi;

roble, álamo, encina sat

quqanakan ch'iwinakapan luqtasiraki.

Phuchhanakamax wachuqa jucha lurapxi,

yuxch'anakamas yaqha chachanakampiw sarnaqapxi.

14Ukampis janiw phuchhanakamarusa,

yuxch'anakamarus

wachuqa juchanak luratanakapat mutuykäti,

jumanakpachaw jan wali warminakampix wachuqa juchanak lurapxtaxa;

wilañchanak luqtañatakis jan wali warminakampiw mayachasipxtaxa,

uka warminakan ukham luratanakapax

diosanakapar yupaychäwïkaspas ukhamawa.

¡Ukatpï mä markax jan amuyt'asitapat aynacht'awayixa!

15“Israel marka,

jumax wachuqa jucha lurañan sarnaqtaxa,

Judá markakisay uka juchxa jan lurkpati.

¡Jan jumanakax Guilgal chiqarux sarapxamti,

janirak Bet-avén qullurus makhatapxamti,

Tatit laykus janipun juramento lurapxamti!

16Israelitanakax

uri vaca qallur uñtataw nayat jayarst'itu;

ukhamasti, ¿Tatitux suma chhuxllanakaru,

oveja qallunakäpkaspas ukham awatiskakispati?

17-18Israelitanakax yaqha diosanakar yupaychañaruw katuyasxi.

¡Taqiniw machantat jaqinakäpkaspas ukham liwirtawayapxi!

Mayampi mayampwa wachuqa jucha lurapxi,

suma jach'añchäwit sipansa p'inqachatäñak munapxi.

19Yaqha diosanakar yupaychapxatapatsti,

p'inqachjatäpxaniwa,

jan mayan tukjatäpxaniwa.