JUECES 4 - Qullan Arunaka DC

4. Débora warmimpi, Barac chachampi(4—5)Débora warmimpi, Barac chachampix Sísara chacharuw atipjapxi

1Ehud chachan jiwxatapatsti, israelitanakax Tatit nayraqatan wasitat jan walinak lurapxäna,

2ukat Tatitux cananeo jaqinakan Jabín reyipan amparapar katuyäna, uka reyix Hasor markan apnaqaskäna. Ejercitopan jilïripasti Sísara satänwa, jupasti Haróset-goím chiqan jakäna.

3Jabín reyix hierrot lurat llätunk pataka carronakanïnwa, israelitanakarux pä tunka maraw walpun t'aqhisiyäna, ukhamïpan israelitanakax yanapt'ayasiñatak Tatitur art'asxapxäna.

4Khä urunakasti Débora sat profetisa warmiw Israel markan jilïripäna, jupasti Lapidot chachan warmipänwa.

5Débora warmix palmera quqa kayunpin qunt'asirïna, uka quqax “Deboran palmerapa” sat sutimpi uñt'atänwa, uka quqasti Efraín ayllunkir qullunakan utjäna, Ramá, Betel chiqanak taypina. Israelitanakax ch'axwanakap askichayasiñatakix jupan ukaruw sarapxirïna.

6Mä urusti, Débora warmix Barac sat chachar jawsiriw khithäna, jupasti Abinóam chachan yuqapänwa, Neftalí ayllunkir Quedes markan jakarakïna, juparusti sänwa:

—Israelan Tatitu Diosapax, akham sistamwa: “Tabor sat qullur saram, ukansti Neftalí, Zabulón ayllunkirinakat tunka waranqa chachanak tantacht'am.

7Nayaw Jabín reyin ejercitopan Sísara sat jilïriparux Quisón sat jawir thiyaru jutayä, carronakapampi, soldadonakapampi jumar katuntañataki. Ukampis nayaw jupanakarux amparamar katuyäma” —sasa.

8Barac chachasti sarakïnwa:

—Jumatix nayamp chika sarätaxa, nayax saräwa, janitix jumax sarkätaxa, janiw sarkäti —sasa.

9Débora warmisti sänwa:

—Ukhamasti nayax jumamp chikaw sarä, ukampis aka nuwasiñan atipjkäta ukax janiw juman jach'achasiñamatakïkaniti, Tatitux mä warmin amparaparuw Sísara chacha katuyani —sasa.

Ukatsti Débora warmix Barac chachampiw Quedes chiqar saräna.

10Ukansti Barac chachax Zabulón, Neftalí ayllunkirinakaruw jawsäna, ukatsti tunka waranqa chachanakani ejército nayräxap sarantäna. Débora warmisti jupamp chikaw saräna.

11Quedes sat chiqa jak'anxa, Saanaim sat encina thiyan Héber sat quenita jaqix utap lurasïna, jupasti mayni quenitanakat jayaruw saraqxatayna, jupanakax Hobab sata, Moisesan awkch'ipat saraqirïpxarakïnwa.

12Sísara chachax, Barac chachan Tabor qullur makhatatap yatisinxa,

13hierrot lurat llätunk patak carronakapa, taqpach soldadonakap tantacht'äna, ukatsti jupanakampix Haróset-goím chiqat mistusin Quisón jawir thiyakamaw sarantäna.

14Ukapachaw Débora warmix Barac chachar säna:

—¡Nayraqatar sarantaskakim, jichhüruw Tatitux Sísara chacharu amparamar katuyätam! ¡Tatitux niyaw soldadonakam nayräxap sarantaski! —sasa.

Barac chachasti Tabor qullut tunka waranqa soldadonakampiw saraqtanïna,

15kunapachatix Barac chachampi soldadonakapampix nuwantapkän ukhhasti, Tatitux Sísara chachan carronakap taypina, soldadonakap taypin jan walt'asiñ utjayäna; Sísara pachpaw axsarañat carropat saraqawayasinxa, kayukiw jaltxäna.

16Ukchañkamasti, Barac chachax soldadonakampiru, carronakampirux Haróset-goím chiqakamaw arktaskakïna. Uka urusti Sísara chachan ejercitopat janiw mä soldados qhispkänti, taqiniw jiwarapxäna.

17Sísara chachasti kayukiw Jael warmin chhujllapar jaltxäna, jupax Héber quenita chachan warmipänwa, ukapachax Hasor markan Jabín reyipampi, Héber quenita jaqin utapankirinakapampix sumankañaw utjäna,

18Jael warmisti katuqir mistunisin Sísara chacharuw säna:

—Tata, aksar mantasinkakim, jan axsaramti —sasa.

Sisarasti iyawsasaw chhujllar mantäna, ukatsti Jael warmix mä isimpi janxatasin imantäna;

19Sisarasti umat wali pharjataxa uma mayïna. Jael warmisti mäkiw leche churäna kawkharutix imaskäna uka lip'ichi wayaq lluphaqasina, umt'xipansti, wasitat Sisarar imantäna.

20Sisarasti juparux sänwa:

—Chhujlla punkur sayt'asim, khitirak jutasina jiskt'iristam: ‘Aka manqhan khitis utji’ sasa, jumax sätawa: ‘Janiw khitis akan utjkiti’ —sasa.

21Ukampis Sisarax wali qaritätapat laykux ikjawayxäna. Ukham uñjasinsti, Jael warmix mä martillompi, chhujlla utap katxäsir ch'akurumpi aptasinxa, kawkhantix Sisarax ikiskäna ukkharuw k'achat jak'achasïna, ukatsti uka ch'akurumpiw p'iqipat liq'intäna uraqkam puriyasa. Ukhamaw Sisarax jiwäna.

22Kunapachatix Barac chachax Sisarar thaqhasa purinkän ukkhasti, Jael warmix jupar katuqiriw mistüna, ukatsti sänwa:

—Jutam, khitirutix thaqkta ukaruw uñacht'ayäma —sasa.

Barac chachasti chhujlla manqhir mantasin Sisararux uraqin jiwata, p'iqipat mä ch'akurumpi liq'intat uñjäna.

23Ukhamaw Tatitux khä urux cananeonakan Jabín reyiparux israelitanakan nayraqatapan jisk'ar tukuyäna.

24Uka qhipatsti israelitanakax urut urutjam Jabín reyirux juk'amp ch'amampi t'aqhisiyapxäna, q'al tukjañkama.