1Tatay, aynacht'atanakaxat amtasimaya;
ñanqhachapkitu uksa uñtanimaya.
2Uraqinakaxasa, markaxasa jichhax
yaqha jaqinakan amparapankxiwa.
3Jan awkini wajchaw qhiparapxta;
taykanakaxasti ijma warminakaw qhiparxapxi.
4¡Nanakan pachpa umaxwa jichhax alasipxta,
phayañ lawanakaxsa qullqimpiw alasipxta!
5Nanakan kunkaxarusti mä yuku ayxatapxitu;
qarjasipxtwa, janirakiw samart'ayapkitusa.
6Nanakar wali uñisirinakaxaruw
manq'añ mayiñax wakt'apxitu.
7Nayra awkinakaxaw juch lurapxäna,
ukampis nanakaruw ukanakat
Tatitux mutuyapxitu.
8Uywatanakampi apnaqataw uñjasipxta,
jupanakan amparapat janiw khiti qhispiyirisa utjkiti.
9T'ant'a jikxatañ munasasti,
wasaran niyapuniw jiwarapxta.
10Janchinakaxas ninjamaw nakhi,
manq'atjam inakiw paqaqxapxta.
11Jerusalén markansa, Judá markanakansa,
warminakasarux warmisiwäpxiwa.
12Jilïrinakasar axsartañax janiw utjkxiti;
jupanakarux amparanakapat warkkatapxi.
13Jila ch'amani jaqinakarux molinon irnaqayapxi,
waynanakasti, phayañ lawanak q'ipt'ataw liwisipxi.
14Marka punkunakansti
waynanakan jayllitapax janiw ist'askxiti,
janirakiw chuyman jaqinakas tantachaskxapxiti.
15Janiw kunat kusisiñas utjkxiti;
kusisiñat thuqt'añanakas llakisiñaruw tukxi.
16¡Kunakïkan jiwasatxa!
Jucha luratasat marka apnaqañsa q'al apt'astanxa.
17Ukatpï jichhax chuymasas usustuxa,
nayrasas chhurkt'añ munarakistuxa.
18Jerusalén markax laqayar tukuyatawa,
qamaqinakakiw ukan aywtaski.
19Jumasti Tatay,
wiñayatakiw apnaqätaxa.
¡Jumaw nanakan jach'a reyixätaxa!
20¿Kunatarak wiñayatak armapxitätasti?
¿Kunatarak walja maranak apanukupxitätasti?
21¡Tatay, juman ukar kuttayanxapxita,
nanakasti kuttanxapxäwa!
¡Kunjämtix nayrax jakapkäyät
ukhamay jakayxapxita!
22¡Ukampis jumax q'al apanukupxista;
juman phiñasiñamasti
nanakatakix sinti jach'apuniwa.
Who We AreWhat We EelieveWhat We Do
2025 by iamachristian.org,Inc All rights reserved.
