LEVÍTICO 15 - Qullan Arunaka DC

Chachanakan yaqhip q'añunakapat yatichäwinaka

1Tatitusti Moisesampiru, Aaronampiruw akham sarakïna:

2“Israelitanakarux akham sapxam: Kunapachatix mä chachax usutäkasin chhuxurasiñapat aliqak jathap aywiyxani ukkhax, uka jaqix q'añut uñt'atäxaniwa.

3Ukham usutäsin maynitix jathap aliqak aywiyatapata, jan ukax uka pachpa jathas chhuxurasiñap llupantatapatxa, uka jaqix q'añut uñt'atakipunïniwa.

4“Kawkharutix uka usut jaqix ikt'kani uka chiqasti q'añut uñt'atäxaniwa.

“Kawkharutix uka jaqix qunt'kani uka chiqas q'añut uñt'atäxarakiniwa.

5“Khititix uka jaqin ikiñap llamkt'kani ukasti, isip t'axsuqasxañapawa, jupa kipkas jariqasxañaparakiwa, ukampis jayp'ukamax q'añut uñt'atakïskaniwa.

6“Khititix uka usut jaqin qunuñapar qunt'kani ukasti, isip t'axsuqasxañapawa, jupa kipkas jariqasxañaparakiwa, ukampis jayp'ukamax q'añut uñt'atakïskaniwa.

7“Khititix uka usut jaqir llamkt'kani ukasti, isip t'axsuqasxañapäniwa, jupa kipkas jariqasxañapawa, ukampis jayp'thapiñapkamax q'añut uñt'atakipunïskaniwa.

8“Jathap aywiyir usut jaqitix mayni q'uma jaqir thuskatani ukasti, uka jaqix isip t'axsuqasxañapawa, jupa kipkas jariqasxañaparakiwa, ukampis jayp'thapiñapkamax q'añut uñt'atakipunïskaniwa.

9“Uka usut jaqitix caballor qunxatañ qunuñar qunxatani ukasti, uka qunuñax q'añut uñt'atäxaniwa.

10“Khititix uka jathap aywiyir usut jaqin mä kuna qunt'atapxarus llamkt'kani, jan ukax uka yänaksa aptawaykani ukax, isip t'axsuqasxañapawa, jupa kipkas jariqasxañaparakiwa, ukampis jayp'thapiñapkamax q'añut uñt'atakïskaniwa.

11“Uka usut jaqitix amparap jan jariqasis yaqha jaqir llamkt'kani, uka llamkt'at jaqisti isip t'axsuqasxañapawa, jupa kipkas jariqasxañaparakiwa, ukampis jayp'thapiñapkamax q'añut uñt'atakipunïskaniwa.

12“Uka usut jaqitix mä ñiq'i phukhurus llamkt'kani, uka phukhux p'akjatäxañapawa; lawat lurat yänakas jariqatäxañapawa.

13“Uka jaqitix usupat k'umarachasxani ukkhasti, q'umachasiñapatakix paqallqu uru suyt'añapawa, isinakap t'axsuqasxani, jupa kipkas jalsu umampiw jariqasxarakini, ukapachakiw q'umachatäxani.

14Kimsaqallqu ururusti pä qhurukutu jan ukax pä paloma chhiwchhinak apanini, ukanaksti Tatitump Jikisiñ Utäkis uka nayräxan Tatitun nayraqatapan sacerdoter katuyxani.

15Sacerdotesti mayxa jucha luratat wilañcha luqtxani, maysti nakt'ayasaw luqtxarakini, ukhamat Tatitun nayraqatapan jatha aywiyir usun jaqitakix q'umachasïwi lurañ phuqxani.

16“Mä chachatix inamayak jathapsa wartkani ukkhax taqi janchip umampiw jariqasxani, ukatsti jayp'thapiñapkamaw q'añut uñt'atarakïni.

17“Mä isirusa, jan ukax lip'ichit lurat kuna yänakxarusa uka jaqin jathapax ch'aqxatani ukax umampi t'axsuqatäxañapawa, ukanakasti jayp'thapiñkamax q'añut uñt'atäniwa.

18“Mä chachatix mä warmimpi ikintasin mayachasipxani ukkhasti, panpachaniw umampi jariqasxapxañapa, ukatsti panpachanirakiw jayp'ukamax q'añut uñt'at qhiparapxani.

Warminakan yaqhip q'añunakapat yatichäwinaka

19“Mä warmitix phaxsi wilapampïni ukasti, paqallqu uruw q'añut uñt'atäni.

“Khititix uka warmir llamkt'kani ukasti, jayp'thapiñapkamax q'añut uñt'atäniwa.

20“Kawkharutix uka warmix phaxsi wilanïkasin ikt'kani ukax, uka ikiñapax q'añut uñt'atäniwa.

“Kawkharutix qunt'askani uka chiqas q'añut uñt'atarakïniwa.

21“Khititix uka phaxsi wilan warmin ikiñap llamkt'kani uka jaqix isip t'axsuqasxañapawa, jupa kipkas jariqasxañaparakiwa, ukatsti jayp'thapiñapkamax q'añut uñt'atakipunïskaniwa.

22“Khititix uka warmin mä kunar qunxatatapxarus llamkt'kani ukasti, isip t'axsuqasxañapawa, jupa kipkas jariqasxañaparakiwa, ukatsti jayp'thapiñapkamax q'añut uñt'atakipunïskaniwa.

23Uka warmin ikiñapsa jan ukax mä kunapsa maynix llamkt'kani ukkhax jayp'thapiñapkamax q'añut uñt'atakipunïskaniwa.

24“Mä chachatix uka phaxsi wilan warmimpi ikintani ukkhax uka phaxsi wilapampi q'añuchjataw uñjasini, ukatsti paqallqu urunakaw q'añut uñt'at jikxatasini, kawkha chiqarutix uka jaqix ikintkki uka chiqas q'añut uñt'atarakïniwa.

25“Mä warmitix jan phaxsi wilanïkasin walja urunak wila sarayasini, jan ukax phaxsi wilapas saraqirïki ukat walja urunakampi saraskakini ukapachax, uka warmix wilapan sayt'añapkamax q'añut uñt'atäniwa, phaxsi wilanïkaspasa ukhama.

26“Kawkharutix uka wila apayasir warmix ikt'kani, jan ukax kunanakxarus qunxatkani ukanakax q'añut uñt'atäxaniwa, kamisatix phaxsi wilapan saratax q'añut uñt'atäki ukhama.

27“Khititix uka yänak llamkt'kani ukasti q'añut uñt'atäxaniwa. Isip t'axsuqasxañapawa, jupa kipkas jariqasxañaparakiwa, ukatsti jayp'ukamax q'añut uñt'atakipunïskaniwa.

28“Kunapachatix uka wilapax t'akt'xani ukkhatsti, q'umäxañatakix paqallqu uruw suyt'ani.

29Kimsaqallqu ururusti pä qhurukutu jan ukax pä paloma chhiwchhinak apanini, ukanaksti Tatitump Jikisiñ Utäkis uka nayräxan Tatitun nayraqatapan sacerdoter katuyxani.

30Sacerdotesti mayxa jucha luratat wilañcha luqtxani, maysti nakt'ayasaw luqtxarakini, ukhamat uka wila apayasir warmix wasitat q'umäxarakini,

31ukhamat jumanakax israelitanakarux q'añu lurañanakat jithiqtayapxäta. Jan ukhamäkani ukasti, uka qullan chiqar q'añunakampi phuqhantapxatapat jiwarapxaniwa.”

32Aka iwxt'anakasti, kawkïr chachanakatix chhuxurasiñapat aliqak jathap aywiyxani, ukat q'añut uñt'atäpxaraki;

33ukhamarak kawkïri warminakatix phaxsi wilanïpki, jan phaxsi wilanïkasinsa wila sarayapki, chachanakas uka phaxsi wilani warmimpi ikintapki, taqi jupanakatakiwa.