2 REYES 17 - Qullan Arunaka DC

Samaria markan aynacht'atapampi, Israel markan apanukut uñjasitapampi

1Ahaz reyix tunka payan mara Judá marka apnaqkän ukapachaw, Elá chachan Oseas yuqapax Israel marka apnaqañ qalltäna, jupasti Samaria markan llätunka maraw marka apnaqäna.

2Ukampis luratanakapax Tatit nayraqatan jan walinakänwa, Israelan janis jupat nayra utjir reyinakjam jan walinak lurkchïna ukasa.

3Ukatsti, Asiriankir Salmanasar reyiw jutasin Oseas reyir nuwantäna, juparusti atipjänwa, ukatsti qullqi churañapatakiw wayt'äna.

4Ukampis mä urux, Oseas reyix sayt'asïnwa, jupasti mä qawqha jaqinak Lais chiqar khithäna, Egiptonkir reyir mä yatiyäwi apayasa, ukhamarus janiw Salmanasar reyirux, kunjämtix sapa mara qullqi churirïkatayna ukham churkxänti. Kunapachatix Asiriankir reyix ukanak katjkäna ukkhasti, Oseasar katuntayasin carcelaruw uchantayäna;

5ukatsti Salmanasar reyix Judá uraqpachar mantantasin Samaria marka katuntäna, kimsa maraw jan samart'asa ukham luräna.

6Qhiparusti, Oseas reyix llätunka mara marka apnaqkän ukapachaw, Asiriankir reyix Samaria marka katuntasïna, israelit jaqinakarusti Asiria markaruw katuntat apäna, ukatsti jupanakarux Halah sat chiqaruw utjnuqtayäna, Habor jawir chiqankir Gozán uraqina, ukhamaraki medonakan markanakapana.

7Israelita jaqinakan Tatit Diosap nayraqatan jucha lurapxatap laykuw ukax lurasïna, jupanakarux Tatituw Egipto markat irpsunïna, faraón reyin amparapat qhispiyasa, jupanakasti yaqha diosanakaruw yupaychapxäna,

8ukatsti kawkïr markanakarutix Tatitux jupanakan nayraqatapat jaqunukkatayna ukanakan luräwinakap arkapxäna, ukhamaraki kuna saranaktix Israel reyinakax utt'ayapkatayna uka saranak arkapxäna.

9Ukhamarusa, israelit jaqinakax jan wali arunak Tatit Diosapatak arsupxäna, ukatsti yaqha diosanakar yupaychañ utanak taqpach markanakapan utachapxäna, ukhamaraki uñch'ukiñ pukaranakansa, uyuchrantat markanakansa.

10Ukatsti qullu patanakana, walja laphini quqanak k'uchun Astarté diosan uñtasitanakapa, axsarata qalanaka sayt'ayapxäna,

11ukatsti kawkïri markanaktix Tatitux jupanakan nayraqatapat jaqunukkatayna uka markanakan luräwinakaparjamaw inciensonak nakhayapxäna, ñanqha luräwinak lurapxarakïna, ukhamat Tatitur q'apisiyasina.

12Jupanakasti idolonakaruw yupaychapxäna, Tatitux ukanak jan lurapxañapataki siskchïna ukasa.

13Tatitusti taqpach profetanak tuqiw israelitanakarux iwxatayna, jan wali sarnaqäwinakap apanukupxañapataki, ukhamaraki nayra awkinakapar jupax churkatayna uka kamachi arunakaparu, taqi yatichäwinakapar phuqhapxañapataki.

14Ukampis jupanakax janiw ist'añ munapkänti, jan ukasti nayra awkinakapjamarakiw Tatit Diosapar jan iyawsas chuymanakap qalarayasipxäna;

15kamachinakaparusa, nayra awkinakapamp lurkatayna uka arust'äwirus jisk'achapxänwa. Ukhamarus jan yäqkañ yaqha diosanakan qhipap arkapxäna, ukham lurasaw jupanakax mä jan yäqkañ markar tukupxäna, jupanak jak'ankir markanakan luräwinakap yatiqasipxäna, kuntix Tatitux ukanak jan lurapxañapatak siskchïna ukasa.

16Tatit Diosapan kamachi arunakap apanukusasti, broncet pä vaca qallu lursusipxäna, ukhamarus Astarté diosar uñtatanak lurapxäna, ukatsti Baal diosaru, intiru, phaxsiru, warawaranakaruw yupaychapxäna.

17Yuqall wawanakaparusa, imill wawanakaparus nakhantayapxarakïnwa, ukatsti yatirinakampiru, layqanakampiruw jiskt'asipxäna, jupanakas jutir urunakat yatipkaspa ukhama, Tatitun nayraqatapan jan wali lurañanakaruw katuyasipxarakïna, ukham lurasaw jupar q'apisiyapxäna.

18Ukat Tatitux Israel markatak q'apisïna, jupan nayraqatapat jaqunukurakïna, Judá ayllunkir jaqinakarukiw jilt'ayäna.

19Judá ayllunkirinakasti janirakiw Tatit Diosapan kamachi arunakap phuqhapkänti, jan ukasti israelitanakan uñstayat saranakaparuw arkapxäna.

20Ukat Tatitux israelitanakat saraqiri wawanakapar apanuküna, jisk'achjarakïna, lunthatanakan amparapar katuyasa, jupan nayraqatapat jaqunukuñkama.

21Israelarux Davidan saraqirinakapat jaljtayänwa, ukatsti israelitanakax Nabat chachan Jeroboam yuqaparuw reyit utt'ayasipxäna, uka reyisti israelitanakarux Tatitut saraqtayäna, kunayman jucha lurañanakaru puriyasa.

22Ukhamaw israelitanakax kuna juchanaktix Jeroboam chachax lurkatayna, uka pachpa juchanak jupanakax lurapxäna, janirakiw uka juchanak apanukupkänti.

23Ukhamasti, Tatitux jupan nayraqatapat Israel markarux apanukxänwa, kunjämtix jupax taqpach profetanakap tuqi yatiykatayna ukhamarjama, ukat Israel markax Asiria markar katuntat apatäxäna, ukan jichhürkam jikxatasiski.

Samaria markan wasitat jaqinakanïxatapa

24Asiriankir reyisti Babiloniata, Cuta, Avá, Hamat, Sefarvaim uka markanakat jaqinak apäna, ukatsti israelitanak lantix Samaria markanakan uka jaqinakar utjnuqtayäna. Ukhamat uka jaqinakax Samaria marka katuntasipxäna, markanakapan jakapxarakïna.

25Ukampis uka jaqinakax janiw Tatitur yupaychapkänti, ukat kunapachatix jupanakax utjnuqtapkän ukkhaxa, Tatitux leonanak apayanïna, uka leonanakasti jupanakat yaqhipanakarux manq'antänwa.

26Ukat Asiriankir reyir yatiyir sarapxäna, akham sasa: “Kawkïr jaqinaktix Samaria markanakan jakapxañapataki apkta uka jaqinakax, janiw uka uraqinkir Diosan kamachip yatipkiti, jan uñt'apxatap laykusti, uka Diosax leonanak apayani, ukatsti jichhax jiwarayaskiwa” sasa.

27Ukham ist'asasti, Asiriankir reyix sänwa: “Katuntat apanitäki uka sacerdotenakat maynir khithapxam, ukan jakir sarpan, ukatsti uka uraqinkir Diosan kamachinakap jupanakar yaticharakpan” sasa.

28Ukhamasti, kawkïr sacerdotenaktix jupanakax Samaria markat jaqunukupkatayna ukanakat mayniw sarasin, Betel chiqan utjnuqtäna, ukatsti jaqinakarux Tatitur yupaychañ yatichäna.

29Ukampis sapaqat markaw kawkhantix jakapkän ukkhana, pachpa diosap lurasipxäna, uka diosanaksti samaritano jaqinakax qullu patanakan lurapkatayna uka yupaychañ utanakaruw uchapxäna.

30Babiloniankir jaqinakax Sucot-benot sat ídolo lurasipxäna; Cuta ukankir jaqinakasti Nergal sat ídolo, Hamat ukankirinakasti Asimá sat ídolo.

31Avá ukankir jaqinakasti Nibhaz, Tartac sat idolonak lurasipxarakïna; Sefarvaim ukankir jaqinakasti wawanakap ninar nakhantayapxäna, Adramélec, Anamélec sat diosanakapar wilañcha luqtasa.

32Ukhamarus, jupanakax Tatituruw yupaychapxäna, ukampis jupanak taypit sacerdotenak utt'ayasipxäna, qullu patanakan utjir yupaychañ chiqanakan luqtapxañapataki.

33Ukhamasti, jupanakax Tatitur yupaychapkchïna ukasa, jupanakan yaqha diosanakaparux yupaychasipkakïnwa, kawkha markanakattix apanitäpkatayna uka markanakan saranakaparjam lurasa.

34Jupanakasti jichhürunsa kunjämtix nayra pachax lurapkän uka pachparak lurasipki, jupanakax janiw Tatitur yupaychapkiti, janirakiw kuna kamachinaka, arsutanaktix Tatitux Jacob chachan wila masinakapar phuqhapxañapataki arsuwaykäna ukhamarjamas sarnaqapkiti, Tatitux juparuw Israel sutimpi sutichäna.

35Kunapachatix Tatitux jupanakamp suma arust'äwi lurkän ukkhasti, jupanakarux sänwa: “Janiw yaqha diosanakar yupaychapxätati, janirakiw jupanakar wilañchanak waxt'asa luqtapxätati.

36Naya, Tatit Diosamarukiw yupaychapxitäta, nayaw jumanakarux Egipto markat jach'a ch'amax uñacht'ayas irpsunipxsma. Naya saparukiw yupaychapxañama, wilañchanaksa luqtapxañama.

37Ukxarusti, jumanakar qillqata churapksma uka kamachinakaru, arsutanakaru, yatichäwinakaru jan armt'asis phuqhapxam, janirak yaqha diosanakarux yupaychapxamti.

38Jumanakamp nayax lurkta uka suma arust'äwit jan armasipxamti, janirak yaqha diosanakarus yupaychapxamti,

39jan ukasti naya, Tatit Diosamaruk yupaychapxita, nayaw uñisirinakaman amparapat qhispiyapxäma” sasa.

40-41Ukampisa, uka markanakax janiw Tatitur ist'apkänti, jan ukasti nayra pacha saranakaparjamaw sarnaqasipkakïna; mä tuqit Tatituruw yupaychapxäna, mä tuqitsti idolonakaparux yupaychasipkarakïnwa. Uka jaqinakat saraqir wawanakapasti jichhürkamaw nayra awkinakapjam lurasa sarnaqasipki.