SALMOS 59 - Qullan Arunaka DC

SALMO 59Diosaw arxatirisaxa 1 Davidan q'uchupa, Saúl reyix Davidar jiwayañatak muyupaykän ukapachaw Davidax aka q'uchu qillqäna.

1 1 (2) Diosaxay,

nayamp timasirinakat qhispiyita,

nayar uñisirinakat arxatita.

2 2 (3) Ñanqha lurir jaqinakat qhispiyita,

jaqi jiwayirinakat jark'aqita,

3 3 (4) wali ch'aman jaqinakaw utji,

nayar jiwayañatakiw suyxatasipkitu.

Tatay,

janiw qallasirïkti, janirakiw juchsa lurkti;

4 4 (5) janiw kuna ñanqhsa lurkti,

jan kuna juchatak katuntañ munapxitu.

¡Sartasikimaya! ¡Nayar yanapt'irix jutakimaya!

5 5 (6) Tatay, taqi ch'aman Diosay,

Israelan Diosapa, sartasikimaya,

khä ñanqha lurir markanakarux mutuyamaya;

khä ch'uxña chuyman jaqinakat jan khuyapayasimti.

6 6 (7) Arumthapirux anunakjam wajasisaw kutt'anipxi,

markansti uksar aksaruw muytapxi.

7 7 (8) Kuns arsusipkakiwa,

arsutanakapampis chuym ust'ayapxi:

“Janiw khitis ist'kistaniti” sasa.

8 8 (9) Jumasti, Tatay, jupanakat larustawa;

juchaninakat phiskastawa.

9 9 (10) Diosaxay, juman imataw sarnaqaskta,

jumaw ch'amañchirixätaxa, imirixätasa.

10 10 (11) Nayar munasir Diosax jikxatitaniwa;

uñisirixan aynacht'atap uñjayitani.

11 11 (12) Diosaxay,

jupanakat jan khuyapayasimti,

markaxan ukxat jan armasiñapataki;

jupanakarux ch'amamampiy ananukum,

mä p'inqa aynacht'ayarakim.

¡Tatay, jumaw nanakar arxatirïtaxa!

12 12 (13) Taqi arsutanakapampiw juch lurapxi;

jach'a jach'a tukuñapan katuntatäpxpan,

k'ari juramentonakapan chinuntatäpxpan.

13 13 (14) ¡Q'apisiñamax jupanakar tukjpan!

¡Jupanakax jiwarapxpan!

Jacobun markapar Diosan apnaqatap yatipxpan,

akapach tukuskam apnaqirïtap yatipxarakpan.

14-15 14-15 (15-16)Arum tuqirux anunakjam wajasisaw kutinipxani,

markansti manq'a thaqhasaw muytapxani,

jan jikxatasasti anunakjamaw awullipxani.

16 16 (17) Nayasti willjtaw jumarux q'uchüma;

munasiñamampita, ch'amamampit yatiyä.

Jumaw nayan arxatirixätaxa,

jumaw llakisiñaxan imantasiñaxätaxa.

17 17 (18) Diosaxay, jumaruw q'uchunak q'uchüma,

jumaw nayan imantasiñaxätaxa,

nayan arxatirixätasa;

¡jumaw nayar munasir Diosätaxa!