SALMOS 141 - Qullan Arunaka DC

SALMO 141Nayranakaxax jumaruw uñtantam 1a Davidan q'uchupa.

1 Tatay,

jumaruw art'asinsma, ¡jank'akiy jutam!,

¡art'asinsma ukapachax ist'akitaya!

2Mayisitaxax incienso q'aphir uñtat nayraqatamar makhatanpan,

luqatatat amparanakaxasti, jayp'u luqtäwjamäpan.

3Tatay,

janiy kuna jan wali parlañanaksa arsuyistati.

4Ñanqha lup'iñ amuy apaqt'ita;

ñanqha lurañanak jan lurayistati,

janirak ñanqha lurir jaqinakan manq'äwipan

chikachasiyistati.

5Aski jaqix mutuyitpan,

suma jaqix tuqinuqitpan,

ukanak katuqañatakix janiw jaltkäti;

mutuykatpachas Tatitut mayisiskakïwa.

6Ñanqha luririnakan jilïrinakapax

qarqanakat nukt'atäpxaniwa,

arunakaxan askïtap uñjapxani.

7Ch'akhanakapax amay imäwi jak'an willitatatäniwa,

uraq sukachsutax jist'artki ukar uñtatäniwa.

8Tatay, nayranakaxax jumaruw uñtantam,

jumaruw imantasiñatak makhatansma,

janikiy apanukustati.

9Jalantañaxatak uchat sipitat qhispiyita,

ñanqha luririnakan sipitapat jark'aqita.

10Ñanqha luririnakax pachpa sipitanakapar jalantapxpan,

nayasti ukchañkamax nayraqatar sarantaskakïwa.