APOCALIPSIS 5 - Qullan Arunaka DC

Qillqatampi, Corderompi

1Ukatsti qhapaq qunuñan qunt'atäkän ukan kupi amparapan mä qillqat uñjta, patatsa manqhatsa qillqsuta, paqallqu sellonakampi uchantata.

2Ukatsti mä wali munañan angelaruw uñjarakta, wali jach'at art'as jiskt'askiri: “¿Khitirak aka qillqat jist'arañataki, sellonaksa ch'iyarañatak askïspasti?” sasa.

3Ukampis janiw alaxpachansa, akapachansa, aka uraqi manqhansa utjkänti uka qillqat jist'arirjamaxa, uñxatañatakis askïpkänti.

4Nayasti walpun jachäyäta, uka qillqat jist'arasin uñxatañataki jan maynis aski utjatapata.

5Ukampis uka jilïrinakat maynïriw akham situ: “Jan juk'ampi jachkxamti, uñtam, Judá ayllunkir Leonaw atipji, jupax Davidan jathapat saraqiriwa, jupax ch'amaniw uka qillqat jist'arañataki, uka paqallqu sellonak ch'iyarañatakisa” sasa.

6Ukatsti qhapaq qunuñ jak'an mä Cordero uñjta. Uka Corderosti, kharinukutäkaspa ukhamaw sayt'atäskäna, uka pusi jakaskirinakampi, pä tunka pusin jilïrinakampi muyuntata. Paqallqu waxranïnwa, nayranakapas paqallqurakïnwa. Uka paqallqu nayranakasti Diosan paqallqu ajayuparakïnwa, uraqpachar khithanitäki ukanaka.

7Uka Corderosti sartasin qhapaq qunuñan qunt'atäkän ukan kupi amparapat uka qillqat apaqi;

8ukatsti ukspachaw, uka pusi jakaskirinakasa, uka pä tunka pusin jilïrinakas Cordero nayraqatan killt'asipxäna. Sapa maynin arpax utjäna, inciensompi phuqt'ata qurit lurat qiru ast'atkamarakïnwa, uka inciensosti Diosan markapan mayisitanakapänwa.

9Jupanakasti taqpachaniw aka machaq q'uchu q'uchupxäna:

“Jumakiw uka qillqat katuñatak askïtaxa,

sellonakap ch'iyaqañatakis askirakïtaxa,

jiwayat uñjasitam layku;

wilam wartasaw Diosatak alawayta,

taqi jaqinaka, kunayman parlan jaqinaka,

jisk'a markanaka, jach'a markanaka.

10Jupanakat mä marka tukuytaxa,

reyinaka, sacerdotenak Diosatak tukuytaxa,

taqi aka uraqpachar apnaqapxañapataki” sasa.

11Ukatsti walja angelanakan arunakap ist'arakta, waranqa, waranqa angelanakänwa qhapaq qunuñampiru, jakaskirinakampiru, uka pä tunka pusin jilïrinakampir muyuntata.

12Wali jach'at art'apxarakïna:

“¡Kharinukut Corderox askiwa,

munañanïñ kankaña, qamir kankaña,

yatiñ kankaña, ch'aman kankaña, aytat kankañ katuqañataki,

jach'añchatäña, yupaychatäñas askirakiwa!” sasa.

13Ukatsti Diosan taqi luratanakaparuw arsur ist'arakta; alaxpachankirinakaru, akapachankirinakaru, uraqi manqhankirinakaru, jach'a quta manqhankirinakar akham sapxiri:

“¡Yupaychañasa, jach'añchañasa,

jach'a kankañasa, munañanïñ kankañasa,

qhapaq qunuñan qunt'atäki ukar churatäpan, ukhamarak

Corderorusa wiñayan wiñayapataki!” sasa.

14Uka pusi jakaskirinakasti ukxaruw sapxäna: “Ukhamäpan” sasa. Uka pä tunka pusin jilïrinakasti killt'asisin yupaychapxarakïna.