DEUTERONOMIO 13 - Qullan Arunaka DC

1 1 (2) “Jumanak taypintix khiti profetasa, jan ukax unañchäwinak uñjir jaqis uñstani, ukatsti unañchanakampi, jach'a uñacht'äwinakamp lurani,

2 2 (3) ukatsti ukanakan phuqhasitapat jumanakar sapxiristam: ‘Sarapxañäni, jan uñt'apkta uka yaqha diosanakar arkapxañäni, yupaychapxarakiñäni’ sasa,

3 3 (4) ukapachasti jan jumanakax jupanakar ist'apxamti; Tatit Diosamaw uka tuqit jumanakar yant'añ munasipktam, jumanakax taqpach chuymampiti, taqpach jakañamampit jupar munapxta uk yatiñataki.

4 4 (5) Tatit Diosam saparukiw arkapxäta, jach'añchapxarakïta, kamachi arunakap phuqhapxam, arunakap ist'apxam, juparu yupaychapxam; jupamp chikt'atapun jakapxarakim.

5 5 (6) Uka unañchäwinak uñjir profetasti jiwayataw uñjasini, jumanakar Tatit Diosamatak sayt'asiñ amtayatapata, thakhipat jithiqtayañ munatapata. Ukhamat jumanak taypit taqi jan wali luräwinakxa saphitpach jik'inukupxäta. Tatitusaw jumanakar Egipto markan t'aqhisiyat sarnaqañat qhispiyanipxtam, ukhamasti juparukiw jaysapxäta.

6 6 (7) “Juman jilamatixa, pachpa jilamäkasina, jan ukax yuqall wawamasa, imill wawamasa, munat warmimasa, wali munat masimasa, jamasat jumar yaqha diosanakar yupaychayañ amtayätam, kawkïr diosanakarutix jumasa, awkinakamas jan uñt'kän ukaru,

7 7 (8) jaya markankir diosäpasa, jak'a markankir diosäpasa,

8 8 (9) janipuniw jupanakan munañanakap lurätati janiw ist'ätasa; janirakiw jupanakat khuyapayasïtati, jupat khuyapt'ayasisas imt'amti,

9 9 (10) ukat sipan jupar jiwayam. Jumaw jiwayañatak nayraqat amparam aytäta, juma qhipatsti uka kipkarak taqpach markax lurani.

10 10 (11) Jiwayañkamaw qalamp k'upjäta, Tatit Diosamat jumar armasiyañ munatapata, Egipto markan t'aqhisiñat qhispiyanktam uka Tatitumat jithiqtayañ munatapata.

11 11 (12) Ukhamat taqpach Israel markax yatini, ukatsti mayampi ukham jucha lurañsa axsarayasipxaniwa.

12 12 (13) “Ukhamasti, kawkïr marktix Diosax jakañatak churapkätam uka markanakantix yatipxäta,

13 13 (14) Diosar jan jaysir jaqinakan uñstatapa, markachirinakar Diosat jithiqtayaskatapa, yaqha jan uñt'at diosanakar yupaychayaskatapa ukkhasti,

14 14 (15) ukanak ist'asin jumanakax sum yatxatapxäta, ukattix taqi ukanakan chiqätap yatipxäta, jumanak taypin jan wali luräwinak lurasitapsa,

15 15 (16) jumanakax espadampkamaw uka markan jakir jaqinakarux jiwarayapxäta, taqpach uywanakapsa, uka markan utjir yänakapsa t'unjapxätawa.

16 16 (17) Uka markan taqpach qamir yänakapsti chika plazaruw phint'apxäta, ukatsti ninampiw markarux phichhantapxäta taqi kunanaktix uñisirimat aparanipkta ukanakamp chika, taqpach t'unjasina, ninampi phichhantasina, Tatit Diosamataki nakhantat luqtäkaspas ukhama. Uka markasti laqayanakar tukuyata, jan mayampitaki t'unjataw uñjasini, janirakiw mayamp sayt'ayatäkaniti.

17 17 (18) “Jan jumanakax kunatix t'unjañataki uchatäki ukanak aptasipxamti, Diosasti janirakiw ukapachax jumanakatak q'apiskaniti, ukampis jupax jumanakat khuyapayasini, mirantayapxarakïtamwa, jumanakan nayra awkinakamar arsuwaykän ukhamarjama,

18 18 (19) jumanakatix Tatit Diosamar jaysapxäta, jichhürun churapksma uka kamachi arunakarjam phuqhapxäta, arunakaparjam sarnaqapxarakïta ukapacha, jupan nayraqatapan chiq sarnaqasa.