1-2 1-2 (3) Jaqinakasti reyin, Absalón yuqapatjam wali jachatap ist'asinxa, Joab chachan ukaruw yatiyir sarapxäna. Ukhamaw uka urux nuwasïwin atipjañax llakisiñ urur kipstäna.
3 3 (4) Soldadonakasti janiw markar mantañ munapkänti, wali axsart'asarakiw mantapxäna, nuwasïwitsa jaltanipkaspa ukhama.
4 4 (5) Ukchañkamasti reyix ajanup imt'asawa, jach'at wararis jachäna: “¡Absalón wawaxay! ¡Absalón wawaxay, wawaxa!” sasa.
5 5 (6) Joab chachasti reyi utar sarasin reyir sarakïna:
—Jichhürux juma, reyix, taqpach yanapirinakamaruw p'inqachapxistaxa, jupanakaw jakañam qhispiyapxtam, ukhamaraki wawanakamana, phuchhanakamana, uñt'at warminakaman jakañap qhispiyapxi.
6 6 (7) Juma, reyix jichhüruw uñacht'aytaxa, jilïr yanapirinakaman jumatak jan kunätapsa; jumax uñisirinakamarux munastawa, jumar munasirinakarusti uñistawa. Absalonan jakaskañapaw jumatakix askïsapäna, taqi nanakax jiwarat uñjasipkiriskäyät ukasa, jichhüruw nayax uk amuyta.
7 7 (8) Ukhamasti, mistumaya, arunakamampi arkirinakamar ch'amañcht'anim, jan ukham lurkäta ukasti, Tatitun sutipxaruw juramentompi nayax arsta, jichhärmax janiw maynis jumar arxatirix utjkaniti. Ukasti juma, reyitakix sinti jan walipunïniwa; kuna jan walt'añanakatix wayna kankañamatpach utjarapktam ukanakat sipan juk'ampïniwa —sasa.
8 8 (9) Ukhamasti reyix sartasisin marka punkur qunt'asiriw saräna. Kunapachatix taqi jaqinakaru reyin marka mantañawjan qunt'atäskatap yatiyatäxäna ukapachasti, taqiniw aruntirix uñstanipxäna.
Davidax Jerusalén markaruw kuttxiIsraelita jaqinakasti taqiniw utanakapar jaltxapxatayna.
9 9 (10) Ukatsti Israelan taqpach ayllunakapan jaqinakax ch'axwasin sapxarakïna: “David reyiw filisteo jaqinakampita, uñisirinakasampit qhispiyistu, ukampis Absalón wawap laykuw markat jaltawayxi.
10 10 (11) Jiwasax Absalonaruw reyit utt'ayastan, jichhasti jupax nuwasïwin jiwxi. ¿Kunarak jichhasti suyañäni, David reyir kuttayaniñatakisti?” sasa.
11 11 (12) Uka arunakasti Israel markpachan ist'asïna, David reyin utapkamarakiw puritayna. Ukat Davidax Sadoc, Abiatar sacerdotenakar mä iwxa apayäna, akham sasa: “Jumanakax Judá markankir jilïr jaqinakamp parlapxam, kunatsa jan jichhakam nayaru reyi utaxar kuttayanxapxitu,
12 12 (13) jupanakax nayan aylluxankir jaqinakawa, janiw wakiskiti qhipa tuqiruk nayan kuttañaxatak arsupxañapaxa” sasa.
13 13 (14) Ukxarusti saskakïnwa Amasá jaqir sapxañapataki: “Jumax wilaxat wilanïtawa, ukhamasti jichhürut uksarux jumaw Joab lanti ejercitoxan jach'a jilïripat sayt'äta. Janitix aka arsutaxar phuqkäma ukax, Tatituy nayar jan khuyapt'ayasis mutuyitpan” sasa.
14 14 (15) Ukhamwa Amasá jaqix Judá markankir jaqinakar iyawsayäna, taqi jupanakasti, mä sapa jaqikïkaspas ukhamaw Davidampiru, taqi jaqinakapampir kuttayanxapxäna.
15 15 (16) Ukhamasti reyix kuttanxänwa, Jordán jawir chiqaruw purinïna. Judá uraqin utjirinakasti Guilgal chiqakamaw reyir katuqirix mistunipxäna, Jordán jawir makhatañsa yanapt'apxarakïnwa.
16 16 (17) Benjamín ayllunkiri, Guerá jaqin Simí yuqapax Bahurim chiqat jank'akipuniw Judá markankir jaqinakamp chik saraqanirakïna, David reyir katuqiri.
17 17 (18) Jupamp chikasti, Benjamín ayllunkirit waranqa jaqinakaw sarapxäna, Sibá sat jaqisa, Saúl reyin wila masipan uywatapäkatayna ukas sararakïnwa, tunka phisqan yuqanakapampi, pä tunka uywatanakapamp chika, jupasti reyis janïr purkipan Jordán jawirar purïna,
18 18 (19) ukatsti jawir makhatäna, reyin wila masinakapar Jordán jawir makhatañ yanapt'añataki, ukhamat rey nayraqatan mä suma uñjatäñataki. Reyix Jordán jawir makhatañampixän ukkhasti, Simí chachax reyin nayraqataparuw alt'asïna,
19 19 (20) ukat jupar sarakïna:
—Reyixay achikt'asïma, janikiy nayan pantjasitaxat amtasimti, nayax jan wal lursma, kunürutix jumax Jerusalenat mistuwaykta ukapacha, juchachasitaxat jan amtasimti,
20 20 (21) naya pachpaw juchax uñt'asta, ukat jichhürux taqi israelitanakat sipan nayraqat mistunta, juma reyir katuqiri —sasa.
21 21 (22) Ukat Seruiá jaqin Abisai yuqapax säna:
—¿Janit Simí jaqin jiwañapax wakiski, Tatitun ajllisit reyipar ñanqhachatapatsti? —sasa.
22 22 (23) Davidasti ukxaruw säna:
—¡Seruiá jaqin yuqanakapa, akax janiw jumanakan lurañanakamäkiti! ¿Kunatarak arunakaxar jaysañ jan munapktasti? Jichhax nayax Israelan reyipätwa, janiw khitis Israel markan jichhürux jiwkaniti —sasa.
23 23 (24) Ukatsti, Simí jaqiruw sarakïna: “Janiw jiwkätati” sasa, reyix juramentompiw arsurapïna.
24 24 (25) Saúl reyin Mefi-bóset sat allchhipas reyir katuqirix mistunirakïnwa. Jupasti kunürutix Davidax Jerusalenat mistkatayna ukürutpacha, kuttankän ukürkamax, janiw kayunakap jariqaskataynati, sunkhanakapsa mururaskataynati, isinakapsa t'axsuskataynati.
25 25 (26) Jupax Jerusalenat reyir katuqir purinitayna, reyisti jupar sänwa:
—Mefi-bóset, ¿kunatarak jumasti nayamp chika jan sarxayätasti? —sasa.
26 26 (27) Mefi-bosetasti sarakïnwa:
—Reyixay, uywataxaw sallqjitu. Suchütax laykuw uywataxar sista nayatak mä asno wakicht'añapataki, ukar lat'xatasin juma reyimp chika sarxañaxataki.
27 27 (28) Jupasti juma reyixan nayraqatapan nayar k'arintitu. Ukampisa, juma reyix, Tatitun angelapjamätawa, kunjämarutix munkta ukhamarjamaw uñjitäta.
28 28 (29) Awkixan wila masinakapax juma nayraqatan jiwarayatäñap wakiskchïn ukasa, nayarux jumamp chik manq'äwiman manq'asiñatakiw jawsayistaxa. Jichhasti, ¿kunat juk'ampirak juma reyit mayirismasti? —sasa.
29 29 (30) Reyisti sarakïnwa:
—Janiw jichhax kuna parlañas utjkxiti. Nayax niy saraktwa, Saúl reyinkkän uka uraqinakxa, jumampi, Sibampiw jaljasipxäta —sasa.
30 30 (31) Mefi-bóset chachasti sänwa:
—Jupa sapaki taqpach uraqinak katusiskpan. Nayatakix reyi utamar, juma reyin suma k'umara jan kamacht'at kuttanxatamaw taqi kunat sipan askixa —sasa.
31 31 (32) Barzilai sata Galaad tuqinkir jaqisti, Roguelim chiqat saraqanirakitayna David reyimp chika Jordán jawir makhatañataki, ukawjan reyimp jikist'asin sarxañataki.
32 32 (33) Barzilai jaqix sinti chuymanïxänwa, kimsaqallqu tunka maranïnwa, jupasti David reyix Mahanaim chiqan jikxataskän ukapachaxa, taqi kun reyir churatayna, qamir jaqïtap layku.
33 33 (34) Reyisti Barzilai jaqirux sänwa:
—Nayamp chika Jerusalén markar sarxam, ukan nayax jumar uñjäma —sasa.
34 34 (35) Ukampis Barzilai jaqix ukxaruw säna:
—Mä qawqha maranakakiw jakxä, janiw Jerusalenar jumamp chik sarirjamäkxiristti,
35 35 (36) nayax kimsaqallq tunka maranïxtwa, manq'asa, umasa, nayatakix janiw sumäkxiti, jayuk'arati ch'aphaqacha uksa janiw amuyirjamäkxti, janirakiw chacha q'uchurinakan arupsa, warmi q'uchurinakan arupsa sum ist'kxtti. ¿Kunarurak reyitaki mä llaki ukar sarästi?
36 36 (37) Nayax jumamp chika Jordán jawir makhatirikiw jutta, ¿ukatti waxt'äwi churañ munistasti?
37 37 (38) Nayax achikt'asïma, markaxaruk kuttayxita, ukan jiwxañaxataki, ukat awkinakaxan amay imäwipar imatäñaxataki. Ukampisa, Quimham sat yuqaxaruw juma reyir luqtiritak jaytawayäma. Jumasti reyixay, kunjämtix munkta ukhamarjamaw jupar uñjäta —sasa.
38 38 (39) Reyisti sarakïnwa:
—Walikiwa, Quimham waynax nayamp chika sarpan; nayaw jupar kunjämtix jumax munkta ukhamarjam uñjä. Kuntix maykitäta uksa taqi churarakïma —sasa.
39 39 (40) Ukatsti jaqinakax taqpachaniw Jordán jawir makhatxapxäna, reyisti makhatarakïnwa, jamp'att'asaw Barzilai jaqirux khithanukxäna. Barzilai jaqisti utjäwiparuw kuttawayxäna.
40 40 (41) Ukatsti reyix Guilgal tuqiruw sarawayäna, Quimham waynampi, Judá markankir taqpach jaqinakampi, israelitanakat chikat jaqinakamp chikt'ata.
41 41 (42) Ukapachaw israelitanakax taqpachani reyin ukar sarasin jupar sapxäna:
—¿Kunatarak Judá uraqinkir jilanakaxak juma reyir katuntasipxätam, ukatsti juma reyimpiru, wila masinakapampiru, taqpach soldadonakamampir jupanakak Jordán jawirsa makhatayanipxätamsti? —sasa.
42 42 (43) Judá markankir jaqinakasti israelitanakarux sapxarakïnwa:
—¿Kunatarak mayjt'asipxtasti? Reyix nanakan jak'a wila masixawa. ¿Reyin uywatati nanakasti jakasipkta, jan ukax, kuna yänakcha nanakatak katuntasipxtxa? —sasa.
43 43 (44) Israelitanakasti sasipkakïnwa:
—¡Nanakax David reyitxa, jumanakat sipan tunka kutiw jupat arsuñax wakt'apxitu. Ukat juk'ampi, nanakaw nayraqat reyir mayipxta kuttanxañapataki. Ukhamasti, ¿kunatarak nanakar jisk'achañ chuymampi uñjapxistasti? —sasa.
Ukampisa, Judá markankir jaqinakax israelitanakat sipan, qhuruchasiñampiw arsusisipkakïna.
Who We AreWhat We EelieveWhat We Do
2025 by iamachristian.org,Inc All rights reserved.
