NÚMEROS 35 - Qullan Arunaka DC

Levitanakan markanak katuqapxatapa

1Israel markax Moab uraqi pampanakan jikxataskäna, Jordán jawira jak'ana, Jericó marka uñkatasina, ukapachaw Tatitux Moisesar parläna, akham sasa:

2“Israelitanakar parlam, jupanakar wakt'ki uka uraqinakatxa, levitanakan jakasipxañapatak markanak churapxpan, uka markanakar muyuntir uraqinak taypin, uywanak awatisiñ uraqinak churapxarakpan.

3Uka markanakan levitanakax jakapxani, pampanakansti uywanakapampi, yaqha animalanakamp uywapxani.

4Levitanakar churapkäta uka uywa awatisiñ uraqinakatxa, pusi patak phisqa tunkan metrow utjañapa pirqat anqäx tuqiru.

5Taqpach uraqix pusi thiyanïniwa, llätunka patak metro sapa thiyaru, inti jalsu tuqitsa, inti jalanta tuqitsa, amsta tuqitsa, aynacha tuqitsa tupupax pachpäniwa. Markasti chika taypinkaniwa, uywa awatiñ uraqinakamp muyuntata.

6“Levitanakar churapkäta uka markanakatxa, suxta markax imantasiñ markäniwa, jaqi jiwayir jaqix uka markan imantasini. Uka suxta markanakxarusti yaqha pusi tunka payan markanakamp churapxäta;

7taqpacharusti, pusi tunka kimsaqallqun markanak levitanakar churapxäta, ukhamarak uywa awatiñ uraqinakapamppacha.

8Israelitanakan uraqipat levitanakatak markanak churapkäta ukkhaxa, sapaqat ayllunakaw churani qawqhatix wakt'katayna ukhamarjama: Jilpach uraqinakan ayllunakaxa, jilpach markanak churani; juk'a uraqinakan ayllunakasti, juk'a markanakak churarakini.”

Imantasiñ markanaka(Dt 19.1-13; Jos 20.1-9)

9Tatitux Moisesar sänwa:

10“Israelitanakar parlam, jupanakarusti akham sarakim: Jumanakax Canaán uraqir mantañataki, Jordán jawir makhatapkäta ukkhax,

11imantasiñ markanak ajllisipxäta, jan jiwayañ amtampi jaqi masipar jiwayirix ukar imantasir jaltxañapataki.

12Ukhamat qhispiyat uñjasini, jiwayat jaqin wila masinakapan jan jupar phuqsusiñ amtampi jiwayaskañapataki; uka jaqisti taripatäñatak marka nayraqatan uñstañapkamax janiw jiwkaniti.

13Markanakat churapkäta ukanakatxa, suxta markax imantasiñatakïniwa:

14Jordán jawirat inti jalsu tuqirux kimsa markanak yaqhachapxäta, Canaán uraqinsti kimsa marka yaqhachapxarakïta.

15Uka suxta markasti imantasiñ markanakäniwa, israelitanakatakisa, yaqha markat jutasin jumanak taypin jakir jaqitakisa. Uka markanakan imantasini, khiti jaqitix jan jiwayañ amtampi jaqi masipar jiwaykani ukaxa.

16“Maynitix masipar hierromp jawq'antasin usuchjani, ukatsti usuchjat jaqitix jiwanixa, jawq'antir jaqix, jaqi jiwayiriwa, uka jaqisti jiwañapatak juchañchataw uñjasini.

17“Maynitix masipar qalampi jaqt'asin jiwayanixa, qalamp jaqt'irix, jaqi jiwayiriwa, uka jaqisti jiwañapatak juchañchataw uñjasini.

18“Maynitix masipar mä lawampi jawq'antasin jiwayanixa, jawq'antirix jaqi jiwayiriwa, uka jaqisti jiwañapatak juchañchataw uñjasini.

19Jiwayat jaqin jak'a wila masipaw jaqi jiwayirir jikxatasin jiwayani.

20“Maynitix masipar uñisiñat nukt'ani, jan ukax, jan wali amuyumpi kunampisa jaqt'arakini,

21jan ukax, uñisiñat nuwjasin jiwayani ukasti, juchanix jiwañapatak juchañchataw uñjasini, jupan jaqi jiwayirïtap layku. Jiwatan jak'a wila masipaw uka jiwayirirux jikxatasin jiwayarakini.

22“Ukampis maynitix jan munkasin masipar nukt'ani, janirak uñisiñatsa; jan ukax, jan kuna jan wali amuyumpi kunampis jaqt'ani,

23jan ukax, jan sum uñtasin qalamp jaqt'ani, ukat qalampi jaqtat jaqix jiwaspa, jan jupanakpura uñisirïkasina, janirak jupax masipar kuna ñanqha amtañampi lurkaspa,

24ukapachasti markaw taripirit sayt'ani, ukatsti aka kamachinakarjamaw jiwayki uka jaqimpiru, jiwayat jaqin wila masipampiru phuqsusiñ munatapat uñjani.

25Jan munkasin jaqi masipar jiwayir jaqirux markaw arxatañapa, phuqsusiñ munir wila masipata, ukatsti juchañchatarux imantasiñatak jaltkatayna uka markaruw kuttayxañapa. Jiwayir jaqix ukan qhiparañapa, sacerdotenakan jilïripa jakañapkama.

26Ukampis juchañchat jaqitix imantasiñ markan qurpapat mistuwayanixa,

27jiwayat jaqin wila masipax jiwayaskaniwa, marka anqäxantix jiwayir jaqir jikxatkani ukkhaxa, janiw jupax jiwayatapat juchañchat uñjaskaniti.

28Jiwayki uka jaqix imantasiñ markan qhiparañapa. Sacerdotenakan jilïripan jiwatap qhipatsti, jupax utapar kuttaskaniwa, janiw khitis jupar kamachkanisa.

29“Aka arunakasti jumanakatakix mä kamachïniwa, ukanakasti wawanakaman wawanakapatakïniwa, kawki chiqantix jakapkäta ukana.

Qhanañchañampita, kutsuyasiñampit kamachinaka

30“Mä jaqi jiwayir jaqix walja uñjirinak qhanañchañatak utjchi ukapachakiw jiwañapatak juchañchat uñjasini. Mayni sapakix janiw askïkiti khitir jiwañapatak juchañchañatakisa.

31“Jaqi jiwayatapat jiwañapatak juchañchat jaqix, janiw qullqi churas qhispit uñjaskaniti; uka jaqix jiwañapapuniwa.

32“Jaltxasin imantasiñ markan jakir jaqix, janiw qullqimpi uka markat mistkaniti, utaparus kuttkaniti. Sacerdotenakan jilïrip jiwañapkamaw suyañapa.

33“Jakapkäta uka uraqirux jan jaqi jiwayañanakamp q'añuchapxamti, jaqi jiwayañax uraqi q'añuchi, janiw kunampi kuttsuyasiñas mä jaqi jiwayatat utjkiti, jan ukasti jiwayirix jiwañapapuniwa.

34“Jakapkät uka uraqir janiw ñanqhachapxätati, nayax uka uraqin jakarakï, naya, Tatitux israelitanak taypin jakasta.”