JOSUÉ 7 - Qullan Arunaka DC

Acán chachan juchapa

1Israel markax kuntix Diosax siskatayna ukanakxa, janiw phuqkänti, tukjatäñatak satäkäna uka yänak katusisaw jan walir puripxäna. Judá ayllu taypin mä jaqiw utjäna Acán sutini, jupasti Carmí chachan yuqapänwa, Zabdí chachan allchhipa, Zérah jaqin allchhiparaki. Uka jaqisti Jericó markat walja yänak jupatak apasinïna, kawkïr yänaktix Tatitux taqi t'unjapxäta siskatayna ukanakat apaqäna. Ukat Tatitux Israel markataki wali q'apisïna.

Juch lurapxatapat Ai markampiw atipayasipxi

2Josué chachax Jericó markatpach Ai chiqar mä chachanak khithäna, uraqi uñaqanipxañapataki, uka markasti Betel chiqat inti jalsu tuqinkänwa Bet-avén jak'ana. Jupanakas sarasax Ai marka uñaqanipxäna,

3kuttanisasti Josué chacharux sapxänwa: “Ai markax janiw jach'äkiti, uka markar katuntañatakix janiw taqpach ejercitor khithañax wakiskiti, paya, jan ukax kimsa waranqa jaqinakax jiläskaniwa, uka marka uñjir jaqinakasti juk'anikirakiwa” sasa.

4Ukatsti niya kimsa waranqa jaqinakaw Ai markar nuwantañataki makhatapxäna. Ukampisa Ai markankir jaqinakax israelitanakarux jaltayañkamaw atipjäna;

5uka markankir jaqinakasti niya kimsa tunk suxtani israelit jaqinakaruw jiwarayapxäna, mayninakarux markan punkunakapat qala ch'iyañ chiqakamaw arktapxäna, uka aynachan jupanakarux tukjapxäna. Ukhamïpan israelitanakax chuyma mayjt'at uñjasipxäna, ch'amanakapsa jiwt'ayasipxarakïnwa.

6Josué chachampi, Israelan jilïri jaqinakapampisti isinakap ch'iyanuqasipxäna, llakisiñatsa qhillampiw p'iqit willxatasipxäna, ukatsti p'iqinakap uraqkam alt'asaw Tatitun arcap nayraqatan killt'asipxäna.

7Josué chachasti sänwa:

—¡Dios Tatay! ¿Kunatakirak aka markaru Jordán jawir makhatayantasti? ¿Amorreo markar katuyasat tukjañ munapxista? ¡Inas Jordán jawir khurkatar qhiparañax walïchisapäna!

8¡Dios Tatay! ¿Kamsarakïsti, israelitanakax uñisirinakapar uñjasin jaltanxatapatsti?

9Cananeonakasa, uka chiqan jakir jaqinakasa ukanak yatipxaniwa, ukatsti jupanakax mayacht'asisin nanakar chhaqtayañkamaw tukjapxitani. Jumasti, ¿kunarak luräta jach'a sutiman jan p'inqachatäñapatakisti? —sasa.

10Tatitusti Josué chacharux sänwa:

—Sayt'asim. ¿Kunatsa jumax uraqir alintat ukankaskta?

11Israelitanakax jucharuw puripxi, nayax jupanakampi lurkta uka arust'äwi p'akintapxi. Kunanakatix tukjatäñapäkan uka yänakat apasinipxi, jan wali lurasipkatap yatkasaw ukanak lunthatasipxi, ukatsti yänakap taypiruw imantapxaraki.

12Ukat israelitanakax uñisirinakapan nayraqatapan jan sayt'asipkaniti, jupanakax jaltxapxakiniwa, jichhax israelitanak pachpaw tukjatäñaru purisipki. Jumanakatix kuntix t'unjatäñapaki ukanak jan mäki tukjapkäta ukaxa, nayax janiw mayampsa jumanakampïkxäti.

13Sartasim, ukatsti Israel markar tantacham. Jupanakasti wakichasipxpan, nayan nayraqataxan qharüru uñstapxañapataki. Naya, Israelan Tatitu Diosapaw akham arsta: ‘Jumax Israel marka, kunatix taqi tukjatäñapäkän ukat apaqastaxa, janitix jumax ukanak tukjkäta, jaqunukkarakïta ukaxa, janiw uñisirinakamarux saykatkasmati.’

14Qharürux ayllunakatkam taqini akankapxam, kawkïr ayllurutix nayax chimpuntkä ukaw, wila masinakapat sapa tamaparu uñstayani; kawkïr wila masi tamarutix chimpuntkä ukaw, utapankirinakat sapa maynir uñstayani, ukatsti utankirinakat kawkïrirutix chimpuntkä ukaw sapa mayni chachanakaru uñstayarakini.

15Khitin amparapantix uñstkani kunatix tukjatäñapäkän ukaxa, wila masinakapampi, taqpach yänakapampiw ninampi phichhantatäni, Israel markaru p'inqachayatapata, ukhamarak Tatitumpi arust'äwi jan phuqhatap layku.

Acán chachan mutuyäwi katuqatapa

16Qhipürusti, Josué chachax willjtat sartasïna, ukatsti israelit jaqinakarux ayllutkama tamachas Tatitun nayaraqatapan uñstayäna. Tatitusti Judá aylluruw uñstayäna.

17Ukatsti Josué chachax Judá ayllunkiriruw sapa mayni wila masi tamanakap uñstayañapatak säna, ukatsti Zérah uka wila masi tamaw uñstayat uñjasïna. Zérah wila masi tamatsti Zabdí utankirinakaw uñstayat uñjasïna.

18Kunapachatix Zabdí utapankirinakan chachanakax maynit maynit jak'achasipkän ukkhaxa, Acán sat jaqiruw juchax mistüna, Carmí chachan yuqaparu, Zabdí chachan allchhipa, Zérah chachan allchhiparaki.

19Ukatsti Josué chachax Acán jaqirux sänwa:

—Wawaxay, Israel markan Tatitu Diosapar jach'añcham, jan k'arisisaraki kuntix lurkta uk arsusim jan kunsa imt'asa —sasa.

20Acán chachasti sänwa:

—Chiqpachansa, nayax Israelan Tatit Diosapa nayraqatan juchachasta. Uksti akham lurta:

21Jericó markat yänak apsunktan uka taypin, Babiloniat apanit mä suma isi uñjta, ukhamarak pä patak qullqimpi, mä quri barrampi, tupupasti chika kilot jilänwa. Uka yänakasti chuymaxar purkirïnwa ukat apaqasta, ukatsti uraqiruw chhujllaxa manqhan allintta, qullqi juk'ampi manqharu uchasa —sasa.

22Josué chachasti ukspachaw mä qawqha jaqinakar Acán chachan chhujllapar khithäna, uka jaqinakasti kunatix ukan imantatäkän ukanak taqpach jikxatapxäna, qullqisa juk'amp manqhan imantata.

23Acán jaqin chhujllapat apsunisax, Josué thiyaruw apanipxäna, ukhamarak israelit jaqinak nayraqataru, jupanakasti uka yänakxa Tatitun nayraqataparuw uskupxäna.

24Ukatsti Acán jaqirux Acor sat qhirwaruw irpapxäna, jupampi chiksti lunthatasinkatayna uka qullqimpi, suma isimpi, quri barrampi apapxäna, ukhamarak yuqanakapa, phuchhanakapa, vacanakapa, asnonakapa, ovejanakapa, chhujllapa, taqi kunatix jupankkäna ukanakamppach apapxäna.

25Josué chachasti Acán chacharux sänwa:

—¿Kunatarak aka jan walt'añanakar puriyapxistasti? Jichhasti, Tatituy jumarux uka jan walt'añanakar nanakar puriyatamat mutuypan —sasa.

Uk sasinsti, israelit jaqinakax taqiniw Acán chacharu, utapankirinakaparu qalamp k'upjasa jiwayapxäna, ukatsti ninampiw phichhantapxarakïna.

26Ukxarusti Acán chachan amayap patxarux walja qalanak phinxatapxäna, ukasti jichhakamaw ukankaski. Ukat uka chiqax jichhürkam Acor qhirwa sataxa. Ukhamat Tatitun q'apisiñapax Israel markatak tukusïna.