2 REYES 14 - Qullan Arunaka DC

V. JUDÁ, ISRAEL MARKANAKA SAMARIA MARKAN TUKJATÄÑ URUNAKAPKAMA(14.1—17.41)Amasías reyin Judá marka apnaqatapa(2 Cr 25.1-28)

1Joacaz chachan Joás yuqapax, Israelar pä mara apnaqaskän ukkhaw, Joás chachan Amasías yuqapax Judá markar apnaqañ qalltäna.

2Amasías reyix marka apanaqañ qalltkäna ukkhaxa, pä tunka phisqan maranïnwa, jupasti Jerusalenan pä tunka llätunkan maraw marka apnaqäna. Taykapax Joadán sutinïnwa, jupasti Jerusalén markankirïnwa.

3Amasías reyin luratanakapasti Tatit nayraqatan chiqapänwa, ukampis janiw David nayra awkipanjamäkänti. Jupax kunjämtix Joás awkipax lurkäna uka pachparak luräna,

4yaqha diosanakar yupaychañ utanakax janiw apaqatäkänti, jaqinakasti uka utanakan wilañchanak luqtasipkakïnwa, inciensonaksa nakhayasipkakïnwa.

5Amasiasasti reyi kankañap ch'amañchat amuyasisinxa, awkipar jiwayir taqpach yanapiri jaqinakaruw jiwarayäna.

6Ukampis janiw awkipar jiwayirin wawanakaparux jiwaraykänti, Moisesan kamachipan qillqatäki ukhamarjama, Tatitux sänwa: “Awki taykasti janiw wawanakapan jucha luratap layku jiwañapatak juchañchatäkaniti, janirakiw wawanakas awki taykan jucha luratap layku jiwañatak juchañchatäkaniti, jan ukasti, sapa mayniw jucha luratapatjam jiwani” sasa.

7Amasías reyix tunka waranqa edomita jaqinakaruw jiwarayäna Jayu Qhirwa sat chiqana, ukatsti Selá sat marka katuntäna, uka markarusti Jocteel sutimpiw sutinchäna, ukasti jichhürkamaw ukham sutinïski.

8Uka qhipatsti, Amasiasax mä yatiyäwi apayäna Joacaz chachan Joás yuqaparu, jupasti Israelan reyipänwa, Jehú chachan allchhiparakïnwa, uka yatiyäwisti akham säna: “Jutam, ajanuy ajanu uñkatasiñäni” sasa.

9Joás reyisti Amasiasar akham iwxarakïna: “Mä kutixa, mä ch'aphi aliw Líbano markankir cedro quqar saniñapatak khithatayna akham sasa: ‘Yuqaxar phuchham churxam warmipäñapataki’ sasa. Ukampis mä animalaw uka chiqanjam sarkasin ch'aphi alir taksuwayäna.

10Chiqpachansa, jumax edomitanakar atipjtawa, ukat chuymamax jach'achasi. Walikiwa, aytat kankañamat kusisim; ukampis jan kuna llakin utamankaskam. ¿Kunatarak jan walir puriñamatak ch'axwañ muntasti, juma pachpa aynacht'añataki, Judá markan aynacht'añapatakisa?” sasa.

11Ukampis Amasías reyix janiw ist'añ munkänti. Ukat Israelan Joás reyipax Amasiasampi purapat uñkatasiñataki Bet-semes sat chiqar sarantäna, ukasti Judá uraqin jikxatasi.

12Ukatsti Israel jaqinakaw Judá markankir jaqinakar atipjapxäna, ukatxa sapa mayniw utanakapar jaltxapxäna.

13Israelan Joás reyipasti, Judá markankir Amasías reyirux Bet-semes sat chiqan katuntäna, ukatsti Jerusalén markaruw saräna, ukansti pirqap tinkuyäna patak kimsaqallq tunkan metro, Efrainan Punkupa satäki ukkhata, Esquina Punku satäki ukkhakama.

14Ukhamarusa, Tatitun utapan utjkäna taqi uka qurinaka, qullqinaka, taqpach yänak katuntasïna, reyin utapan utjkäna uka suma imasitanakapsa katuntasirakïnwa. Ukat mä qawqha jaqinak katuntasinxa, Samaria markaruw kutt'xäna.

15Joás reyin ukat ukxar sarnaqäwipasa, luratanakapasa, atipjäwinakapasa, Judá markankir Amasías reyimp ch'axwatapasa, Israelankir reyinakan luräwinakapa qillqatankiwa.

16Joás reyix jiwxän ukapachasti, Samaria markan imt'xapxäna Israelan reyinakapan amay imäwip thiyaru. Uka qhipatsti jupa lantix Jeroboam yuqapaw reyïxäna.

17Joás chachan Amasías yuqapax, khititix Judá markan reyipäki ukax, Joás reyin jiwatapatxa tunka phisqan marampiw jakasiwaykäna.

18Amasías reyin ukat ukxar sarnaqäwipax Judá markankir reyinakan luräwinakapa qillqatankiwa.

19Jerusalén markanxa yaqhip jaqinakax Amasías reyitakiw jan walinak amtapxatayna, jupasti Laquis sat markaruw jaltxäna; ukampis uka markakam arktasin, ukan jupar jiwayanipxäna.

20Ukatxa mä caballot apxasinxa Jerusalén markan imt'xapxäna Davidan Markapana, nayra awkinakapamp chika.

21Ukatsti Judá markpachaw Azarías waynar jawsasin, Amasías awkip lanti reyit utt'ayapxäna. Azariasasti ukapachax tunka suxtan maranïnwa,

22jupaw awkip jiwxatatxa, Elat sat marka wasitat lurayasin, Judá markar kutt'ayxäna.

Payïri Jeroboam reyin Israel marka apnaqatapa

23Kunapachatix Amasías reyix tunka phisqan mara Judá marka apnaqkäna ukkhaw, Joás chachan Jeroboam yuqapax Israel marka apnaqañ qalltäna, jupasti Samaria markan pusi tunka mayan maraw marka apnaqäna.

24Ukampis jupan luratanakapax Tatitun nayraqatapan jan walinakänwa, jupasti kuna juchanakampitix Nabat chachan Jeroboam yuqapax Israel markar juch luraykäna uka jucha lurañanakat janiw saraqtkänti.

25Jeroboam reyix Israel markan qurpanakap wasitat sum utt'ayäna, Hamat sat mantañawjat qalltasa, Arabá sat qutakama, ukasti kunjämtix Israelan Tatit Diosapax Jonás luqtirip tuqi yatiykatayna ukhamarjamaw phuqhasïna; jupasti Amitai chachan yuqapänwa, Gat-héfer sat markan profetapa.

26Tatitusti israelitanakan wali t'aqhisiñankatapat amuyäna, uka t'aqhisiñanakatsti janiw khitis jaltkänti, Israelar yanapt'irix jani khitisa utjatapa uka layku.

27Tatitux janïraw akapachat Israel markan sutipa chhaqtayañ munkänti, ukat jupax Joás chachan Jeroboam yuqap tuqi Israel markar qhispiyäna.

28Jeroboam reyin ukat ukxar sarnaqäwipasa, taqi kuna luratapasa, atipjäwinakapasa, nuwasïwinak utjayatapasa, kunjämtix jupax Damasco, Jamat sat markanak Israel markatak kutiqaykän ukanakasa, Israelankir reyinakan luräwinakapa qillqatankiwa.

29Jeroboam reyix jiwxän ukkhasti, Israelankir reyinakan amay imäwip thiyaruw imt'xapxäna. Uka qhipatsti jupa lantix Zacarías yuqapaw marka apnaqxäna.