1 REYES 3 - Qullan Arunaka DC

II. SALOMONAN MARKA APNAQÄWIPA(3—11)Salomonax faraonan phuchhapampiw jaqichasi

1Salomonax Egiptonkir reyin phuchhapampiw jaqichasïna, ukhamarus mä sumankañ arust'äwi uka reyimp luräna. Ukatsti Salomonax Davidan Markapa satäki ukaruw warmip irpäna, kunapachatix reyi utapampi, Tatitun utapampi, Jerusalén pirqas muytpach tukuyasiskän ukapacha.

2Uka urunakansti markachirinakax qullu patanakan wilañchanakap Tatitur luqtapxirïna, uka urunakkamasti janiw Tatitutaki mä utax luratäkänti uka layku.

Salomonax Diosaruw yatiñ kankañ mayi(2 Cr 1.1-13)

3Salomonax Tatitur munasïnwa, David awkipan utt'ayat kamachinakarjamaw phuqharakïna, jupasa qullu patanakaruw wilañchanak luqtiri, incienso nakt'ayir saräna.

4Gabaón chiqarus wilañchanak ukan luqtañatakiw sararakïna, uka chiqan wali aytat qullu patätap layku. Ukansti walja nakt'at wilañchanak luqtäna.

5Mä arumasti, Gabaón chiqanxa, Tatituw Salomonar samkan uñstäna, juparusti akham sarakïna: “Kuntix mayiñ munkista uk mayita, nayasti churämawa” sasa.

6Salomonasti ukxaruw säna: “Tatay, juman luqtirima David awkixarux wali suma chuymampiw uñjäyätaxa, jupax juma nayraqataman chiqa aski chuymampiw sarnaqäna, taqi kunan jaysarakïyätam. Ukat jumax wali khuyapayasiñampi jupar uñjaraktaxa, mayni yuqaparusa reyi qunuñaparuw qunt'asiytaxa, kamisatix jichhürun uñjaski ukhama.

7Juma, Tatit Diosaxawa, David awkix lanti markam apnaqañatak nayar uchistaxa, nayax jan yatiñan mä waynäkipana.

8Ukampis jichhax juman ajllit marka nayraqatanktwa; uka markasti wali jach'awa, waljätapatsti janiw jakt'añjamäkiti, qawqhätapas janiw amuyt'añjamäkiti.

9Jichhasti yatiñ kankañ chuymay churita, markamar apnaqañataki, ukhamaraki kunatix askïki, kunatix jan walïki uk uñt'añataki; ¿khitirak aka jan jakt'kay markamar apnaqaspasti?” sasa.

10Salomonan ukham mayisitapax Tatitur kusisiyänwa,

11ukat jupar säna: “Mayisitamax askiwa, janiw jaya maranak jakañ maykistati, janiw qamir kankañsa, uñisirinakaman jiwañapsa maykistati, jan ukasti, jumax ist'añ yatiñataki, apnaqañ yatiñatakiw ch'ikhi kankañ mayistaxa,

12nayax mayitamarjamaw phuqhä: Nayax yatiñ kankaña, ch'ikhi kankañ chursma, janiw khitis jumat nayrxa ukham yatiñan utjkänti, janirakiw juma qhipatsa utjkaniti.

13Ukhamarusa, qamir yänakampi, jach'a kankañamp churaraksma, ukanaksti janiw jumax maykistati. Jakañamkamax, jumjam wali qamiri, wali aytat yaqha reyix janiw utjkaniti.

14Jumatix nayan munañax luräta, kamachinakaxsa, arunakaxsa phuqharakïta, kunjämtix David awkimax lurkäna ukhamxa, jaya maranak jakañ churäma” sasa.

15Ikit p'arxtasinsti, Salomonax mä samkätap amuyasïna. Ukatsti Jerusalenar purisaxa, Tatitun arust'äwi lurat arcapa nayraqataruw uñstäna, ukatsti nakt'at wilañchanaka, sumankthapiñ waxt'äwinak luqtäna. Uka qhipatsti taqi yanapirinakapatakiw jach'a manq'äwi wakichayäna.

Salomonax yatiñ kankañampiw marka apnaqañ qallti

16Khä urunakanxa, pä warminakaw reyin ukar sarapxäna, jupanakasti jan wali sarnaqir warminakänwa. Reyin nayraqatapan jikxatasipkäna ukkhasti,

17jupanakat maynïriw säna:

—¡Reyixay! Aka warmimpi nayampix mä utanak jakasipxta. Jupan nayamp chika ukankkipan nayax mä wawa wawachasta.

18Ukat kimsa ururusti, aka warmix wawachasirakiwa. Janiw utan yaqha jaqix nanakamp chik utjkänti; nanak panikipunïpxäyätwa.

19Ukampis mä arumaw aka warmin wawapax jiwxi, jupaw wawapar ikxatatayna.

20Jupasti chika arumaw sartasïna, ukchañkamasti nayax ikiskäyätwa, wawapar jiwat uñjasaxa, jak'axat wawaxar ichuqasin jupampi chik ikintayasi, naya jak'arusti jiwat wawapak ikkatayxitu.

21Qhipärmanthisti wawaxar ñuñt'ayasï sista ukkhaxa, wawax jiwatakïxataynawa. Ukatsti uru qhanan sum uñxatta, uka wawasti janiw nayax wawachaskta uka wawäkänti —sasa.

22Maynïr warmisti sarakïnwa:

—Janiw chiqäkiti, nayan wawaxax jakaski ukawa, jumansti jiwatäkis ukawa —sasa.

Ukatsti nayrïr warmix ukxaruw säna:

—K'aristawa, jiwatäki ukaw juman wawamaxa, nayan wawaxasti jakaski ukawa —sasa.

Ukhamaw reyin nayraqatapan tuqisisipkäna.

23Ukat reyix lup'ïna: “Maynix siwa: jakaski ukax wawaxawa, jiwat wawasti jumankiwa, sasa; maynisti sarakiwa: janiw chiqäkiti, jiwat wawaw wawamaxa, jakaski ukasti wawaxawa” sasa.

24Ukat reyix säna:

—¡Mä espada aptanirapipxita! —sasa.

Reyin ukar espada apapkäna ukkhasti, reyix

25sänwa:

—Jakaskir wawar payar kharjapxam, ukatsti sapaqat maynir chikatkam churapxam —sasa.

26Jakaskir wawan taykapasti walpun wawapatjam llakisïna, ukat reyir achikt'asïna:

—¡Reyixay! ¡Janikiy aka wawar jiwayamti! ¡Aka warmiruk jakaskir wawa churxam! —sasa.

Ukampis maynïr warmix sänwa:

—Jan nayatakïkpati, janirak jumatakïkpansa. ¡Payar kharjapxpan! —sasa.

27Ukxaruw reyix arsüna:

—Jan wawar jiwayapxamti. Wawan jan jiwañap munki uka warmir jakaskir wawa churxapxam. Jupaw chiqpach taykapaxa —sasa.

28Ukatsti Israel markpachaw reyin ukham chiqapar uñjatap yatïna. Ukatsti Salomón reyirux axsartañampiw jaqinakax uñjapxäna, Diosan jupar uka yatiñ kankañ chiqapar uñjañataki churatap layku.