1 SAMUEL 10 - Qullan Arunaka DC

Samuel profetax Saúl waynarux Israelan reyipäñapatakiw utt'ayi

1Ukhamasti Samuel profetax aceiten wayucha katusinxa, Saúl waynan p'iqipxaruw warxatäna, jamp'att'asinsti sarakïnwa:

—Tatituw jichhürux Israel markan apnaqiripat jumar ajllistam. Jumaw jupanakar apnaqäta, uñisirinakapan amparapatsa qhispiyarakïta. Tatitun jumaru Israel markap apnaqañamatak ajllisitapax akhamat yatisini:

2Jichhax akat sarxasinsti, Raquelan imäwip jak'an pani chachar jikxatäta, Selsah chiqana, Benjamín ayllun uraqipana. Jupanakasti sapxätamwa: “Qachu asnonak thaqhir sarktas ukanakax uñstxiwa, awkimasti janiw qachu asnonakat llakiskxiti, jan ukasti jumanakat llakisxi, jupax siwa: ¿kunarak wawaxar jikxatañatak luririststi?” sasa.

3Juk'amp sarkasinsti, Tabor quqa chiqar purkät ukkhasti, kimsa chachanakaw jumar jikxatir mistunipxani, jupanakasti Betel markaruw Diosar yupaychiri makhatasipkani. Maynix kimsa cabrito irpt'ata, maynisti kimsa t'ant'a apt'ata, maynïristi mä lip'ichi wayaqaru vino apt'ataraki.

4Jupanakasti aruntapxätamwa, ukatsti pä t'ant'a churapxätam, jumasti uk katuqasïtawa.

5Uka chiqatsti Diosan uraqipa Guibeá chiqaruw purirakïta, uka chiqansti filisteo soldadonakaw ukankaski. Ukatsti markar mantkasin mä tama profetanakampiw jikisïta, jupanakasti jutir urunakan luraskani ukanak arsusaw qullan chiqawjat saraqasinipkani. Jupanak nayräxapsti walja jaqinakaw saraskarakini guitarranaka, panderonaka, pinkillunaka, arpanaka toct'asisa.

6Ukapachaw Tatitun ajayupax jumxaru jutani, jupanakamp chikaw profecía arunak arsüta, yaqha jaqiruw tukurakïta.

7Kunapachatix taqi ukanakax jumamp luraskani ukkhasti, kunatix amuyatamat walïki uk luraskakim, Tatituw yanapt'arakïtam.

8Jichhasti Guilgal chiqar nayraqat sarkam, ukan nayax jumampi jikisï nakt'ayat waxt'äwinaka, sumankthapiñ wilañchanak luqtañataki. Nayan puriniñaxkamasti paqallqu uruw ukan suyäta, ukapachaw nayax jumar kuntix lurañamäki uk saskäma —sasa.

9Samuelun ukat sarxipansti, Diosax jank'akiw Saúl waynan chuymap mayjt'ayäna; ukürpacharakiw kuntix Samuelux siskatayna uka uñacht'äwinakax phuqhasïna.

10Ukatsti Saúl waynampi uywatapampix Guibeá chiqar puripkäna ukkhaxa, mä tama profetanakaw jupanakar jikxatir mistunïna. Ukapachasti Diosan ajayupaw Saúl waynxarux jutäna, jupasti uka profetanakjamarakiw parläna.

11Ukampisa khitinakatix Saúl waynar nayratpach uñt'apkäna ukanakasti, profetanakjam parlir ist'asin jupanakkamaw jiskt'asipxäna: “¿Kunarak Quis chachan yuqapar kamachpachasti? ¿Saúl waynax profetäxarakichä?” sasa.

12Ukat ukankirinakat maynix sarakïna: “¿Khitirak jupanakan awkipasti?” Ukatpï säwix utjixa: “¿Saúl waynax mä profetarakichä?” sasa.

13Profetjam parlaña tukuyasasti, Saúl waynax utaparuw purxäna.

14Ukansti tiopax jupampiru, uywatapampiruw jiskt'i:

—¿Kawkirus sarapxta? —sasa.

Saúl waynasti sarakïnwa:

—Qachu asnonak thaqhiriw sarapxta. Ukampis jan uñstkxipan Samuelur jikxatiriw sarapxta —sasa.

15Tiopasti ukxarux sarakïnwa:

—¿Kamsapxaraktam Samuelusti? Yatiyapxitaya —sasa.

16Saúl waynasti tioparux sarakïnwa:

—Qachu asnonakax uñstxiw sapxituwa —sasa.

Ukampisa Saúl waynax janiw kuntix reyïña tuqit Samuelux parlkatayna ukanak jupar arskänti.

17Ukxarusti Samuelux israelitanakaruw Mispá chiqan Tatitur yupaychañatak jawsthapïna;

18ukansti jupanakarux sarakïnwa:

—Israelan Tatitu Diosapax akham siwa: ‘Nayaw jumanak israelitanakarux Egipto markat irpsunipxsma, egiptonkirinakan amparapat qhispiyanipxsma, jumanakar t'aqhisiyir markanakan amparapat antutayanipxsma’ sasa.

19Ukampis jichhax jumanakax Diosamarux jisk'achapxtawa, jupaw taqi jan walt'añanakatsa, llakisiñanakatsa qhispiyanipxtam, mä rey jumanakar apnaqañapataki mayisasti Diosaruw apanukupxtaxa. Uka layku, jichhax Tatitun nayraqatapar uñstapxam, ayllunakatkama, wila masi tamanakatkama —sasa.

20Ukatsti Samuelux Israelan taqpach ayllunakaparuw jak'achasipxañapatak mayïna, suertesti Benjamín aylluruw wakt'äna.

21Uka qhipatsti Benjamín aylluruw jak'achasiñapatak mayïna, suertesti Matrí siski ukan wila masiparuw wakt'äna, ukatsti Quis chachan Saúl yuqapaw suerte tuqit ajllit uñjasïna. Ukampis jupar thaqtasax janiw jikxatapkänti,

22ukat Tatiturux wasitat jiskt'apxäna, Saúl waynax ukankaskpachati janicha uk yatiñataki. Tatitusti Saúl waynan q'ipinak manqhan imantatäskatap uñacht'ayäna.

23Ukatsti kawkhantix imantasitäkän ukkhat irpsuriw jalapxäna. Kunapachatix Saúl waynax marka nayraqatan uñstkän ukkhaxa, taqiniw uñkatapxäna, jach'a tansätap laykux israelitanakax janiw maynis kallachipkam purkänti.

24Samuelux taqiniruw jiskt'äna:

—¿Jichhax kawkïrirutix Tatitux reyit ajlliski ukarux uñkatapxtati? ¡Janiw mä israelitas jupjamax utjkiti! —sasa.

Israelitanakasti jach'at art'apxarakïna.

—¡Jallalla reyi! —sasa.

25Ukspachaw Samuelux kuna kamachinaktix reyix phuqhañapäki ukanak yatiyäna, qillqt'asinsti Tatitun qullan utaparuw imxäna. Ukatsti Samuelux taqpach jaqinakaruw utanakapar khithanukxäna.

26Saúl chachax Guibeá chiqankki uka utaparuw kuttxarakïna, Diosasti mä qawqha wali ch'amani chachanakaruw Saúl chachan qhipap sarapxañapatak mayïna.

27Ukampis jan wali parliri jaqinakax utjapunïnwa, jupanakasti sapxarakïnwa: “¿Jupat qhispiypachïstani?” sasa. Juparux wal jisk'achapxäna, janirakiw reyirjamas yäqapkänti; ukampis Saulux jan ist'iriw tuküna.