DANIEL 3 - Qullan Arunaka DC

Qurit lurat diosaruw yupaychapxi

1Nabucodonosor reyix quritkamak mä jach'a dios lurayäna, ukasti alayarux kimsa tunka metronïnwa, iramarusti kimsa metroniraki, uksti Babiloniankir Dura sat pamparuw uchayäna.

2Ukatsti jawsayanïnwa, markanak apnaqirinakaru, ejerciton jilïrinakaparu, suyunak apnaqirinakaru, amuyt'ayirinakaru, qullqi katurinakaru, taripirinakaru, suyunakat taqi jach'a jilïrinakaru; jupax luraykatayna uka diosan luqtäwipan unkankapxañapataki.

3Taqi uka jilïri jaqinakasti uka yaqha dios nayraqatan tantacht'asipxäna, luqtäwip uruyañataki.

4Uka luräwinaka qalltayiristi jach'at art'äna akham sasa: “Ist'apxam, taqi markanakankir jaqinaka, jach'a markankir jaqinaka, kunayman aru parliri jaqinaka:

5Kunapachatix jumanakax trompetan phust'asitap ist'apxäta, ukhamaraki citarana, pinkilluna, lirana, salteriona, yaqhanakampin toct'asitanakap ist'apxäta ukapachaxa, taqiniw qunqurt'asipxäta, yupaychapxarakïta, Nabucodonosor reyix qurit luraykatayna uka dios nayräxana.

6Khititix aka dios nayraqataru jan killt'askani, janirak ukar yupaychkani ukasti, ukspachaw mä aqkir hornor jaquntatäni” sasa.

7Ukhamawa, uka chiqan tantachasit jaqinakax toct'asitanak ist'asaxa, taqiniw uka qurit lurat dios nayraqatar killt'asipxäna, ukar yupaychapxarakïna.

8Ukampis mayni caldeo jaqinakax, Nabucodonosor reyi nayraqatan judionakar aynacht'ayañatakiw amtapxäna,

9ukat sapxäna:

—¡Munañan rey, wiñayatak jakam, sutimasti wiñay amtatarakïpan!

10Jach'a munañan rey, jumax mä kamachi mistuytaxa, q'uchuñ instrumentonakan toct'asitap ist'asin, taqi jaqinakan qurit lurat dios nayraqatar killt'asiñapataki,

11khititix jan uka dios nayraqatan killt'askani ukasti mä aqkir hornor jaquntatäñapataki.

12Ukampis mayni judionakaw utji, khitinakarutix juma reyix utt'aykta Babilonia suyu apnaqapxañapataki, jupanakax janiw juma munañan reyirux axsarapktamti, janiw diosanakamar yupaychapkiti, juma reyix qurit luraykta uka diosan nayraqataparus killt'asipkiti. Ukanakasti: Sadrac, Mesac, Abed-nego uka waynanakawa —sasa.

13Nabucodonosor reyisti ukanak ist'asax chuymap wal mayjt'ayasïna, ukatsti Sadrac, Mesac, Abed-nego waynanakar jupan nayraqataparuw irptayanïna. Ukatsti nayraqatapankapkän ukapachasti,

14reyix jupanakar jiskt'änwa:

—¿Chiqapunit jumanakasti diosanakaxampiru, qurit luraykta uka diosarusa jan yupaychapktasti?

15Jichhasti jumanakax musican toct'asitap ist'asin, killt'asipxäta, nayax luraykta uka dios nayraqatan yupaychapxarakïta. Jumanakatix jan yupaychapkätaxa, jichhpachaw mä aqkir hornor jaquntayapxäma, ¿khiti diosarak ukat qhispiyapxiristamsti? —sasa.

16Uka kimsa waynanakasti sapxarakïnwa:

—Janiw wakiskiti nanakan jumamp jaychasiñaxa.

17Nanakan Diosaxasti, khitirutix nanakax yupaychapkta ukaxa, uka aqkiri ninatsa jark'aqasipkakitaniwa, kuna jan walinaktix juma reyix lurañ munapkista ukanakat qhispiyapxitaniwa.

18Ukampis jan qhispiyapkitani ukasa, juma jach'a reyix yatiñamawa, janipuniw nanakax diosanakamar yupaychapkäti, janirakiw qurit lurat uka dios nayraqatansa killt'asipkäti —sasa.

Kimsa waynanakax nina hornot qhispitäpxiwa

19Nabucodonosor reyisti uka arunak ist'asax chuymap mayjt'ayasïna, ajanupas wilaw tukurakïna uka kimsa waynanakatak q'apisisaxa. Ukatsti horno junt'uchayäna, junt'uchañäki ukatsa paqallq kutimpi;

20ukatsti ejercitopan utjir wali ch'amani soldadonakaruw mayirakïna Sadrac, Mesac, Abed-nego waynanakar ñach'antapxañapataki, ukat uka nina lawrkir hornor jaquntapxañapataki.

21Uka kimsa waynanakasti, jilïr kankañ isipan isthapitpacha ñach'antataw uñjasipxäna, ukat nina lawrkir hornor jaquntapxarakïna.

22Reyin arsutaparjamasti, ukspach phuqhasiñapatakix, hornox walpun aqaskäna, uka nina lawrasti, kimsa waynanakaru ñach'antiri soldadonakaruw nakhantasin jiwarayäna,

23uka kimsa waynanakasti nakhaskir horno manqharux ñach'antataw jaquranttapxäna.

24Ukhamasti Nabucodonosor reyix jank'akiw sartasïna, wali muspharatarakiw yanapirinakapar säna:

—¿Janit kimsaniru ñach'antat jaquntktansti? —sasa.

Yanapirinakapax sapxarakïnwa:

—Ukhamapunïskiwa —sasa.

25Reyisti sarakïnwa:

—Nayax pusi jaqinak jararat uñjta, jupanakasti nina taypin sarnaqasipki, ninasti janirakiw jupanakarux kuns kamachkiti, jupanakat pusïri waynäki ukasti mä angelar uñtatawa —sasa.

26Ukham sasinsti, Nabucodonosor reyix horno punkur jak'achasisin art'äna:

—¡Sadrac, Mesac, Abed-nego, alaxpach Diosan luqtirinakapa, mistunxapxam, akar jutapxam! —sasa.

Uka kimsa waynanakasti nina lawra taypit mistunxapxäna.

27Ukatsti marka apnaqir jilïrinakax uka kimsa waynanakar uñjañatakiw jak'achasipxäna, uka waynanakan janchipasti janiw ninamp jak'atäkänti, janirakiw ñik'utapas nakharatäkänti, isinakapas nakhantatäkänti, janirakiw nina ninas q'aphipkänti.

28Ukapachaw Nabucodonosor reyix jach'at arsüna: “¡Sadrac, Mesac, Abed-nego waynanakan Diosapax jach'añchatäpan, jupaw angelap khithani arkirinakapar qhispiyiri, jupanakax janiw nayan arsutaxsa phuqhañ munapkänti, yaqha diosanak nayraqatan killt'asiñat sipansa, jiwañatakis jank'akïpxänwa, Tatituparukiw yupaychapxäna!

29Jichhasti nayax arstwa, khiti jaqitix aka waynanakan Diosap tuqi jan wali arunak parlkani ukax kharinuqatäpan, utapasa mayjaru t'unthapitarakïpan, khitïskpasa, kawki markankirïskpasa, kuna arut parlasirïskpasa; ukham qhispiyir yaqha diosax janiw utjkiti” sasa.

30Uka qhipatsti, reyix uka kimsa waynanakarux Babilonia suyun apnaqäwinakapan, wali jach'a jilïrinakat utt'ayäna.