ÉXODO 26 - Qullan Arunaka DC

Tatitump Jikisiñ Carpa lurañxata(Ex 36.8-38)

1“Tatitump Jikisiñ Carpxa, lino k'anthitat tunka cortinani luräta, morado telata, sajuna telata, wila telampita; ukarusti querubines sat chhiqhaninak jiwaki p'itakipäta.

2Uka cortinanakax pachpa tupunikïñapawa: sayt'urux tunka payan metro chikatani, iranarusti pä metroni.

3Phisqa cortinanak mayarukiw ch'ukthapïta, chikat phisqa cortinanaksa pachparak ch'ukthapïta,

4ukatsti nayrïr phisqa cortinanakan thiyanakaparux morado ch'ankhat ojalanak uchäta, uka qhipa phisqa cortinanakan thiyanakaparus ukhamarak uchäta.

5Nayrïr phisqa cortinanakaru, qhipïr phisqa cortinanakarusa, phisqa tunka ojalanak luräta, ukhamat mayax mayampi suma janthaptañapataki.

6Cortinanak t'irthapiñatakisti phisqa tunka t'iriñanak qurit lurarakïta, ukhamat Tatitump Jikisiñ Carpan mayakïñapataki.

7“Ukxarusti Tatitump Jikisiñ Carpxar janxatañatakix, cabra t'awrat tunka mayan cortinanak lurarakïta.

8Taqi uka cortinanakan tupupax mayakïñapawa: sayt'urux kimsa metro chikatani, iranarusti pä metroni.

9Ukatsti phisqa cortinanak yaqhak ch'ukthapïta, ukxar suxtäki uksti, yaqharak ch'ukthapïta, suxtïr cortinäki uksti Tatitump Jikisiñ Carpa imxatatäki uka nayräxaruw llawuntäta.

10Ukatsti phisqa tunka ojalanak nayrïr phisqa ch'ukthapit cortinanakan thiyanakapar lurarakïta, qhipa suxta cortinanak ch'ukthapkta ukatakisa.

11Ukxarusti phisqa tunka t'iriñanak broncet lurarakïta ukatsti ukampiw ojalanakat t'irthapïta, uka carpan mayakïñapataki.

12Carpan janxatatäki uka cortinanakan juk'amp jach'ätapatxa, chikatpachaw qhipäxar warkuqtani.

13Ukhamat Tatitump Jikisiñ Carpax imxatatäni, jilt'ki ukampi purap thiyar warkuqtaniñapataki; pusi tunka phisqan centimetroni sapa thiyana.

14“Uka carpa patxar imxatañatakix wilar samichata oveja lip'ichinakat luräta, uka patxar uchañatakisti wali suma lip'ichinakat lurarakïta.

15“Tatitump Jikisiñ Carpatakix acacia lawat suma tablanak luräta, uksti chiqak sayt'ayäta.

16Uka tablanakasti sayt'urux pusi metro chikatanïñapawa, iranarusti suxta tunka phisqan centimetroni.

17Sapa tablasti pä achuntañanïñapawa, taqpach tabla purapat achuntayasin jan unxtañapataki, ukhamwa Tatitump Jikisiñ Carpatakix taqpach tablanak luräta.

18Ukanak lurkät ukkhasti, aynach tuqitakix pä tunka tablanak luräta,

19uka tablanakan katxäsiñapatakisti qullqit lurat pusi tunka takxäsirinak uchäta. Sapa tablan achuntañapatakix pä takxäsirinïñapawa.

20“Amsta tuqitakisti, pä tunka tablanak luräta

21qullqit lurat pusi tunka takxäsirinakapampi, sapa maya tabla kayun pä takxäsirinak utjañapataki.

22Uka kipkaraki inti jalanta tuqirusti carpa qhipäxarux suxta tablanak ucharakïta,

23ukxarusti pä tablampi, qhipäx pä esquinanakataki.

24Uka tablanakasti payat payat aythapitäñapawa, ukanakasti amsta tuqit nayrïr argolläkis ukakam mayachatäñapawa. Uka kipkarak paypach tablampix pä esquinatak luräta.

25Ukhamasti kimsaqallqu tablanakaw utjani, qullqit lurat tunka suxtan takxäsirinakapampi, sapa tablatakix pä takxäsirinaka.

26“Ukxarusti carpan maysa thiyankir tablanakatakix acacia lawat tunka phisqan muruq'u lawanak luräta,

27maysa thiya tablanakatakisti phisqa muruq'u lawanaka, qhipäxatakisti phisqa muruq'u lawanak lurarakïta.

28Chikachikankir muruq'u lawax tablanak taypi mistuñapawa, maysa thiyat qalltasa maysa thiykama.

29Ukxarusti sapa muruq'u lawanakaru, sapa tablanakarux qurimpiw lip'ikipayäta, tablanakarusti qurit lurat argollanak uchäta, uka chiqa muruq'u lawanakan maysat maysa mistuñapataki.

30Ukhamasti, Tatitumpi Jikisiñ Carpxa kunjämtix qullun uñacht'ayksma uka kipkak luräta.

31“Ukxarusti morado telat mä cortina luräta, sajuna telata, wila telata, suma lino k'anthitata, uka cortinxarusti pä chhiqhaninak sum p'itakipayäta.

32Ukatsti, qurit lurat t'iriñanakamp chhitharasaw acacia lawat lurat pusi sayirinakar warkt'äta. Uka sayirinakasti qurimpi lip'ikipatäñapawa, qullqit lurat pusi takxäsirinakxar uchatäñapawa.

33Ukat uka cortinxa t'iriñanakampiw warkt'äta, ukatsti uka qhipäxarux arust'äwi lurat arca uchäta. Ukhamat uka cortinax jumanakatak Qullan Chiqawjampi, Qullanansa Qullanap Chiqawjamp jaljani.

34Ukxarusti, Qullanansa Qullanap chiqawjankki uka arust'äwi arcarux qhuphiñ uchäta.

35Ukatsti t'ant'a uchañ mesxa Qullan Chiqawjaruw uchäta, uka uñkatasiruw candelero ucharakïta.

36“Tatitumpi Jikisiñ Carpar mantañatakisti mä cortina luräta, morado telata, wila telata, sajuna telata, lino k'anthitata, wali suma p'itakipatarak luräta.

37Ukxarusti uka cortinatakix acacia lawat phisqa sayirinak luräta, uka lawanaksti qurimpiw lip'suyarakïta, qurit lurat t'iriñanakapampi, uka sayirinak achuntayañatakisti bronce umatatayasaw takxäsirinakap luräta.