1Tatitux siwa:
“Babilonia markatakix
nayaw mä t'unjir thaya apayanï.
2Babilonia markarusti, uñisirinakapampix
kunjämatix trigox thayampi thalsutaxa
ukhamarak thalsuyä,
uraqipsti jan mä jaqin jaytarakï.
Aynacht'añ urupax purinkani ukapachasti,
taqi tuqit juparux muyuntapxani.
3¡Babilonio soldadonakasti
nuwasiñatakix wakicht'atäpxiwa,
ukampis jumanakax janiw
nuwasiñ isip uchasiñapsa munapxañamäkiti.
Jan ukasti, ¡waynanakarux jiwarayapxam!,
¡soldadonakaparus q'al tukjapxam!
4Babilonia marka thakhinakansti
jiwatanakax liwirtat jikxatasipxpan.
5Israel markampi, Judá markampix
taqiniw naya nayraqatan juchañchjasipxi,
markanakapsa juchampiw phuqhantapxi,
ukampis naya, taqi ch'amani Tatitu,
Israelan Qullan Diosapaxa,
janiw jupanakarux apanukkti.
6“¡Babilonia markat jaltxapxam!
¡Qhispiñ munirix qhisppan!
¡Jan jupan juchap laykux jiwapxamti!
Jupanakat phuqsusiñ uruw purinxi,
luratanakaparjamaw churarakï.
7Babilonia markasti nayan amparaxanxa
quri tilinkir uñtatänwa,
taqi aka uraqpacharuw umjayarakïna.
Markanakasti vinopat umantasaxa,
q'al machjasipxäna.
8Ukampis akatjamat
Babiloniax jisk'a jisk'a t'unjat uñjasi.
¡Jichhax jupatjam jachapxam!
Qullanak chhuxrinakapatak apanipxam,
inach qullasini.”
9Babiloniarux qullanakampi qullt'atäxiwa,
ukampis janiw qullaskiti.
¡Pachpar apanukupxam!
Markasarkam sapa mayni sarxarakiñäni,
Babilonian jucha luratanakapasti
alaxpachkamaw puri,
qinayanakatsa juk'ampi alayaru.
10Tatituw jiwasarux chiqapar uñjistu.
Jichhax Jerusalenar sarxapxañäni,
kuntix Tatitusax jiwasanakatak lurki
ukanak yatiyaniñäni.
11Tatitux Babilonia markaruw t'unjañ muni,
Media uraqinkir reyinakan chuymaparusti
uka pachpa t'unjañ amtäwinak uskuraki.
Ukaw Tatitun phuqsusïwipaxa,
jupan utapar kuntix lurapki ukanakata.
¡Jichhax mich'inakam wakicht'asipxam!
¡Jark'aqasiñanakamsa sum katxarupxam!
12¡Nuwantañatak yatiyapxam!
¡Babilonia markan pirqanakap liwinukupxam!
¡Uñjirinaksti yapxatapxam!
¡Imantasisin babilonionakar suyxatapxam!
¡Sipitar jalt'ayapxarakim!
Nayätwa Israelan Diosapaxa,
Babilonia markar lurañ amtataxsti phuqhapunïwa.
13Jumasti Babilonia,
jach'a jawiranak thiyankir marka,
qamir yänakamas walipuniwa,
¡ukampis tukusiñamax purinxiwa,
jiwañam pachas purinxiwa!
14Taqi ch'amani Tatitusti,
jakañap laykuw juramentompi arsu:
“¡Uñisirinakamampisti
t'iju t'iju laq'unakampjamaw phuqhantäma,
jupanakasti jumar atipjasinxa
jach'at arnaqasipxani!”
Tatitur yupaychañ q'uchu(Jer 10.12-16)15Tatitux ch'amapampiw aka uraqi luri;
yatiñ kankañapampiw aka uraqi sayt'ayi;
ch'ikhi kankañapampiw alaxpachsa janatati.
16Jach'a arupampiw
alaxpachanak wal qhuthutiyi,
qinayanakarusti jayanakat sarthapiyani,
jach'a lliju llijunak taypina,
jach'a thayanak sartayasin
Tatitux jallu purintayi.
17Taqi jaqinakas pisi chuymäpxiwa,
jan amuyt'asirinakawa;
idolonakasti luririnakapatakix mä p'inqawa.
Inamaya uñtasit luratanakakiwa,
janirakiw jakañanïpkisa;
18jan kunatak inamay yänakakiwa,
Tatitusti taripäwipanxa
ukanak q'al t'unjarakini.
19¡Ukatsipan kunja jach'as Israelan Diosapaxa,
jupaw taqi kunatix utjki ukanaksa luri!
Juparakiw Israelarux jupatak ajllisi;
Taqi Ch'amani Tatitu satarakiwa.
Tatitux Babiloniampiw yaqha markanakar mutuyi20“¡Babilonia, jumax nayatak
mä jach'a martilljamätawa,
nuwasïwin nuwasiñatak yänakjamätawa.
Jumampiw markanaksa,
marka apnaqäwinaksa t'unjarakta.
21Jumampiw caballonaksa, jaqinakapsa,
nuwasiñ carronaksa t'unjarakta.
22Jumampiw chachanaksa, warminaksa,
chuyman jaqinaksa, waynanaksa,
yuqall wawanaksa,
imill wawanaksa t'unjarakta.
23Jumampiw awatirinaksa,
tamanakapsa t'unjarakta,
yapuchirinaksa, yuntanakapsa,
marka apnaqirinaksa, jilïrinaksa q'al t'unjarakta.
Babilonian mutuyäwipa24“Judá markankirinaka, jumanakan uñjkataw
Babilonia markarusa, ukan jakirinakarusa,
kunjämatix jupanakar churañax wakiski
ukhamarjam churarakï,
Jerusalenar ñanqhanak lurapxatapata.
Naya, Tatituw uk arsta.
25T'unjir qullu, nayax jumatakiw sayt'ta,
jumasti taqi aka uraqpacharuw t'unjtaxa.
Naya, Tatituw uk arsta.
Jichhax jumar mutuyañatakiw amparax aytä,
qarqa parkinakatpach jumarux qurumt'ayanïma,
mä nakhantat qulluruw tukuyäma.
26T'unjat markamansti, janipuniw mä qalasa
wasitat pirqañatakix sumäkxaniti.
Wiñayatak ch'usa wasarar tukuyataw uñjasïta.
Naya, Tatituw uk arsta.
27“¡Markansti nuwantañatak yatiyapxam!
¡Trompetanak phust'apxam,
markanakarus wakicht'apxarakim,
Babiloniar nuwantapxañapataki!
¡Ararat, Miní, Askenaz uka markanakax
Babiloniar nuwantapxpan!
¡Nuwasïwi sarayiritakisti
mä jilïri chhijllt'asipxam!
¡Caballeriarusti wali qhuru t'iju t'ijunakarjam
nayraqatar ant'apxam!
28Markanakarusti nuwantañapatak wakicht'apxam;
Media uraqinkir reyinakarusa,
marka apnaqirinakaparusa, jilïrinakaparusa,
jupanakan apnaqat taqi uraqinakarus wakicht'apxarakim
Babiloniar nuwantapxañapataki.”
29Aka uraqix khathatiwa, axsarthapirakiwa,
Tatitun amtatanakapaw phuqhasiski,
Babiloniarux mä axtaskañ wasararuw tukuyaraki.
30Babilonia soldadonakasti nuwasiñ suyt'xapxiwa;
pachpa pirqanakapanak sayarxapxi;
ch'amanakapasti pist'atäxarakiwa,
warmïkaspas ukhamakïxapxarakïnwa.
Markanakapasti uñisirinakan phuqhantatawa,
utanakapas ninampi nakhantayatarakiwa.
31Yatiyirinakasti mayni mayniw
Babilonian reyipan ukar sarapxi,
markapan q'ala katuntatätapat yatiyiri.
32Uñisirinakasti jawir makhatañanaksa
q'al katuntapxi,
sayt'asiñ chiqanaksa ninampiw nakhantayapxi,
soldadonakasti axsarañat
wal khathatipxaraki.
33Taqi ch'amani Tatitu,
Israelan Diosapax akham siwa:
“¡Babilonia markax
ch'usa wasarar tukuyatawa,
ninampi naksuyat uraqjamawa.
¡Tukjatäñap pachax niyaw purinxi!” sasa.
34-35Jerusalén markasti sarakiwa:
“Babiloniankir Nabucodonosor reyix
jisk'a jisk'a tukjasaw manq'antitu;
ch'usa chuwar uñtat jaytarakitu.
Jach'a qutankir jach'a laq'ur uñtataw manq'antitu;
nayan suma manq'anakaxampiw sist'asi,
ukat jilt'irsti liwtxarakiwa.
¡Babiloniax nayar jan wal luratapat jichhax yatpan!
¡Caldeo jaqinakasti, nayan jaqinakax jiwarayatapat
kunatix katuqañapäki uk katuqpan!”
Israel markatak suma arunaka36Tatitux siwa:
“Nayaw jumarux chiqapar uñjäma,
uñisirinakamatsti phuqsusirakïwa.
Babiloniankir jawiranaksa,
uma phuch'unaksa q'al wañsuyarakïxa,
37t'unjata, mayawjar qulluchthapitaw qhiparani,
qamaqinakan putunakapar tukuyatäniwa,
jaqinsa jan mayampi jak'kañar tukuyatäniwa,
taqinirus mulljaskañaru, axsarthapiyañar tukuyatäniwa.
38Taqi jupanakasti leonanakjamaw wararipxani,
león qallunakjamaw uxupxarakini.
39Janchipan wali junt'jatäpxani ukkhasti,
nayaw machjayir umanak churä,
ukasti jupanakarux p'iqi muytayani.
Ukhamat jupanakax jiwatjam ikirapxani,
janirakiw mayampis sartkxapxaniti.
Naya, Tatituw uk arsta.
40Ukatsti jupanakarux jiwarayañ chiqaruw anakï,
kunjämatix ovejanaka, chivonaka,
urqu ovejanakas kharitäñatak anakitax ukhama.”
Babilonian aynacht'atapa41¡Babilonia jach'a marka,
aka uraqpachan uñt'at marka,
jichhax aynacht'iwa, katuntatarakiwa!
¡Jupar uñjasasti markanakax walpun mulljasipxi!
42Jach'a qutasti Babiloniarux q'al chhaqtayi,
jach'a mathapinakapampiw chhaqtayi.
43Markanakapasti axsarkañ
ch'usa wasarar tukuyatawa,
waña, llakiskañ uraqir tukuyatawa,
janiw ukan mä jaqis jakkiti,
janiw khitis uka chiqa sarakipkarakiti.
44“Babilonia chiqan
Bel sat diosarux mutuyarakï,
kuntix manq'antkatayna uksa waq'aqsuyäwa,
markanakasti janirakiw jupar yupaychirix jutkxapxaniti.
¡Babilonian pirqanakapax liwirtxiwa!
45Nayan markaxa, uka taypit mistunxam,
sapa maynis jakañap qhispiyaspan
nayan aqkir phiñasiñaxatxa!
46Markan ist'aski uka arunakatxa,
jan mulljasipxamti, janirak axsarapxamsa.
Sapa maraw ukham arunakax parlasini,
nuwasiñ tuqit arunakaw ist'asini,
markanak apnaqirinakas
jupanakkamaw ch'axwapxani.
47Ukhamapï Babiloniankir idolonakar
mutuyañ urux jutanixa.
Taqi aka markpachaw jisk'achjat uñjasini,
jaqi jiwaratanakampi phuqhantatarakïniwa.
48Alaxpachasa, akapachasa,
taqi kunanakatix utjki ukanakasa,
Babilonian aynacht'atapat walpun kusisipxani,
amsta tuqit t'unjiripax jutkani ukapachaxa.
Naya, Tatituw uk arsta.
49Jïsa, Babiloniax aynacht'aniwa,
Israel markan jaqinakar jiwarayatapata,
taqi aka uraqpachan jaqinakar jiwarayatapata.”Babiloniankir judionakataki yatiyäwinaka
50Jumanaka,
jiwayatäñat qhispinirinaka,
jan sayt'as jaltxapxam,
jayankkasasa, Tatitut amtasipxapunim,
Jerusalén markatsa amtasipxarakim.
51Jumanakasti sapxaraktawa:
“Jan wali arunakampi jisk'achapkitu,
ukanak ist'asax p'inqasipxtwa.
P'inqasiñaw ajanunakaxsa imantaraki,
jaya markankir jaqinakaw mantapxi,
Tatitun utapan qullan chiqanakkama, uka layku.”
52Ukampis Tatitux siwa:
“Babiloniankir idolonakar
mutuyañ urux jak'achasisinkiwa,
usuchjatanakax taqi uraqpachan wararipxani.
53Babilonia markax
jach'a ch'amapa jach'ar aptañatakixa,
alaxpachkamas makhataskpan,
ukarusa jupanakar t'unjirix
uñisirinakap khithaskakïwa.
Naya, Tatituw uk arsta.”
Babilonian t'unjatätapa54Babiloniatpach t'aqhisiñat wararitanakax ist'asi,
caldeonakan uraqipatpach wararitanakax ist'asi.
55Tatituw Babiloniarux t'unjaski,
ch'axwataparus amukt'ayarakiwa.
Uñisirinakasti jach'a quta mathapinakjamaw
jupanakxarux wali ch'amampi purirakini.
56Babiloniar t'unjiriw jutapxi;
nuwasir jaqinakaparusti katurxapxarakiwa,
mich'inak antutt'añanakapsa jisk'a jisk'a tukjapxi.
Tatitusti chiqap Diosawa,
sapa maynirus wakisitaparjamaw churaraki.
57Reyi, taqi ch'amani Tatitusti siwa:
“Babiloniankir jilïrinakarux machjayäwa,
yatiñani jaqinakaparusa,
marka apnaqirinakaparusa, jilïrinakaparusa,
soldadonakaparusa, q'al machjayä,
jiwatjamaw ikirapxani,
janirakiw mayampsa uka ikit sartkxapxaniti.
58Taqi ch'amani Tatitux akham siwa:
“Babilonian uka thuru pirqanakapasti
q'ala tinkuyatäniwa,
uka jach'a punkunakapas
ninampi nakhantayatäniwa.
Inamayakiw markanakan ch'ama tukutapasa,
taqi luratanakapax ninan tukusirakini.”
Jeremiasan qillqatap Babiloniaruw apapxi59Sedequías reyix pusi mara Judá uraqi apnaqkän ukapachaw, Jeremías profetax Nerías sat jaqin Seraías yuqapar mä iwxa churäna, Maasías sat jaqin allchhiparu. Seraiasasti Sedequiasampi chikt'ataw Babilonia markar saräna, jupasti reyin qurpachasiñapatak wakichirïnwa.
60Jeremías profetasti kuna jan walt'añanakatix Babilonia markxar jutkani ukanakatxa, taqpach qillsutayna,
61ukat Seraías chacharux sarakïna: “Babiloniar purkäta ukkhasti, wali jach'at aka arunak ullaräta.
62Tukuyasinsti sarakïtawa: ‘Tatay, jumax aka chiqxa t'unjäwa sistawa, ukhamat aka chiqan jan khitis juk'ampi jakxañapataki, jaqinakasa, uywanakasa jan jakxañapataki, jumax aka chiqxa, ch'usa wasararuw wiñayatak tukuyätaxa’ sasa.
63Ukat aka qillqata, mä qalampi chinuntasin Éufrates jawirar jaquntäta,
64ukatsti sarakïtawa: ‘Akhamaw Babiloniax jalaranttani, kuna aynacht'äwtix Tatitux apayankani ukat janirakiw mayampis sartkxaniti’ ” sasa.
Akawjaruw Jeremías profetan arunakapax tukuyi.
Who We AreWhat We EelieveWhat We Do
2025 by iamachristian.org,Inc All rights reserved.
