1 PEDRO 3 - Qullan Arunaka DC

Chacha warmi sarnaqañxata

1Chachan warminaka, chachanakamar ist'as sarnaqapxam, ukhamata, kawknïr chachatix Tatitur jan iyawskchi ukax, jumanakan sarnaqäwinakam tuqi Tatitutak jikxatatäñapataki,

2jan kuna arumpiki, jan ukasti jumanakan sum sarnaqatam uñjasaki.

3Jumanakan k'achachasiñanakamax jan patxakïkpati, ñik'utanak k'achachasiñanakampi, quri yänakampi, wali jila alan isinakampisa,

4jan ukasti suma chuymanïpxam, ukaw jan tukuskiri, suma munkañaxa. Dios nayraqatansti ukax wali askiwa.

5Nayra pachanakanxa, Diosar axsartir warminakax ukham k'achacht'asipxäna. Jupanakax Diosaruw iyawsapxäna, chachanakaparus ist'apxarakïnwa.

6Sara warmix ukham ist'asirïnwa, Abraham chachaparux “tatay” sarakïnwa. Jumanakatix ukham ask lurapxätaxa, janirak kunarus axsarapkäta ukaxa, Sara warmjamäpxätawa.

7Chachanakasti warminakamampix suma chuymanïpxam. Kunjämarutix wakiski ukhamar jupanakar jach'ar aptapxam, jupanakax janiw jumanakjam wali ch'amanïpkiti, ukampis Tatitux wiñay jakañ churarakini. Jumanakatix ukham lurapxätaxa, Tatitux mayisitanakam ist'apuniniwa.

Cristor arkirinakan phuqhañanakapa

8Ukhamasti jumanakax jumanakkam munasisa, suman sarnaqas jakapxam. Khuyapayasirïpxam, llamp'u chuymanïpxarakim.

9Ñanqhat ñanqha jan kutt'ayapxamti, jan wali arutsa jan pachpa arump kutt'ayapxamti. Jan ukasti, jupanakar aski waxt'äwinak churañapatak Tatitur mayipxam, jupasti jumanakarux uka waxt'äwinak katuqapxañamatakiw ajllisipxtam.

10Kunjämtix qillqatan sixa:

“Khitinakatix chiqpach jakañ munapxchi,

kusisitäñsa munapxarakchi ukanakaxa,

jan k'ari arunak parlapkpati,

janirak jaqi masipatsa jan wali arunak parlapkpati;

11kunatix askïki ukanak lurapxpan,

jan wali lurañanak apanukupxpan

taqinimpis suman sarnaqasipxpan.

12Tatitusti aski jaqinakarux imiwa,

mayisitanakaparus ist'arakiwa,

ukampis jan wali lurir jaqinakarux janiw ist'kiti.”

13Jumanakatix aski lurañanakan sarnaqasipksta ukkhaxa, ¿khitirak jan walinak lurapxiristamsti?

14Ukampis chiqa luratanakamattix t'aqhisipxstaxa, ¡kusisiñanïpxtawa! Jan khitirus axsarapxamti, janirak sustjasipxamsa,

15jan ukasti chuymanakaman Tatitur jach'achapxam. Khitinakatix jumanakar suyt'añanakamxat jiskt'apkätam ukanakar arsuñatak wakicht'atäpxam,

16suma chuymamp parlxt'ayapxarakim. Cristor arkirinakjamax sum sarnaqapxam, ukhamat jan kunatsa juchanchatäpxañamataki. Jumanakan askinak luratanakamat jan wali parlirinakax jupanakpachaw p'inqasipxani.

17Diosatix ukham munchixa, ñanqha luräwinakat t'aqhisiñat sipansa, aski lurasin t'aqhisiñaw juk'amp sumaxa.

18Cristox mä kutikiw juchanakas pampachañatak jiwawayi. Jupax aski jaqïnwa, ukampis juchararanak laykuw t'aqhisiwayi, ukhamat jiwasanakar Diosan ukar irpkatañataki. Jupax janchin jiwawayi; ukampis ajayun jakxañatakiw jaktaniwayi,

19ukhamat katuntatäpkis uka ajayunakar jupan jiwañar atipatapat yatiyir saräna.

20Uka ajayunakasti nayrax jan ist'asir tukupkäna ukanakänwa, kunapachatix Noé chachax arca lurkän ukkhaxa, Diosax jupanakaruw suyt'askäna jupar jaysapxañapataki. Uka arcansti kimsaqallqunikiw umamp mutuyatäñat qhispipxäna.

21Uka umasti bautismo umaruw uñtasïna, uka tuqit jichhax qhispitätanxa. Uka bautismosti janiw janchir q'umachañatakïkiti, jan ukasti Diosar juchanakasat q'umachañapatak mayiñatakiwa; jichhasti Jesucriston jaktäwip tuqirakiw qhispiyistuxa,

22jupasti alaxpachar makhatxasaxa, Tatitun kupïxaparuw qunt'asxi, angelanakarusa, taqi jilïr ch'aman ajayunakarus jupaw apnaqxi.