1-2Uka qhipatsti, reyir vino luqtirinakan jilïripampi, t'ant'a luririnakan jilïripampix Egiptonkir reyiruw phiñasiyapxatayna. Faraón reyisti uka panitakix walpun q'apisïna.
3Ukat jupax uka panir katuntayasax carcelar apayäna, kawkhantix Joseax katuntat jikxataskarakïna ukaru.
4Uñjirinakan jilïripasti Josearuw irpxaruyarakïna, uka paniru uñjañapataki, jupanakasti jaya urunakaw carcelankapxäna.
5Mä arumasti, vino luqtirimpi, t'ant'a luririmpix sapa maynis mä samka samkasipxatayna, sapa samkasti mä qhanañchäwinïnwa.
6Qhipärmanthisti, kunapachatix Joseax katuntatanakar uñjir jutkän ukkhaxa, uka panirux wali llakt'at jikxatäna,
7ukat jupanakar jiskt'arakïna:
—¿Kunatsa wali mayjt'atäpxta? —sasa.
8Jupanakasti sapxänwa:
—Mä samka samkasipxta, janiw khitis uk qhanañchirjamäpkituti —sasa.
Joseasti sänwa:
—Samkanakam yatiyapxita, Diosaw kuntix sañ munki uk qhanañchistani —sasa.
9Ukat vino luqtirinakan jilïripax Josear samkap yatiyäna, akham sasa:
—Samkaxan mä uva ali uñjta,
10uka uva alisti kimsa layminakanïnwa, ukanakasti jilaqasin panqaränwa, uka panqaranakasti puqurat uva wayunakaw tukuwayxarakïna.
11Nayasti faraonan qirup ast'atäskäyätwa, ukat uka uvanak katusin qirupar ch'irwsta, ukatsti naya kipkaw uka qiru faraonar churarakta —sasa.
12Ukxaruw Joseax säna:
—Juman samkamax akham sañ muni: Uka kimsa layminakax kimsa uruwa.
13Akat kimsa ururusti, faraonax luratam uñjani, ukatsti pampachxätamwa, ukatsti nayra lurañanakamaruw wasitat uchxätam, jumasti wasitat faraonarux qirup luqtxäta, kunjämtix nayrax luqtirïkta ukhama.
14Kunapachatix ukax phuqhasxani ukkhasti, nayat amtasitätawa, nayat khuyapt'ayasisax faraonaruy parlt'arapita, aka chiqat nayar irpsuñapataki.
15Nayarux hebreonakan uraqipat lunthatanipxitu, janiw carcelankañaxas wakiskiti, janiw kuna juchsa lurkaraktti —sasa.
16Ukatsti t'ant'a luririnakan jilïripaxa, Josean uka samka ukham qhanañchatapatsti, sarakïnwa:
—Nayax samkasiraktwa. P'iqix patan kimsa walayanakaw janq'u t'ant'anakan utjäna.
17Patxankiri walayansti kunayman suma t'ant'anakaw utjäna, ukasti faraonatakïnwa, ukampisa jamach'inakaw jutasin uka suma t'ant'anak manq'suwayxapxi —sasa.
18Ukat Joseax sarakïna:
—Samkamax akham sañ muni: Uka kimsa walayax kimsa uruwa.
19Akat kimsa ururusti, faraonax luratam uñjani, ukatsti mä quqaruw warkkatayätam, siwiq'aranakaw jutasin janchim manq'ani —sasa.
20Kimsa uru qhipatsti faraonan urupänwa, ukatsti jupax mä jach'a phunchhäwi jaqinakapatak luräna. Jawsayat jaqinak nayraqatat faraonax vino luqtirinakana, t'ant'a luririnakan jilïrinakapar carcelat irpsuyanïna.
21Vino luqtirinakan jilïriparusti wasitat irnaqañanakapar uskxäna, jupasti wasitat faraonarux vino luqtxäna;
22ukampisa t'ant'a luririrux warkkatayänwa, kunjämtix Joseax siskatayna ukhama.
23Vino luqtirinakan jilïripasti janiw Joseat amtaskxataynati.
Who We AreWhat We EelieveWhat We Do
2025 by iamachristian.org,Inc All rights reserved.
