1 CRÓNICAS 26 - Qullan Arunaka DC

Punku uñjirinakampi, yaqha jilïrinakampi

1Punku uñjirinakat maykip uñjañatak jalanuqatax akhamänwa: Coreítas jaqinakata: Meselemías, Coré chachan yuqapa, jupax Ebiasaf chachan yuqapänwa.

2Meselemías chachan wawanakapa: Zacarías, jupax jilïrïnwa; payïrix Jediael; kimsïrix Zebadías; pusïrix Jatniel;

3phisqïrix Elam; suxtïrix Johanán, paqallqürix Eliehoenai.

4Obed-edom chachan wawanakapa: Semaías, jupax jilïrïnwa; payïrix Jozabad; kimsïrix Joah; pusïrix Sacar; phisqïrix Natanael;

5suxtïrix Amiel; paqallqürix Isacar; kimsaqallqürix Peultai. Diosax Obed-edom chacharux walja wawanak churäna.

6Obed-edom chachan Semaías yuqapax pä wawanïnwa, jupanakax aski chachanakätap laykux wila masinakaparuw apnaqapxäna.

7Semaías chachan wawanakapa: Otní, Rafael, Obed, Elzabad, Elihú, Samaquías, jupanakasti aski chachanakänwa.

8Taqi jupanakaw Obed-edom chachat saraqir wawanakapänxa, jupanakan wawanakapasa, jilanakapas aski amtañani ch'aman chachanakänwa. Obed-edom chachat saraqir wawanakapax taqpachanix suxta tunka payanïnwa.

9Meselemías chachan wawanakapampi, jilanakapampix tunka kimsaqallqunïnwa, jupanakasti wali wakiskir jaqinakänwa.

10Hosá chachan wawanakapa, Merarí chachat saraqirinaka: Simrí, jupax jilïr irpirïnwa, jupax janis jilïr wawäkchïn ukasa awkipax jilïrit uchäna;

11payïrix Hilquías; kimsïrix Tebalías; pusïrix Zacarías. Hosá chachan wawanakapampi, jilanakapampix taqpachanix tunka kimsanïnwa.

12Maykip punku uñjirinakan lurañanakapax akanakawa. Jupanakaru, uka kipkarak jilïrinakaparu, masinakaparus Tatitun utapan lurañanakaw wakt'äna.

13Jupanakax punku uñjañatakix suertetkam wakt'ayasipxäna, ukaruw jilïrinakasa, sullkanakas mantapxäna.

14Selemías chacharux suertetxa inti jalsu tuqinkir punku uñjañaw wakt'äna, amuyt'ayir Zacarías yuqaparusti amsta tuqinkir punku uñjañaw wakt'äna.

15Obed-edom chacharux aynach tuqinkir punku uñjañaw wakt'äna, wawanakaparusti Tatitun utapan yänak imañ utanak uñjañaw wakt'arakïna.

16Hosá chacharux inti jalanta tuqinkir Saléquet sat punku uñjañaw wakt'äna, uka punkux amsta tuqir makhatañ thakhinkänwa.

Lurañanaksti akham lakinuqasipxäna:

17Sapüruw suxta punku uñjirinakax inti jalsu tuqin utjäna, pusinix amsta tuqina, pusinix aynach tuqina, yänak imañ utanakatakisti paninkamaraki.

18Inti jalsu tuqinkir uta anqäxanxa, thakhi tuqirux pusinïpxänwa, pachpa uta anqäxatakisti paninïpxänwa.

19Ukhamaw punku uñjirinakan luräwinakapax Coré, Merarí chachanakat saraqir wawanakapar lakinuqatäna.

20Maynïr levitanakax Tatitun utapankir suma yänaka, qullan waxt'äwinak uñjañapatak uchatänwa.

21Guersón, Jehiel chachanakat saraqir Ladán sat chachan wawanakapata,

22Jehiel chachan wawanakapa, Zetam, Joel jilanakapan wawanakapax Tatitun utapankir suma yänak uñjañapatak utt'ayatänwa.

23Amram, Ishar, Hebrón, Uziel chachanakat saraqir wawanakapatsti,

24Sebuel chachaw qullqi katuñatak utt'ayatänxa, jupax Guersón, Moisés chachanakat saraqir wawapänwa.

25Eliézer tuqit wila masinakapax Eliézer chachan Rehabías yuqapänwa; Isaías ukasti Rehabías chachan yuqapänwa; Isaías, jupax Joram chachan yuqapa; Zicrí, jupax Joram chachan yuqapa; Selomit, jupax Zicrí chachan yuqaparakïnwa.

26Selomit chachampi jilanakapampix qullan yänakap imañ utanak uñjañatak utt'ayatänwa, uksti Davidampi, wila masinakan jilïrinakapampi, soldado tamanakan jilïrinakapampi, ejerciton jach'a jilïrinakapampix Tatituruw luqtapxatayna.

27Uka yänakax nuwasïwinakan jikxatatänwa, jupanakasti Tatitun utapatakiw katuyxapxäna.

28Ukhamarakiw ukankäna Samuel amuyt'ayirin luqtatapa, Saúl, Quis chachan yuqapa, Abner, Ner chachan yuqapa, Joab, Seruiá chachan yuqapan luqtatanakapasa. Taqi uka luqtatanakax Selomit chachampiru, jilanakapampir katuyatäxänwa.

29Ishar chachat saraqirinakaxa, Quenanías chachampi wawanakapampix Israel markat anqäxan jilïrinakjama, taripirinakjam utt'ayatänwa.

30Hasabías, jupax Hebrón chachat saraqirïnwa, jupan waranqa paqallq patakan wila masinakapaw utjäna. Taqiniw jan axsarir jaqinakapxäna, jupanakax Jordán jawirat inti jalanta tuqin jakir israelitanakaruw apnaqapxäna, Tatitutak taqi kun luräwinakana, ukhamarak reyir luqtañansa.

31Kunapachatix David reyix pusi tunka mara marka apnaqkän ukkhaxa, Hebrón chachat saraqir wawanakapan sutinakap uñakipañatakiw mayïna. Reyix uka saraqir wawanak taypin Galaad chiqankir Jazer markan jan axsarir chachanakan utjatap yatïna. Hebrón chachat saraqir wawanakapan jilïr irpiripasti, Jerías chachänwa;

32jupan wila masinakapamp chika, wakiskir chachanakampix pä waranqa paqallq patakanïnwa, wila masinakapan jilïripäpxarakïnwa. David reyisti jupanakarux Rubén, Gad, Manasés ayllunkir chikat jaqinakapar uñjañapatakiw utt'ayäna, ukhamaraki Diosataki, reyitaki lurañanakax utjki taqi ukanakana.