JOB 7 - Qullan Arunaka DC

1Jaqin jakañapax aka uraqin,

luräwip phuqhir soldadon jakañapar uñtatawa,

2t'aqhisiyat uywat jaqir uñtat ch'iwinkañ munasa,

irnaqir jaqir uñtat qullqi iraqasiñ suyasa.

3Phaxsi phaxsi t'aqhisis sarnaqañaw wakt'itu,

arumanakasti paqar paqari t'aqhisiña.

4Ikintxasasti,

arumax janiw jank'as willjtanirapkituti;

qhanjtaniñapkam uksar aksar jaqukipstasax qarjasiraktwa,

ukat sarakta, ¿kunapacharak sartxästi? sasa.

5Janchixax q'ala laq'untatawa, llixtimpi tukuntatawa,

jinq'ikiw taqi chiqanakat aywiskitu.

6Jiwañ urunakaxax niyaw jak'achasinki,

janiw kuna suyt'äwis utjkxiti,

sawurin jaxchañapar uñtataw

urunakax nayatak jalaraki.

7Amtasimay Dios Tata, jakañaxax samanampi sasikiwa,

janiw mayampis kusisiñax nayatak utjkxaniti.

8Jichhürux uñjaskistawa, qharürusti janiw uñjkxitätati;

thaqhitätawa, nayasti janiw akankxäti.

9-10Kamisatix qinayax sarxi, chhaqtawayxakiraki,

ukhamaw chhaqtawayxi amay imäwir imantatäxi ukaxa.

Janipuniw mayampis ukat kuttankxiti,

utapankirinakax janiw mayampsa uñkatkxarakiti.

11Ukatpï nayax jan amukt'irjamäktixa.

Usuñaxansa, llakisiñaxansa,

ayqutanakaxat arsusiskakipunïwa.

12¿Nayasti jach'a qutankir axsarkañ jach'a laq'utti,

ukham nayar uñch'ukiskañamatakisti?

13Nayax lup'iskta ukapachax sistwa: “Ikiñaxan samarañ jikxatxä,

ikiw llakisiñanakax juyart'ayani” sasa,

14ukampis jumax samkasitanakaxan axsarañampiw phuqhantistaxa;

janiw ikthapiykistasa, ukkhat ukkhat thuqtayistaxa.

15Nayar jaychjañamaw walïspa;

akham t'aqhisis jakañat sipan,

jiwxañakiw nayatak walïspa.

16Ukhakamakïxtwa.

Janiw jakañ munkxapunti.

Samarayxita, jakañaxax samanamp sasikiwa.

17¿Kunarak jaqisti, jupat amtasiñamatakisti,

jupat llakisiñamatakisa,

18sapür jupar uñch'ukiñamataki,

jupar sapa kuti yant'añamatakisti?

19¿Kunatarak nayar uñch'ukiskitätasti,

thusunqayaksa jan mallintaykitätasti?

20Jucha lurataxatix utjchi ukasti,

jaqinakan uñjiripa, ¿kuna ñanqharak lursmasti?

¿Kunatarak nayamp katxatasistasti?

¿Jumatakix mä jathi q'ipjamätcha?

21¿Janit juchaxat pampachkitasmasti?

¿Jan wali luratax janit pampachkasmasti?

Nayax jank'aw uraqir imantat uñjasxä,

thaqhität ukapachasti, janiw jikxatkxitätati.