JOSUÉ 6 - Qullan Arunaka DC

Jericó markar katuntañatak amtapxatapa

1Jericó markarux janiw khitis mantkänti, janirakiw mistkänsa. Uka markan punkunakapax israelitanakar axsarasax jist'antatänwa.

2Ukampis Tatitux Josué chacharux sänwa: “Nayaw jumarux Jericó marksa, reyipsa, soldadonakapsa amparamar katuysma.

3Jumanakasti, Israelit soldadonaka, suxta uruwa, urun mä kuti Jericó marka muytapxäta.

4Paqallqu sacerdotenakaw Tatitun arust'äwi arcap nayräxa sarani, sapa maynis oveja waxrat lurat trompeta apt'atkama, paqallqüri urux paqallq kutiw marka muytapxäta, ukchañkamasti sacerdotenakax trompetanak phust'apxani.

5Kunapachatix jumanakax trompetanakan mä suma phust'asitap ist'apkät ukkhaxa, wali jach'at art'asipxäta, Jericó markan uyu pirqapasti tinkuraniwa. Ukatsti sapa mayniw chiqaki Jericó markar mantaranttapxäta” sasa.

6Josué chachax sacerdotenakar jawsasinxa sänwa: “Tatitun arust'äwi arcap apapxam, jumanakat paqallqunix waxrat lurat trompetanak apt'ata arcan nayräxap sarapxam” sasa.

7Jaqinakarusti sarakïnwa: “Jumanakax marka muytapxam. Nuwasir chachanakax Tatitun arcap nayräxap sarapxpan” sasa.

8Ukatsti taqiniw Josué chachan aruparjam lurapxäna. Paqallqu sacerdotenakasti Tatitun arcapa nayräxap sarapxäna, paqallqu trompetanakat phust'asisa, Tatitun arcapax jupanakan qhipap saräna.

9Nuwasir chachanakax sacerdotenakan nayräxap sarapxäna, qhipat jutir jaqinakasti Tatitun arcap qhipap sarapxäna, ukchañkamasti sacerdotenakax jan samart'asaw trompetanak phust'apxäna.

10Ukampis Josué chachax markar akham satayna: “Janiw kuna arus ist'asiñapäkiti, janiw parlapxätati ch'ujukiw sarapxäta, ukampis kunapachatix art'asipxam sapkäma ukkhax, jumanakax taqi ch'amampiw art'apxäta” sasa.

Jericó markar katuntapxatapa

11Josué chachax Tatitun arcap mä kutiw Jericó marka muytayäna. Ukatsti campamentoruw kuttanxapxäna, uka arumax ukan qhantatipxäna.

12Qhipürusti, Josué chachax wali willjtat sartasïna, sacerdotenakasti Tatitun arcap apxarupxäna.

13Uka paqallqu sacerdotenakasti Tatitun arcap nayräxap sarapxäna, trompetanakap phust'asisa, jupanakan nayräxapsti nuwasir chachanakaw sarapxäna, mayninakasti arcan qhipap sarapxarakïna, trompetanakan phust'asitapax janiw amukt'känti.

14Payïr urusti mä kutimpiw markar muytapxäna, ukatsti campamentoruw kuttxapxäna. Suxta uruw ukham lurapxäna.

15Paqallqüri urusti willjtat sartasin wasitat Jericó marka muytapxäna, kunjämtix nayrïr urunakax lurapkatayna ukhama, ukampis uka urux paqallqu kutiw marka muytapxäna.

16Kunapachatix sacerdotenakax paqallqu kuti trompetanak phust'apkän ukkhasti, Josué chachax jaqinakaruw säna: “¡Taqi ch'amamp art'apxam! Tatituw jumanakarux aka marka katuyapxtam.

17Aka markampi, kunanakatix ukan utjki ukanakamppachax q'ala tukjatäniwa, Tatituw ukham lurasiñapatak arsu uka layku. Ukampis Rahab jan wali sarnaqir warmimpiru, utapan imantasitäpkani ukanakarukiw jakañapax qhispiyatäni, khitkäyätan uka uñaqir chachanakar jupan imantatap layku.

18Jumanakasti janiw markan utjir yänakapat kunsa aptasipxätati, janirakiw llamkt'apxätasa, jan ukasti taqiw t'unjatäñapa Tatitur luqtatäkaspas ukhama. Jumanakatix ukham lurapxäta ukkhaxa, Israelan campamentoparux jan walt'añaruw puriyapxäta.

19Ukampisa qurimpi, qullqimpi, ukhamarak bronceta, hierrot lurat yänakax Tatitur luqtatäniwa, ukatsti jupataki imatarakïniwa” sasa.

20Jaqinakax jach'at art'asipxäna, trompetanakan phust'atapas ist'asirakïnwa. Israelitanakax trompetanakan phust'atap ist'asasti, wali jach'at art'asipxäna, ukatsti Jericó markan uyu pirqanakapax mayak tinkxäna. Ukat taqiniw markar katuntañataki chiqak mantapxäna.

21Ukatsti espadampkamaw chachanakaru, warminakaru, waynanakaru, chuyman jaqinakaru, ukhamarak vacanakaru, ovejanakaru, asnonakar jiwarayapxäna. Kunatix utjkän ukanak q'alpun tukjapxäna.

22Josué chachasti kawkïr chachanakatix uraq uñaqanipkatayna uka pani chacharux sänwa: “Uka Rahab warmin utapar sarapxam, ukatsti juparux taqi utapankirinakapamp chika irpsunipxam, kunjämtix jumanakax sapkatäta ukhamar phuqhasa.

23Jupanakasti Rahab warmin utapar mantasax, awkiparu, taykaparu, jilanakaparu, taqi wila masinakaparuw irpsunipxäna, ukatsti jupanakarux jan kunas kamachañapatakix israelitanakan campamentopat jaya chiqaruw irpapxäna.

24Ukxarusti israelitanakax ninampiw Jericó markar phichhantapxäna, kunatix utjkäna ukanakamppacha. Ukampisa Tatitutaki imata qullqimpi, qurimpi, ukhamarak bronceta, hierrot lurat yänakaki apsupxäna.

25Josué chachax Rahab warmimpiru, wila masinakapampirukiw jakañap qhispiyäna, jupaw kawkïr uñaqirinaktix Josué chachax Jericó markar khitkatayna uka pani chachanakar imantäna uka layku. Ukat Rahab warmin saraqiri wawanakapax jichhürkama israelitanak taypin jakasipki.

26Ukatsti Josué chachax aka juramento luräna: “Jericó marka wasitat sayt'ayañ munirix Tatitun axsarkay mutuyäwip katuqani. Tayna yuqall wawap apt'asiñ munirix, uta qallta qalanak jaquntpan, sullka yuqapan jakañap apt'añ munirix punkunak uskuntarakpan” sasa.

27Tatitux Josué chacharux yanapänwa, sutipasti taqi uksa tuqinakan aytasïna.