SALMOS 52 - Qullan Arunaka DC

SALMO 52Ñanqha lurir jaqin inamay jach'a jach'a tukutapa 1-2 Davidan q'uchupa

1 1 (3) Munañan jaqi,

¿kunatarak ñanqha luratamat jach'achastasti?

¡Diosan munasiñapax jan tukuskiriwa!

2 2 (4) Ñanqha lurañak sapürus lup'isktaxa;

laxramax ari cuchillor uñtatawa.

3 3 (5) Askir munañat sipanxa, ñanqharuw muntaxa,

chiqapar munañat sipansti, k'ariruw muntaxa.

4 4 (6) K'arinak parlir laxra,

chuym usuchrantir arunakak arsuñ munasktaxa;

5 5 (7) ukampis Diosax wiñayatakiw tukjätam:

t'aqhisiyasin utamat jaqunukütam;

aka uraqit jakañam apaqarakïtam.

6 6 (8) Diosar jaysir jaqinakax

uk uñjasax axsarapxaniwa;

khä jaqitsti larusisaw sapxani:

7 7 (9) “Uñtapxam, jan axsarir jaqiru,

Diosar jan iyawsañ munir jaqiru,

qamir yänakapar alkatasir jaqiru,

ñanqha luras sarnaqir jaqiru” sasa.

8 8 (10) Nayasti Diosan utapanxa,

ch'uxñaskir olivo quqar uñtatätwa;

¡wiñayatakiw Diosan munasiñapar alkatä!

9 9 (11) Diosay,

nayatak ask luratamatxa

jumarux yuspagarapunïmawa;

aski jaqinakam nayraqatan jach'añchäma,

juman sinti munasirïtam layku.