2 REYES 20 - Qullan Arunaka DC

Ezequías reyin usuntatapampi, k'umaraptatapampi(2 Cr 32.24-26; Is 38.1-8)

1Khä urunakanxa, Ezequías reyix wali usutaw jikxatasïna, juparusti Amós chachan Isaías yuqap profetaw uñjir saräna, juparusti sarakïnwa:

—Tatitux siwa: “Utamankirinakarux qhipa iwxanakam jaytawayxam, jumax jiwxätawa, janiw waliptkätati” —sasa.

2Ezequías reyisti pirqa tuqir uñkatataw Tatitut mayisïna akham sasa:

3“Tatay, achikt'assmawa, nayat amtasikitaya, nayax chiqa chuymampi, kunatix jumar kusisiyktam ukhamarjamaw luqtawaysma” sasa. Ukatsti jupax walpun jachäna.

4Ukatxa janïra Isaiasax reyin utap anqäxar mistkäna, ukkhaw Tatitux Isaías profetar yatiyäna, akham sasa:

5“Kutt'am, ukatsti markaxan jilïripa Ezequías reyir akham sanim: David nayra awkiman Tatit Diosapax akham siwa: ‘Nayax mayisitam ist'smawa, jachatamsa uñjaraksmawa. Jichhasti jumarux k'umaraptayämawa, ukatxa akat kimsa urut Tatitun utaparux sarxäta.

6Nayax tunka phisqan marampi jakañ churäma. Jumarusa, Jerusalén markarus Asiriankir reyin amparapat qhispiyapxäma. Nayaw aka markarux imä, David luqtirixar munasitax layku, naya pachpa munasitax laykuraki’ ” sasa.

7Ukatsti Isaías profetax, sarasin Ezequías reyir yatiyäna. Ukatsti higonak map'achayäna, ukampiw reyirux kawkhatix usutäkän ukkharu apxatasiyäna, reyin k'umaraptañapataki.

8Ukat Ezequiasax Isaiasar jiskt'äna:

—¿Kuna chimpu tuqirak nayasti amuyasirista, Tatitun nayar k'umarachañapa, ukat kimsa urur Tatitun utapar sararakirista uksti?

9Isaías profetasti ukxaruw säna:

—Tatitux aka unañchäwi churätam kuntix arsktam uk jumampi phuqhañataki: “¿Jumax ch'iwina tunka chillqi nayrar sartañapti, jan ukax, tunka chillqi qhipar jittañapcha muntaxa?” —sasa.

10Ezequías reyisti ukxaruw säna:

—Ch'iwin nayrar sartañapax janiw ch'amäkiti, ukampis ch'iwin qhipar jittañapaw wali ch'amaxa —sasa.

11Ukatsti Isaías profetax Tatituruw art'asïna, Tatitusti ch'iwirux qhiparuw jittayäna, Ahaz reyin gradanakapan ch'iwipa.

Ezequías reyin Babiloniat khithanitanakar katuqatapa(2 Cr 32.27-31; Is 39.1-8)

12Khä urunakanxa, Baladán sat chachan Merodac-baladán yuqapax khititix Babilonia markan reyipäkän ukaxa, Ezequías reyin usuntatap yatïna, ukhamasti khithanakap tuqiw qillqatanaka, churäwinak jupar apayäna.

13Ezequías reyisti uka khithanakarux sum katuqäna, ukatsti reyi utan utjir suma imasit yänakap uñacht'ayarakïna, qullqipa, quripa, suma q'apkir qullanakapa, suma aceitepa, nuwasiñ yänak imañ utapa, kunanakatix imañ utanakan utjkatayna taqi ukanaka. Ukatsti reyi uta taqpach muysuyäna, taqi kun uñacht'ayarakïna.

14Ukat Isaías profetax Ezequías reyin ukar sarasin jupar jiskt'arakïna:

—¿Kawkitarak uka jaqinakasti jutapxi, kamsapxtamsa? —sasa.

Ezequiasasti sänwa:

—Babilonia jaya markat jutapxatayna —sasa.

15Isaías profetasti jiskt'askakïnwa:

—¿Kunsa reyi utaman uñjawayapxi? —sasa.

Ezequiasax ukxaruw säna:

—Taqi kunatix uka manqhin utjki ukanak uñjapxi. Imasiñ utanakaxsa jan mayan taqi uñacht'ayta —sasa.

16Ukat Isaiasax jupar säna:

—Tatitun yatiyäwip ist'am:

17“Akat qhipa urunakanxa, kunanakatix reyi utaman utjki ukanakampi, taqi kunanaktix nayra awkinakamax jichhürkam tantawayapki ukanakampxa, Babilonia markaruw apasxapxani. Janiw kunas akar qhiparkaniti.

18Jumat saraqir yaqhip wawanakamarus Babiloniaruw apasxapxani, jupanakarux capsusin reyin utapana luqtiritak uchapxani” —sasa.

19Ezequías reyisti jakañapkam samarañampi, sumankañampi utjañap amuyasin, Isaiasar säna:

—Tatitutix ukham munchi ukaxa, nayatakix walikïskiwa —sasa.

Ezequías reyin jiwxatapa(2 Cr 32.32-33)

20Ezequías reyin ukat ukxar sarnaqäwipasa, atipjäwinakapasa, uma qutaña luratapasa, ukatsti larqanjam markar uma apayatapasa, Judá markankir reyinakan luräwinakapa qillqatankiwa.

21Ezequías reyin jiwxatapatsti, Manasés sat yuqapaw jupa lantix marka apnaqxäna.