NÚMEROS 6 - Qullan Arunaka DC

Nazireo jaqinakatak kamachinaka

1Tatitux Moisesaruw parläna akham sasa:

2“Israelitanakar parlam jupanakarusti sarakim: Maynitix chachäpasa, jan ukax warmïpasa nazireöñatak Tatitur katuyasiñ munchi ukaxa,

3janiw kuna vinonaksa, machjayir umañanaksa umañapäkiti, janirakiw p'usqtat umañanakat lurat vinagre umañapäkiti, uvanakat ch'iwrsut umapsa umañapäkiti; janirakiw uvanak manq'añapäkiti, chhuyüpasa, wañäpasa.

4Tatitur katuyasiñ arsüwip phuqhasiñapkamasti janiw uva achunakapat kunsa manq'añapäkiti.

5Janirakiw ñik'utapsa mururaskaniti, jan ukasti arsüwip phuqhasiñapkamaw ñik'utap jilantayasini, Tatitur katuyataw sayt'asiñapa.

6Taqi uka urunakansti janirakiw kuna jiwatarus jak'achasiñapäkiti,

7jupan awkipasa, taykapasa, jan ukax, khiti jilapasa, kullakapas jiwaspa ukkhasa, q'añuchat jan tukuñapataki, Tatitur katuyasiñatak arsutap layku.

8Arsutapan phuqhasiñapkamasti q'uma sayt'añapawa.

9“Maynitix akatjamat jupa thiyar jiwani, ukhamat ñik'utap q'añu tukuyarakini, Tatitur katuyatäkchi ukasa, jupax ukat paqallq ururuw ñik'utap mururasini, q'umachasiñap uru purinkan ukapacha.

10Kimsaqallqür ururusti, sacerdoten ukaruw apani pä qhurukutu, jan ukax, pä paloma chhiwchhinaka, uksti sacerdoteruw katuyani qullan utjäwir mantañana.

11Ukatsti sacerdotex ukanak luqtani; mayax jucha luratat wilañcha luqtäniwa, mayasti nakt'at luqtarakïniwa, ukampiw mä jiwatar llamkt'ata jucha luratapat pampachayasiñ jikxatani. Ukürpachaw Tatitur katuyasit jaqix ñik'utap wasitat qullanañchasxani,

12ukatsti Tatitur katuyasiñatak arsüwi urunakap machaqat jakhuñ qalltani. Nayra pacha katuyasit urunakax janiw jakhutäkxaniti, qullanañchkatayna uka ñik'utan q'añur tukutap layku. Tatitun nayraqataparux mä maran urqu oveja aparakini, jucha luratat wilañcha luqtañataki.

13“Tatitur katuyasiñ urunak phuqhasxipansti, nazireo jaqix Tatitump Jikisiñ Carpa mantañaruw sarani,

14ukatsti Tatiturux jan kuna kamacht'at mä maran urqu oveja taqpach nakt'ayas luqtani; uka kipkaraki, jan kuna kamacht'at mä maran urqu oveja jucha luratat pampachäwi jikxatañatak wilañcha luqtani, ukatsti jan kuna kamacht'at urqu oveja sumankxañatak wilañcha luqtarakini.

15Ukhamarus uka nazireo jaqix qullan utjäwir apañaparakiwa, jan levaduran t'ant'anakan walaya; ukasti suma jak'uta, aceitemp chapuntata luratäñapawa, ukatsti grano achunakampita, vinompit waxt'anak apañaparaki.

16Tatit nayraqatan sacerdotex jucha luratat wilañcha luqtani, nakt'ayat luqta katuyarakini,

17ukatsti urqu oveja luqtarakini sumankthapiñ wilañcha luqtäwi, jan levaduran t'ant'anakan walayamp chika, ukatsti grano achunakampita, vinompit waxt'a luqtani.

18Uka nazireo jaqisti ñik'utap mururasini Tatitump Jikisiñ Carpa mantañana, ukat sacerdotex uka ñik'uta aptasin, sumankthapiñ wilañchamp chika nakhantayani.

19Uka qhipatsti, sacerdotex urqu ovejan qhathita jikhanip aptasin nazireo jaqir churani, jan levaduran mä t'ant'ampi, mä tortillampi, kunapachatix jupax p'iqipan ñik'utap khuchuraskani ukapacha.

20Ukatsti sacerdotew uka uywan jaraphipa, lankhu charapa Tatit nayraqatan luqtani, ukanakasti qullanawa, sacerdotenakar churañatakikiwa. Taqi ukanak phuqhasasti, nazireo jaqix vino umxarakispawa.

21“Tatitur katuyasiñatak arsuri nazireo jaqix, aka kamachirjamaw phuqhani, ukatsti aka waxt'anak Tatitun nayraqatapar luqtarakini, ukhamarus munaspa ukax utjataparjamaw yaqha yänakamp luqtani. Jupasti Tatitur katuyasitapat arsutap phuqhañapawa, nazireo kankañ kamachirjama.”Sacerdotenakan aski arunakapa

22Tatitux Moisesar sarakïnwa:

23“Aaronampiru, wawanakapampir parlam, jupanakax israelitanakar aka aski arunak sapxpan:

24‘Tatituy jumarux aski waxt'äwip churpan, imarakpan.

25Tatituy kusisiñamp jumar uñtanpan,

khuyapayasiñap jumar uñacht'ayarakpan;

26Tatituy jumarux munasiñamp uñtanpan,

sumankañsa churarakpan.’

27“Ukham jupanakax israelitanak taypin sutix aytapxani, nayasti jupanakarux askinak churarakï.”