SALMOS 30 - Qullan Arunaka DC

SALMO 30Yuspagarañampi Diosar yupaychaña 1 Davidan q'uchupa: aka q'uchux Tatitun utap luqtañatakiwa.

1 1 (2) Tatay,

jumaruw yupaychsma,

nayar qhispiyatamata,

uñisirinakaxan nayat

jan larusiyatamata.

2 2 (3) Dios Tatay,

jumaruw art'asinsma,

jumasti waliptayistawa;

3 3 (4) Tatay, jumaw jiwañat qhispiyista;

jakañ churista, jiwañat qhispiyista.

4 4 (5) Tatitun arkirinakapa,

¡jupar q'uchupxam!,

¡qullan sutipar yuspagarapxam!

5 5 (6) Q'apisiñapax mä juk'atakikiwa,

munasiñapasti wiñayatakiwa.

Jayp'u tuqirutix jachañax puristanixa,

willjta tuqirux kusisiñaw utjxistani.

6 6 (7) Nayax walin jikxatasisax säyätwa:

“Janipuniw kunas tinkuykitaniti” sasa.

7 7 (8) Tatay, khuyapayasiñaman

suma chiqaruw sayt'ayista,

ukampis nayatak imantasitamatxa,

axsarañat pächasiñaruw purta.

8 8 (9) Tatay, jumaruw art'asinsma;

Tatay, jumaruw achikt'asinsma:

9 9 (10) ¿Kunarak jiwataxamp jikxatasmasti?,

¿kunarak amay imäwir mantataxamp apsusmasti?

¡Jiwatanakax janiw yuspagarkiristamti,

janirakiw aski kankañamatsa parlapkaspati!

10 10 (11) Tatay, ist'akitaya, khuyapt'ayasikitaya;

Tatay, ¡nayar yanapt'akitaya!

11 11 (12) Jachañaxarux kusisiñaruw kipstaytaxa;

llaki isi apaqasinxa,

kusisiñ isimpiw isthapiyista.

12 12 (13) Dios Tatay,

ukat ajayuxax jan amukt'as

¡jach'añchañ q'uchunak q'uchuni,

jumarusti yuspagarapunïmawa!