1 REYES 19 - Qullan Arunaka DC

Elías profetax Horeb qulluruw jaltxi

1Ukatsti Ahab reyix kuntix Eliasax lurkatayna ukanak Jezabel warmir yatiyäna, kunjämtix jupax Baal diosan taqi profetanakapar kunkanakap kharinukuykatayna ukanaka.

2Ukat Jezabel warmix maynir khithäna Eliasar akham sañapataki: “Nayax jiwayämawa, kunjämtix jumax Baal diosan profetanakapar lurkta ukhama. Janitix qharür akapachax jumax jupanakjam jiwat uñjaskät ukaxa, diosanakax jan khuyapt'ayasis nayar jiwayitpan” sasa.

3Uk yatisasti, Eliasax jan walt'añankatap amuyasïna, jakañap qhispiyasiñatakisti Judá uraqinkir Beerseba chiqaruw jaltxäna, uywataparusti pachparuw jaytawayxäna.

4Ukatsti jupax wasar tuqin mä uru sarnaqasinxa, retama ali thiyaruw qunt'asïna. Jupasti jiwxañak munxäna, sarakïnwa: “¡Tatay, ukkhakamakïxpan! ¡Jakañax apaqxita, janiw nayax nayra awkinakaxat sipan ancha askïkti!” sasa.

5Ukatsti retama ali thiyan ikjawayxäna. Ukampis mä angelaw purinisin llamkt'äna akham sasa: “Sartasim, ukat manq'asirakim” sasa.

6Eliasasti taqi tuqi uñatatasïna, ukatsti ch'ijmañap thiyan jichha qhatit t'ant'ampi, mä wayuch umampi uñjäna. Ukatsti sartasisin manq'asïna, umt'asirakïna; uka qhipat wasitat ikt'awayxäna.

7Ukampis Tatitun angelapax payïr kutin jutäna, ukatsti jupar llamkt'asin säna: “Sartasim, ukat manqt'asim, thakhi sarañamax wali jayäskiwa” sasa.

8Eliasasti sartasisin manq'asïna, umt'asirakïna. Uka manq'aw ch'ama churäna pusi tunka urumpi, pusi tunka arumampi thakhinjam sarañataki, Tatitun Horeb qullupar puriñkama.

9Purisinsti mä puturuw mantäna, ukan uka arumax qhantatirakïna. Ukampis Tatituw jupar wasitat parläna, ukat jiskt'arakïna: “¿Elías, kuns akan luraskta?” sasa.

10Jupasti sänwa: “Nayan jumar jaysataxaw walpun llakisiyitu, jumax taqi ch'aman Dios Tatitütawa. Israelitanakax jumampi lurat arust'äwi apanukupxi, altaranakamsa allinukupxiwa, profetanakamarusti jiwarayapxarakiwa. Naya sapakiw qhiparxta, jichhasti jiwayañatakiw thaqhasipkitu” sasa.

11Ukat Tatitux jupar säna: “Anqar mistunim, ukatsti qullu patxan nayraqataxan sayt'asim” sasa.

Ukapachaw Tatitux uka chiqa sarakipawayäna, ukatsti mä jach'a wali ch'aman thayaw qullu allinuküna, qarqanaksti Tatitun nayraqatapan jaljtayarakïna; ukampis Tatitux janiw uka thayankkänti. Uka thaya qhipatsti mä uraqi khathatiw utjarakïna; ukampis Tatitux janiw uka uraqi khathatinkkänti.

12Uraqi khathati qhipatsti mä ninaw utjarakïna; ukampis Tatitux janiw uka ninankkänti. Ukampis nina qhipat mä quña uxurikiw ist'asïna.

13Uk ist'asinsti Eliasax ajanup isipampi imt'asïna, ukatsti mistusin uka putu mantañaruw sayt'asïna. Ukhamäskiriruw mä arux ist'asïna: “¿Elías kuns akan luraskta?” sasa.

14Jupasti sänwa: “Nayan jumar jaysataxaw walpun llakisiyitu, jumax taqi ch'aman Dios Tatitütawa. Israelitanakax jumampi lurat arust'äwi apanukupxi, altaranakamsa allinukupxiwa, profetanakamarusti jiwarayapxarakiwa. Naya sapakiw qhiparxta, jichhasti jiwayañatakiw thaqhasipkitu” sasa.

15Ukat Tatitux säna: “Sarxam, pachpa thakhinjam kutt'xam, Damasco wasarkama. Purisinsti, Hazael chacharux Siria markan reyipat utt'ayäta,

16Nimsí chachan Jehú allchhiparusti Israelan reyipat utt'ayarakïta; ukatsti Abel-meholá markankir Safat chachan Eliseo yuqaparusti juma lanti profetat utt'ayäta.

17Ukhamat khiti israelitatix Hazaelan espadapat jaltkani ukaruxa, Jehú chachaw jiwayani, khititix Jehú chachan espadapat jaltkani ukarusti, Eliseo chachaw jiwayarakini.

18Ukampis Israel markan, paqallq waranqa jaqinakaruw jaytä, Baal diosan nayraqatapan jan killt'asirinakaru, lakanakapampi ukanakar jan jamp'att'irinakaru” sasa.

Elías profetax Eliseo chacharuw jawsi

19Eliasax uka chiqat sarxasin Safat chachan Eliseo yuqaparuw jikxatäna, jupasti tunka payan yuntampiw yapup qhulliskäna. Jupaw qhip sarki uka yunta irpaskarakïna. Eliasasti jupar jak'achasisinxa, jupa patxaruw isip liwxatäna.

20Eliseosti ukspachaw yuntanak apanukusin Eliasan qhipap jaläna, juparusti sänwa:

—Sarxañatak awkixampir taykaxampir jamp'att'ir sarä, ukatsti nayax arkaskämawa —sasa.

Eliasasti sänwa:

—Saraskakim, ukampis kuntix jumamp lurkta uk amtasim —sasa.

21Eliseosti Eliasat saraqawayäna, ukatsti kuttanisinxa, pä urqu vacanak katusin khariräna, ukatxa yuku lawanakampiw aychxa kankaräna, ukat jaqinakar manq'arayäna. Ukatsti Eliasan qhipap sarxäna, ukürutpach jupax Eliasan yanapiripäxäna.