1Ukatsti Anax akham Tatiturux q'uchüna:
“Tatay, nayasti taqi chuymaw juman kusista,
jumax nayar ch'ama churatamata.
Jichhakuchaw uñisirinakatakix arsusïxa,
jumaw nayarux yanapt'ista uka layku.
¡Wali kusisitätwa!
2¡Tatay, jumjam qullanax janiw khitis utjkiti!
¡Nanakan Awkixa,
jumjam arxatirix janiw khitis utjkiti!
¡Jumat juk'ampix janiw khitis utjkiti!
3Jan khitis jichhax jach'achasiñampi parlpati,
janirak khitis sinti yatiñan tukpati,
Tatitu Diosaw taqi kunsa yati,
juparakiw jaqin luräwinakapsa uñjaraki.
4Ch'amaninakan mich'i antutt'añapsa tukjiwa,
pisi ch'amaninakarusti
ch'aman tukuyaraki.
5Khitinakantix taqi kunas jilarkir utjkänxa,
jichhax mä jisk'a t'ant'a laykukiw katuyasipxi;
manq'at awtjayasirinakasti
janiw jichhax awtjayaskxapxiti.
Jan wawachasir warmisa,
jichhax paqallqu kutiw wawachasxi,
walja wawachasir warmisti,
jichhax janiw wawanakanïkxiti.
6Tatituw jakañ churistu
juparakiw jiwañ apayanistu.
7Tatituw qamiriptayistu,
juparakiw jan kunan tukuyistu;
jupaw aynacht'ayistu,
juparakiw jach'arus aptistu.
8Diosaw pisi utjirinirux jan walt'añanakat apsu,
mayjasir jaqirusti t'unanak taypit waysuraki,
aytat jaqinak taypin qunt'ayañataki.
¡Tatitunkiw taqi akapachaxa!
9Tatituw jupar jaysirinakarux imi,
jan jaysasirinakasti
llakisiñat jiwapxi,
¡inamayatakikiw ch'amapasa!
10Tatituw uñisirinakaparux jisk'a jisk'a tukjani,
jupanakxarux alaxpachatpach
q'ixu q'ixunak apayanini.
Tatituw taqi akapachar taripani;
Jupan ajllit reyirusti ch'amancharakiniwa,
ch'amapasti juk'ampiw jiltarakini.”
11Ukatsti, Elcaná chachax utaparuw kuttawayxäna Ramá sat chiqaru, ukampis Samuel wawax Elí sacerdotempiw Tatitur luqtañatak qhiparäna.
Elí chachan wawanakapan jucha luratanakapa12Elí sacerdoten wawanakapax jan wali jaqinakänwa, janiw Tatiturux axsarapkänti,
13janirakiw sacerdoten phuqhañapäki uksa markampix phuqhapkänti; kunapachatix maynix wilañcha luqtirïkän ukkhaxa, sacerdoten uywatapaw tenedor ayt'at jutirïna, aychan qhatiñapkamasti jupax uka tenedorampiw
14phukhut uka aychanak sacerdoter churañatak waysurïna. Ukham jupanakax Siló sat chiqar purir israelitanakarux lurapxirïna.
15Ukhamarusa, lik'ix janïr altarxan nakhantki ukkhaw sacerdoten uywatapax purinirïna, wilañcha luqtirirusti sarakirïnwa: “Aycha churita, sacerdotetak kankt'aniñataki; jupax janiw qhatit aycha katuqkätamti, jan ukasti ch'uqi aycha katuqätam” sasa.
16Ukatsti wilañcha luqtir jaqitix säna: “Nayraqatax lik'i nakhantayañaxawa, ukat sacerdotex qawqhtix munki uk apaqasiskani” sasaxa, ukxarusti sacerdoten uywatapax sarakirïnwa: “¡Janiwa, jichhpach churita, jan ukasti ch'amampiw aparawayäma” sasa.
17Uka waynanakan jucha luratanakapax Tatit nayraqatan sinti jan walipunïnwa, Tatitur waxt'äwi luqtatanaksti janiw yäqapkänti.
18Samuel waynasti efod sat lino isimpi isthapt'ataw Tatitun nayraqatapan luqtaskäna.
19Taykapasti sapa maraw mä suma isi lurarapirïna, ukatsti kunapachatix chachapamp wilañcha luqtir sarirïkan ukkhaw uka isi aparapirïna.
20Ukatsti, Elí sacerdotex Elcanampiru, Anampirux aka aski arunak säna: “Niyakixay Samuel wawar Tatitur luqtañapatak katuyapxstaxa, Tatituy jumanakar walja wawanak apaypan” sasa. Uka qhipatsti utaparuw jupanakax kuttawayxapxäna,
21Tatitusti Anarux aski waxt'äwipampiw phuqt'äna, ukatsti Anax usur jaqiptxänwa, ukat kimsa yuqall wawampi, pä imill wawamp wawachasïna, Samuel wawasti Tatitun nayraqatapan jiltaskakïnwa.
22Elí sacerdotex wali awkïxänwa, ukampisa kuna jan walinaktix wawanakapax israelitanakar lurapkän ukanak sum yatïna.
23Ukat wawanakapar jawsäna, sarakïnwa: ¿Kunatarak uka jan walinak lurasipktasti? “Jaqinakax jumanakan jan wali luratanakam yatiyapxitu.
24Wawanaka, janiw akch'as walïkiti Tatitun markapan jumanakxat ukham parlapxatapaxa.
25Mä jaqitix masipar jan wal luraspaxa, Tatitux uka jaqit arxataspawa, ukampis maynitix Tatitur ñanqha lurchi ukasti, ¿khitirak jupat arxataspasti?” sasa. Ukampis janiw jupanakax kuntix awkipax siskäna ukarux ist'apkänti, ukat Tatitux jupanakan jakañap apaqañ amtäna.
26Ukchañkamasti Samuel waynax jiltaskakïnwa, sarnaqäwipasti Tatitutakisa, jaqinakatakisa askïnwa.
27Uka urunakansti, mä profetaw Elí sacerdoter tumpt'ir purinïna, juparusti sarakïnwa: “Tatitux akham siwa: Kunapachatix nayra awkinakamax Egipton faraonar luqtasipkän ukkhaxa, qhanpach jupanakar uñt'ayasta.
28Israel markan taqi ayllunakap taypitsti, nayan sacerdotenakäpxañamatakiw ajllisipxsma, altaraxan wilañcha luqtapxañamataki, incienso nakt'ayapxañamataki, ukhamarak sacerdote isimp isthapt'at nayraqataxankapxañamataki. Ukhamarus nayra awkinakamarux israelitanakax nakt'at luqtäwi Tatituru churki taqi uka waxt'äwinakat manq'apxañapatakix churarakta.
29¿Kunatarak jan yäqapxtasti wilañchanaka, waxt'äwinak luqtapxam siskta ukarusti? Jumax nayat sipansa wawanakamarukiw juk'ampi yäqtaxa. Jupanakax markax nayatak apanki uka suma waxt'äwinakampiw sapürunjam lik'intasipki” sasa.
30Uka layku, Israelan Tatitu Diosapax sänwa, jumampi utamankirinakamampix wiñayataki jupar luqtapxañama, ukampis jichhax akham sarakiwa: “Janipuniw ukhamäkaniti, jan ukasti, khitinakatix nayar yäqapkitani ukanakarux yäqäwa, nayar jisk'achapkitani ukanakarusti mä p'inqa uñjarakï. Naya, Tatituw uk arsta.
31Jichhax juman munañanïñama, nayra awkinakaman munañanïñap t'unjañ urux niy jak'achasisinkiwa, janipuniw utamankirinakat khitis wali chuymankam jakapkaniti.
32Kuna askinaktix Israel markar lurkä ukanaksti, llakisiñampi munapayañ chuymampiw uñch'ukïtaxa, janipuniw utamankirinakat khitis wali chuymankam jakapkaniti.
33Ukampisa wila masinakamat mä qawqhanix nayan altarax jak'ankaniwa, ukhamat nayranakapas munapaykäwi tukusiñapataki, ajayupas t'aqhisiñat tukusiñapataki, ukatsti mayni wawanakamas jiwarayatarakïniwa.
34Kuntix Hofní, Finees sat wawanakamampi luraskani ukax, mä uñacht'äwïniwa: jupanakax mä urukiw panpachan jiwapxani.
35Ukatsti, nayax mä suma sacerdote utt'ayä, chiqapar apnaqiri, nayan munañax phuqhiri, ukhamarak nayan amtäwixarjam luriri; wila masinakaparusti walja maranak jakayä, ukatsti nayan ajllit reyiru luqtir tukt'ayarakï.
36Ukapachasti, qawqhanitix utamankirinakat jakasipkani ukanakasti, jupa nayraqataruw killisir jutapxani, mä juk'a qullqi, jan ukax mä jisk'a t'ant'a layku, ukatsti achikt'asisaw sapxarakini: sacerdotenak taypin kuna lurañaksay churapxita manq'asipxañaxataki” sasa.
Who We AreWhat We EelieveWhat We Do
2025 by iamachristian.org,Inc All rights reserved.
