JOSUÉ 14 - Qullan Arunaka DC

Josué chachax Canaán uraq lakinuqi

1Eleazar sacerdotempi, Nun chachan Josué yuqapampix, wila masi tamanakan jilïrinakapamp chikaw israelitanakarux cananeo uraqinak lakintapxäna, Jordán jawirat inti jalanta tuqina.

2Uka uraqinakasti suertetkam llätunka chikatani ayllunakarux lakinuqasïna, kunjämatix Tatitux Moisesar siskatayna ukarjama.

3Moisesax Rubén, Gad ayllunakarux Jordán jawir khurkatan utjir uraqinak niyaw churxatayna, ukhamarak Manasés ayllunkirinakat chikat jaqiparu, ukampis levitanakarux janiw uraq churkänti.

4José chachat saraqir wawanakapax pä ayllur tukutänwa, Manasés, Efraín ayllunaka, ukampis levitanakarux janiw mä jisk'a uraqis wakt'känti, jan ukasti kawkhantix jakapkaspa uka markanaka churäna, ch'uxña pampa uraqinakampi uywanakap awatiñataki.

5Israelitanakax kunjämtix Tatitux Moisesar siskatayna ukhamarjamaw uraq lakinuqasipxäna.

Caleb chachan Hebrón marka katuqatapa

6Judá ayllut saraqir wawanakapax Josué chachampi parliriw Guilgal chiqaru sarapxäna, ukatsti Jefuné jaqin yuqapa, quenezita Caleb chachax Josué chacharuw akham säna: “Jichhasti jumax kuntix Tatitux Moisés luqtiriparu Cadés-barnea chiqan nayampita, jumampit sawayki uk amtasim.

7Nayasti ukapachax pusi tunka maranïyätwa, kunapachatix Moisesax Cadés-barnea chiqat uka uraq uñaqañatak khitkitän ukkhaxa, kuttanisinsti qhana chuymampiw kunanaktix nayax uñjankäyät ukanakat juparux parläyäta.

8Ukampis nayamp chika sarapkän uka jaqinakax, purinisinxa wali axsarañanak Israel markarux yatiyapxäna, chuymanakap mayjt'ayasa, nayasti Tatitu Diosaxaruw iyawsäyäta.

9Ukat Moisesax juramento lurarapitu, akham sasa: ‘Kawkïr uraqirutix kayumax takt'ki ukax jumankapuniniwa, ukhamarak wawanakamana, Tatit Diosaru taqi chuymampi alkatasitam layku’ sasa.

10Tatitux Moisesar arskäna ukkhat jichhakamax, niy pusi tunka phisqan maräxiwa, israelitanakax ukürunakan wasaran sarnaqasipkäna, nayarusti arsutaparjamaw jakayaskitu. Jichhasti kimsaqallq tunka phisqan maranïxtwa,

11ukampis nayax wali ch'amanïsktwa, kunapachatix Moisesax uraqinak uñjir khitkitän uka urunakanjama, ch'amaxasti jalnaqañatakisa, uka urunakanjam nuwasiñatakis utjaskiwa.

12Ukat jichhax jumar maysma uka qullu chiqanak nayar churañamataki, kunjämtix Tatitux arsuwaykitu ukhamarjama. Jumasti yattawa Anac sat jach'a tansa jaqit saraqir wawanakapan uka urunakatpach uka chiqan jakapxatapxa, markanakapasa jach'anaka, wali suma uyuchrantat markanakätapa. Ukampis nayax Tatitun yanapapampix uka chiqat jupanakarux jaqunuküwa, kunjämtix Tatitux arsuwayki ukhamarjama” sasa.

13Ukat Josué chachax Caleb chacharux askinak churäna, ukatsti jupampiru wawanakampirux Hebrón uraqi churxäna.

14Ukhamaw Hebrón uraqix Caleb chachampiru wawanakapampiru churatäxäna, Caleb chachan Israelan Tatitu Diosaparu taqi chuymamp jaysatap layku.

15Hebrón qullun nayra sutipax Quiriat-arbá satänwa, Arbá jaqix, wali uñt'ata Anac sat jach'a tansa jaqin wawapänwa.

Uka qhipatsti samarañaw uka uraqinakanxa utjxäna.