EZEQUIEL 1 - Qullan Arunaka DC

I. PROFETAN JAWSÄWIPA(1—3)Diosan qhapaq qunuñapat unañchäwi

1-3Naya, sacerdote Ezequiel, Buzí sat jaqin yuqapa, mä uruw nayax Babilonia uraqina, Quebar sat jawir thiyan sayt'atäskäyäta, khitinakatix katuntat apatäpkatayna ukanak taypina. Ukhamäkiriruw alaxpachax jist'artäna, ukatsti Tatiturux mä unañchäwin uñjta. Ukasti kimsa tunkïr marana, pusïr phaxsita phisqa uru saraqatarünwa, Joaquín reyix katuntata apatäkän ukat niya phisqa mara qhipata. Tatitusti nayaruw amparap luqxatitu.

4Ukapachaw nayax uñjta, amsta tuqit mä jach'a tutuka thayar uñtat jutaskiri; mä jach'a qinayatsti ninarakiw lliju llijur uñtat mistuskäna, uka qinayarusti mä jach'a qhanaw muytarakïna. Uka nina taypinsti mayaw k'ajaskarakïna, mä suma metaläkaspas ukhamaw llijunïna,

5uka chika taypinsti pusi jaqinakar uñtasitaw utjarakïna.

6Ukanakat sapa maynisti pusi ajanuni, pusi chhiqhanïnwa,

7charanakapasti chiqakïnwa, kayu sillunakapas vaca qallun sillunakapjamänwa, ukasti mä suma llijkiri broncëkaspas ukhamaw k'ajarakïna.

8-9Uka pusi ajanupata, pusi chhiqhapat sipansa, uka pusinisti, pusi chhiqhanakap k'uchunxa, jaqi amparat amparanakanïpxänwa. Chhiqhanakapasti jupanakkamaw jikthaptapxäna. Sarasasti janiw qhiparu uñtanipkänti, jan ukasti nayraqataruw sarapxäna.

10Uka pusinin ajanupasti akhamarakïnwa: Nayräx ajanusti jaqi ajanünwa, kupi tuqi ajanusti mä leonan ajanupjama, ch'iqa tuqi ajanusti, mä urqu vacan ajanupjama, qhipäx ajanusti mä jach'a pakan ajanupjamarakïnwa.

11Chhiqhanakapasti amsta tuqiruw janatattäna. Pä chhiqhasti purapat jikthaptapxäna, payïrimpisti janchinakap imt'asipxarakïna.

12Taqinis nayra tuqiruw sarapxäna, sarasasti janiw qhiparu kutikipstanipkänti. Kawksarutix Tatitun ch'amapax jupanakaru apkäna uksaruw sarapxarakïna.

13Uka pusinisti mä sank'iri k'illiminakjamänwa, jan ukax mä nina wiyar uñtataw uka taypin uksa aksa sarnaqapxäna; uka ninasti walpun k'ajäna, ukatsti uka nina taypit lliju llijunakaw mistunirakïna.

14Uka pusinisti jank'akiw lliju llijunakjam uksar aksar sarapxarakïna.

15Uka pusiniru uñtasasti, sapa maynin jak'apan mä jach'a muyuriw uraqin utjäna.

16Uka pusi jach'a muyurinakasti mä kipkakïnwa, kunjämatix luratäpkäna ukhamarusti topacio sat k'ajkir suma qalar uñtataw k'ajapxarakïna. Amuyatat sapa muyurinak taypin yaqha muyuris utjkaspa ukhamänwa.

17Ukanakasti, pusi tuqiru, jan qhipar kuttasin kawksarus sarapxakïnwa.

18Uka pusi jach'a muyurinakasti hierrot luratampi muytatarakïnwa, uka muytatansti nayranakampi phuqhantatänwa.

19Uka pusinix sartawayapkäna ukkhasti, uka pusi muyurinakax jupanakampi chikarakiw sarantapxäna, uka pusinix uraqit thuqtawayapkän ukapachasti, uka pusi muyurinakax thuqtawayapxarakïnwa.

20Uka pusinisti, kawksarutix Tatitun ch'amapax jupanakaru apañ munkäna uksaruw sarapxäna, muyuri muruq'unakasti jupanakampi chikarakiw sartapxäna, uka pusinin jakañapanïpxatap layku.

21Uka pusinix unxtapkän ukkhasti, uka muyuri muruq'unakax unxtapxarakïnwa, sayt'apkäna ukkhasti, sayt'apxarakïnwa; thuqtapkän ukkhasti, uka chikarakiw thuqtapxäna, uka muyuri muruq'unakan uka pusinin jakañapan jakañapanïtap layku.

22P'iqinakap patansti mä k'ajkir alay pirqäkaspas ukhamaw uñstäna, ukasti wal k'ajarakïna.

23Uka manqhansti uka pusinin chhiqhanakapax chiqaki janatatatänwa, maynit maynikam jikisiyasa. Paya chhiqhampisti janchinakap imantasipxäna.

24Ukatsti chhiqhanakan jawq'alitap ist'arakta, sarantapkän ukapacha, ukasti jach'a jawiran umanakapjamaw qhuthutïna, taqi ch'amani Tatitun arupjama, mä walja soldadonakan sarantatapjamaraki. Sayt'apkäna ukkhasti, chhiqhanakap aythapisxapxänwa.

25Ukatsti uka pusinin p'iqipa patankkän uka k'ajkiri alay pirqjama taypitsti, mä jach'a aruw ist'asïna.

26Uka patansti, mä k'ajkir suma qalat lurat qunuñäkaspas ukham uñjta, uka qunuña patansti jaqir uñtata mayniw qunt'atäskäna.

27Uka jaqisti, cinturapat alayarux ninan muytat mä suma k'ajkiri qhuyar uñtataw k'ajäna, cinturat aynacharusti ninjamaw k'ajarakïna. Jupa jak'ansti mä qhanaw utjäna,

28uka qhanasti kürmir uñtatarakïnwa, kunapachatix kürmix jallu uruna qinay taypin uñstki ukhama. Tatitun qhapaq kankañapax ukhamar uñtataw nayar uñstitu. Uk uñjasasti, nayax uraqir puriñkamaw p'iqix alt'asirakta.