DEUTERONOMIO 8 - Qullan Arunaka DC

Jaqix janiw t'ant'ampik jakkiti

1Moisesasti saskakïnwa: “Wali amuyumpiy jichhürun sapksma uka kamachi arunak phuqhapxam, ukhamat kawkïr uraqtix Diosax nayra awkinakamar churañ arskän uka uraqir mantasin jakapxañamataki, mä jach'a marka tukupxañamatakiraki.

2Tatit Diosamax wasaranjam pusi tunka mara sarnaqayasa irpanipktam taqi uka thakhit amtasipxam, jumanakar t'aqhisiyañataki, yant'añataki, amtäwinakam uñt'añataki, kamachi arunakap phuqhirjamäpxtati janicha uk yatiñataki.

3Diosax t'aqhisiyapkchïyätam, manq'atsa awtjayapkchïyätam ukasa, jupax maná sat manq'añ manq'ayapxtam, uka manq'añsti janiw jumanakasa, nayra awkinakamas uñt'apkataynati, ukhamat jumanakan yatipxañamataki: jaqix janiw t'ant'a sapampiki jakkiti, jan ukasti Tatitun lakapat mistki uka arunakampiw jakaraki.

4Uka pusi tunka maranak sarnaqasinxa, isinakamas janiw thanthaskänti, kayunakamas janirakiw p'usurkänti.

5Amuyasipxamaya, kamisatix mä awkix wawapar iwxki, uka kipkarak Tatit Diosamax jumanakar iwxapxäyätam.

6Tatit Diosaman kamachi arunakap phuqhapxam, jupar jach'añchapxam, yatichäwinakaparjam arkapxarakim.

7Diosasti mä suma uraqiruw irpapxätam, jalaskir jawiranakan markaru, qhirwanakapansa, qullunakapansa uma jalsurinakan uraqiru;

8uka uraqisti trigo, cebada, uva, higo, granado, olivo achuyi, walja aceite, walja misk'iw utjaraki.

9Uka markansti jumanakax janiw manq'at t'aqhisipkätati, janirakiw kunas pist'apkätamti; qalanakapatsa hierro apsupxäta, qullunakapatsti cobre apsupxarakïta.

10Ukatsti kunapachatix manq'asxapxäta sist'asipxarakïta ukkhaxa, Tatit Diosamaruw yupaychapxäta uka suma uraqi jumanakar churatapata.

Diosat jan armasiñatak iwxanaka

11“Tatit Diosamat amtasiñ jan armasipxamti, jichhürun churapksma uka kamachi arunakapa, arsutanakapa phuqhañsa jan armasipxamti.

12Kunapachatix jumanakax manq'asisin sist'asipkäta, ukatsti uka suma lurat utanakan jakapxarakïta,

13ukatxa vacanakamsa, ovejanakamsa mirantir uñjapxäta, qurimsa, qullqimsa taqi yänakamsa jilxatir uñjapxarakïta ukapachasti,

14jumanakax janipuniw jach'a jach'a tukupxätati, janirakiw Tatit Diosamatsa armasipxätati, jupaw Egipto markan t'aqhisiyat jakañat irpsunipxtam.

15Jupaw uka axsarkañ jach'a wasaranjam irpanipxtam, mich'intasir asirunakani, ajarankhunakan phuqhantata, kawkhantix umas jan utjkäna uka chiqa, ukampis Tatitux mä qarqat uma jalsuyäna jumanakan umapxañamataki.

16Ukatsti wasaran maná sat manq'a manq'ayapxtam, janiw nayra awkinakamas uka manq'a uñt'apkataynati, ukhamat jumanakar yant'añataki, llamp'u chuymanïñ yatiqapxañamataki, ukasti jumanakan askimatakirakïnwa.

17“Janirak ukatxa chuymanakaman amuyapxamti: ‘Taqi aka yänak ch'amasampiw jikxatasisktan’ sasa.

18Tatit Diosamat amtasipxam, jupaw uka yänak jikxatañatakix ch'am churapxtam, ukhamat jumanakampi phuqhasi kawkïr arust'äwtix nayra awkinakamamp lurkatayna ukaxa.

19“Ukampisa, jumanakatix Tatit Diosamat armasipxäta, yaqha diosanakan qhipap arkapxäta, ukanakar yupaychapxarakïta ukaxa, nayax jichhatpach sapxsma, taqi jumanakax t'unjataw uñjasipxäta.

20Kamisatix Diosax markanakar jumanak nayraqatan t'unjkani ukhamarakiw jumanakax t'unjat uñjasipxäta, Tatit Diosamar jan ist'apxatamata.