1Aski jaqinaka: Tatitur art'asipxam,
aski jaqinakan yupaychäwipax askipuniwa.
2Tatiturux q'uchunakampi yupaychapxam,
arpa, salterio ukanakampi chik q'uchupxam,
3machaq q'uchumpi yupaychapxam,
¡juparux wali sumpun jallallt'apxam!
4Tatitun arunakapax chiqapawa,
luratanakapax arsutap phuqhirïtap uñachayi.
5Tatitux askimpiru chiqapampiruw munasi;
¡munasiñapax uraqpacharuw phuqhanti!
6Tatitux arupampiw alaxpach lurt'i;
inti, phaxsi, warawara taqi ukanak utjayi.
7Jupaw lamar quta umanak
mayawjaruk tantthapi.
8Aka uraqin taqpachan Tatitur axsartapxam;
¡akapachan jakirinakax jupar waqaychapxpan!
9Jupax arupampikiw taqi kun utt'ayawayi;
arsutapampikiw taqi kun sayt'ayawayi.
10Tatitux ñanqha lurir markanakan
amtatanakap q'al aynacht'ayi,
11Tatitun amtäwinakapasti
wiñayatakipuniw sayt'i.
12Tatitut Diosanïki uka markax kusisiñaniwa,
jupar ajllisipki uka markax kusisiñaniwa.
13Tatitux alaxpachatpach uñtani,
taqi jaqinakaruw uñjaraki;
14akapachan taqpach jakir jaqinakarux
utjäwipatpach uñch'ukisinki;
15jupaw taqinir amuy churi,
juparakiw taqi luräwinakap uñch'ukiski.
16Janiw kawkïr reyis jach'a nuwasir tamanïtap layku atipkiti,
janirakiw nuwasir jaqis wali ch'amanïtap layku qhispkiti;
17caballonakapax atipañatak janiw kunäkisa;
wali ch'amanïsipkpasa, janiw qhispiyapkaspati.
18Tatitusti iyawsirinakaparux sum uñjaski,
munasiñapar katuyasirinakarus imaskiwa,
19jiwan amparapat jupanakar qhispiyañataki,
mach'a pachanakan chuymachañataki.
20Jiwasanakax Tatituruw taqi chuymamp iyawsapxtan:
¡jupaw arxatirisaxa, jark'aqirisasa!
21Jupampiw chuymanakasax kusisi;
qullan sutiparuw taqi chuymamp iyawsapxtan.
22¡Tatay, khuyapayasiñamax nanakxar purinpan,
kamisatix jumat suyapksma ukhamarjama!
Who We AreWhat We EelieveWhat We Do
2025 by iamachristian.org,Inc All rights reserved.
