LEVÍTICO 23 - Qullan Arunaka DC

Phunchhäwi urunakxata(Nm 28.16-25)

1Tatitux Moisesar akham sänwa:

2“Israelitanakar akham sarakim: Akïr urunakaw Tatitutak sat yaqhachat urunakaxa, jumanakasti uka urunakan qullana tantachasïwinak lurasa tantacht'asipxäta.

3“Suxta uruw irnaqäwim luräta, ukampis paqallqu urunsti janipuniw kunsa lurätati; uka urux samarañ urüniwa, uka urusti mä qullana tantachasïwi luräta. Kawkhansa jakaskam, uka urux Tatitur yupaychañ urüniwa.

4“Tatitur yupaychasa qullan tantachasïwinak lurapxañamataki uka urunakax akïrinakawa.

5“Nayrïr phaxsina tunka pusini uru saraqat jayp'thapirux Tatitut amtasisin Pascua uruyañ qalltapxäta.

6“Uka pachpa phaxsina tunka phisqani uru saraqatarusti, jan levaduran t'ant'anak manq'añ phunchhäwi amtapxarakïta. Paqallqu urunakaw jan levaduran t'ant'a manq'apxäta.

7Qallta urusti mä qullan tantachasïwi lurapxäta. Uka urux janipuniw kuna ch'ama tukuñ irnaqañanaksa lurapxätati.

8Paqallqu urunakaw Tatiturux waxt'anak nakt'ayas luqtapxäta, paqallqu uru purinxipansti mä qullan tantachasïwi lurapxäta. Janipuniw uka urux yaqha irnaqäwinak lurapxätati.”

Nayrïr achunakat phunchhäwi lurañxata(Nm 28.26-31)

9Tatitux Moisesaruw mayïna

10israelitanakar akham sañapataki:

“Kunapachatix jumanakax kawkïr uraqtix churapkäma ukar mantapkäta ukkhaxa, apthapipkäta uka trigotxa, nayrïr marqa sacerdoteruw churapxäta.

11Samarañ uru qhipürusti sacerdotex Tatituruw mä suma q'apkir waxt'äkaspas ukham churxani, ukhamat jumax katuqatäñamataki.

12Trigo marqa churapkäta uka pachpa urunsti, mä maran jan kamacht'at urqu oveja nakt'ayas luqtañapatak churapxarakïta.

13Ukhamarus pusi kilo chikatani aceitempi chapt'ata suma jak'u apanipxarakïta, ukasti Tatitutak nakt'ayas suma q'apkir luqtatäñapataki. Warakipt'añatak mä waxt'äwjamsti, mä litro vino churapxarakïta.

14Tatitun ukaru waxt'anakam apaniñkamasti, janiw t'ant'sa, trigo jamp'sa, jan ukax chhuyu trigsa manq'apxätati. Kawkhansay jakasipkam, aka kamachisti jumanakatakixa, wawanakamatakis wiñayatakipunïniwa.

15“Kunürutix jumanakax uka trigo marqa apapkäta Tatitur mä suma waxt'äkaspas ukham luqtañataki, mä arunsti, sábado mä uru qhipatxa, pusi tunk llätunkani uru jakt'apxäta.

16Ukatsti sábado uru phuqhasxani ukampisti, phisqa tunka urunakäxaniwa. Ukapachaw jumanakax machaq trigot Tatiturux mä waxt'a luqtapxäta,

17utanakamatsti suma trigot levadurani lurt'at pä t'ant'a apapxäta, sapa t'ant'asti niya pusi kilonjamäniwa, ukasti nayraqata achunakamat Tatitur luqtäwïniwa.

18T'ant'anakamp chiksti, mä maran jan kamacht'at paqallqu urqu ovejanak apapxarakïta, mä urqu vacampi, pä urqu ovejampi, ukanakasti Tatitutak nakt'ayas luqtatäniwa, kuntix jumanakax granonakatsa, vinotsa waxt'a luqtapkäta ukanakatxa, mä suma q'apkir luqtarakïniwa.

19“Jucha luratanakatsti mä cabrito wilañchat luqtapxäta, sumankthapiñatakisti mä marani pä urqu oveja luqtapxarakïta.

20Sacerdotew uka uywanak mä suma q'apkir waxt'äkaspas ukham Tatit nayraqatan luqtani, t'ant'ampi, pä oveja apanipkäta ukanakamp chika. Ukanakax Tatitur luqtatäniwa, ukasti sacerdotetakïxarakiniwa.

21“Uka urusti jumanakax mä suma qullan tantachasïwi nayatakix lurapxäta, janirakiw uka urux kunanaksa irnaqapxätati. Kawkhansay jakasipkam, aka kamachisti jumanakatakisa, wawanakamatakis wiñayatakipunïniwa.

22“Kunapachatix achunak apthapkäta ukkhasti, trigo yapumatxa janipun jan mayan apthapisimti, trigo puyanak jalaqtirinaksa janirak pallthapisimti. Ukanakxa t'aqhin sarnaqirinakataki, jaya markat jutirinakatakiw jilt'ayäta. Nayätwa jumanakan Tatit Diosamaxa.”

Trompetanakampi phunchhäwi lurañxata(Nm 29.1-6)

23Tatitux Moisesaruw mayïna

24israelitanakar akham sañapataki:

“Paqallqüri phaxsina nayrïr uru saraqatarux jumanakax samarañ uru uruyapxäta, ukatsti suma qullan tantachasïwi lurapxarakïta trompetanak phust'asa.

25Uka urux jumanakax Tatituruw mä suma nakt'ata waxt'a luqtapxäta, janirakiw uka urux kuna irnaqäwinaksa lurapxätati.”

Juchat pampachatäñ katuqañ uru(Nm 29.7-11)

26Tatitux Moisesarux akham sarakïnwa:

27“Uka pachpa paqallqüri phaxsina tunka uru saraqatarusti, uka urux juchat pampachatäñ urüniwa. Uka urusti jumanakax mä suma qullan tantachasïwi lurapxäta, ukhamarak ayuno lurapxäta, Tatitutakisti mä waxt'a nakt'ayasina luqtapxarakïta.

28Uka urusti janipuniw kunanaksa irnaqapxätati juchat pampachatäña urütap layku, jumanakasti uka uruw Tatit Diosamat juchat pampachatäñ katuqapxäta.

29Khititix uka samarañ urun jan ayunkani ukasti, khitïskpasa, markap taypitxa apanukutäniwa.

30Ukhamarak khititix uka samarañ urun irnaqaskani ukasti, khitïskpasa, markap taypitxa apanukutäniwa.

31“Janipun uka urux kuna irnaqañanaksa lurapxamti. Kawkhansay jakasipkam, aka kamachisti jumanakatakisa, wawanakamatakis wiñayatakipunïniwa.

32Jumanakatakisti uka urux samaraña, ayuno lurañ ururakïniwa, uka phunchhäwi ursti uka phaxsina llätunka uru saraqataru jayp'u chiqat qalltapxäta, qhipüru pachpa jayp'u chiqar tukt'ayasa.”

Chhujllanakan phunchhäwi urup lurañxata(Nm 29.12-40)

33Tatitux Moisesaruw mayïna

34israelitanakar akham sañapataki:

“Uka pachpa paqallqüri phaxsina, tunka phisqani uru saraqatarusti, paqallqu uruw Tatitut amtasiñatak Chhujllanakan phunchhäwip lurapxäta,

35qallta urunsti mä suma qullan tantachasïwi lurapxäta. Janirak uka urun kuna irnaqañanaksa lurapxamti.

36Uka paqallqu urunakasti nakt'at luqtäwinak Tatitur churapxäta, kimsaqallqu urunsti mä suma qullana tantachasïwi lurapxäta, Tatiturusti mä waxt'a luqtapxarakïta. Uka urux qullan phunchhäwi uruwa, janipuniw uka urunxa kuna irnaqäwinakamsa lurapxätati.

37“Taqi uka urunakax Tatitutak satawa, jumanakasti uka urunakan mä suma qullana tantachasïwinak lurapxäta, Tatituruw waxt'anak nakt'ayasin luqtapxarakïta, granonakata, wilañchanaka, vinota waxt'anaka; kunjämarutix sapa uru wakiskani ukhamarjamaw churapxäta,

38jumanakasti uka churäwinakxa, kuntix sábado urun Tatitur churapxirïkta, ukhamarak chuymanakamatsa luqtapxirïkta ukanakat sipan yaqpun luqtapxäta.

39“Uka paqallqüri phaxsina, tunka phisqani uru saraqatarusti, kunapachatix jumanakax achunak apthapisxapxäta ukkhasti, Tatitutakiw jumanakax paqallqu uru mä phunchhäwi lurapxäta, qallta urunsa, ukhamarak kimsaqallqu uru purinipansa samart'asa.

40Qallta urusti kawkïri achunakatix quqanakan sumäkani ukanak apaqapxäta, palmeranakata, wali ch'uxñantat quqanakata, jawirankki uka saucenakat layminak apaqapxäta, ukatsti paqallqu urunakaw Tatit Diosaman nayraqatapan kusisipxäta.

41Sapa mararakiw paqallqu phaxsi saraqatarux paqallqu urunaka Tatitutaki mä phunchhäwi lurapxäta. Aka kamachisti jumanakatakisa, wawanakamatakis wiñayatakipunïniwa.

42Uka paqallqu urunakanxa jumanaka israelitanakax chhujllanakan jakapxäta,

43ukhamat taqi wawanakamax yatipxani kunapachatix israelitanakar Egiptot irpsunkäyäta ukapachax nayax chhujllanakan jupanakar jakayäyäta. Nayätwa jumanakan Tatit Diosamaxa.”

44Moisesax ukham israelitanakarux yatiyäna kuna urunakatix Tatitutak satäkis uka phunchhäwinak lurañ tuqitxa.