JEREMÍAS 17 - Qullan Arunaka DC

Judá markan juchapampi, mutuyäwipampi

1“Judá marka,

juchamax hierro cincelampi qillqantatawa,

qala chuymamxar diamante arimpi qillqantatawa,

altaranakamas juchanakamampi qillqantatawa.

2Wawanakamasti uka altaranakata,

uka qullan lawanakat amtasipxi,

kawkïrinakatix jach'a quqanak k'uchunakana,

qullunak patanakana,

3pampankir qullunakan utjkäna

ukanakat amtasipxi.

Juchanakam laykusti,

qamir yänakamsa, imasitanakamsa,

uraqiman utjir qullan qullunakamsa

q'al lunthatjayäma.

4Jumar churksma uka uraqsti

apanukuwayañamawa,

ukatsti jumax jan uñt'ktas uka uraqinxa,

uñisirinakaman t'aqhisiyatap tukuyäma,

phiñasiñaxasti ninjamaw aqti,

uka ninaw nakhantarakïtam.”

Walja yatiyäwinaka

5Tatitux sarakiwa:

“Ñanqhachatäpan jaqinakar alkatasirixa,

ñanqhachatäpan pachpa ch'amapar alkatasirixa,

ñanqhachatäpan nayat jayarst'ir jaqixa.

6Ukasti wasarankir ch'aphir uñtatawa,

jan uman jaytjata,

qalanak taypin jili,

jayu uraqin jili,

kawkhantix jan khitis jakkix ukkhana.

7“Ukampis nayar iyawsirix qullanawa,

taqi suyt'añap nayar uchatap layku.

8Jalir umani jawir thiyar ayruntat quqjamäniwa,

saphinakapasti uka uma tuqir saphintatawa,

lupin qhatintatapas janiw ñanqhachkiti,

laphinakapas ch'uxñakipunïskiwa.

Waña pachansti janiw mayjt'askiti,

marpacharakiw achunakap churi.

9“Jaqin chuymapjam ñanqha, sallqjirix janiw utjkiti.

¿Khitis ukan ukhamätap amuyt'aspa?

10Naya, Tatituwa, jaqin chuymap uñjta,

chuyma manqhapan amtatanakapsa yattwa;

sapa maynirus luratanakaparjamaw mutuyarakï.”

11Sallqjañampi qamiriptirinakaxa,

uka qamir yänakap q'al apt'asipxani,

walïkasinsa, jan kunaniw uñjasipxani.

12Jiwasan templosax qullan qunuñawa,

qalltatpach wali jach'ar aptata.

13Tatay, jumaw Israelan suyt'añapätaxa.

Taqi jumar apanukuristi p'inqachjatäniwa.

Taqi jumat jayarst'iristi

thayan apat laq'jamaw chhaqtxani,

juma, suma jalir umjam Tatitur apanukutapata.

Jeremiasax Tatituruw mayi

14Tatay, jumakiy qullxatt'ita,

ukatsti qullatäxäwa;

jumakiy qhispiyita,

ukatsti qhispitaw uñjasï,

juma saparukiw yupaycharaksma.

15Jaqinakasti sapxituwa:

“¿Kawkirak Tatitun arsutapasti?

¡Jichpachay phuqhaspan!” sasa.

16Tatay, ukampis janiw nayax

aka markamar mutuyañam mayksmati;

jan ukasti, nayax oveja awatirjamaw

aka markarux imarakta.

17Janiy nayatakix axsarkañ tukumti,

jan walt'añanakaxansti nayan arxatirixätawa.

18Uñisirinakaxar mä p'inqa uñjasiyam,

nayarusti jan ukham tukuyistati;

jupanakax axsarañatsa wal khathatipxpan,

nayarusti jan axsarayistati.

Jupanakxar t'aqhisiñanak apayanim,

mäpit jupanakar q'al tukjam.

Sábado uru imañxata

19Tatitux sarakituwa: “Saram, ukatsti Marka Mantañ punkur sayt'asim, kawki chiqtix Judá uraqin reyinakapax mantapki, mistupkaraki ukkharu, ukhamaraki Jerusalenan yaqha punkunakapar sayt'asir saram.

20Jaqinakarusti sarakim: ‘Reyinaka, Judá uraqinkir taqi markanaka, Jerusalenankir taqi jaqinaka, aka punku chiqa mantirinaka, Tatitun arunakap ist'apxam.

21Tatitux siwa: Jumanakan jakañanakam laykusay, sábado urun jan kuna q'ipinaksa apapxamti, janiraki Jerusalén markan punkunakap chiqsa apantapxamti.

22Janiraki sábado urun utanakamat q'ipinak apsupxamti, jan kunsa uka urux lurapxamti. Uka sábado uru nayar luqtanipxita, kunjämtix nayra awkinakamaru siskäyäta ukarjama.

23Ukampis jupanakax janiw nayarux ist'apkitänti, janirakiw jaysapkitänsa, jan ukasti jupanakax qala chuymanïpxänwa, janiw nayar ist'añ munapkitänti, janirakiw yatiqañsa munapkänti.

24“ ‘Naya, Tatituw ak arsta: Chiqpachapun ist'apxita, sábado urun janipun kuna q'ipinaksa markan punkunakap chiqa apantapxamti; uka ursti nayar luqtanipxita, janirak uka urun kuna irnaqañsa lurapxamti.

25Ukhamtix lurapxäta ukkhasti, Davidan qunuñapar qunt'asir reyinakax utjapuniniwa, aka markan punkunakap chiqsti jupanakax carronakxata, caballonakxata taqi jilïrinakampi chikt'ataw mantapxani, Judá uraqinkiri, Jerusalén markan utjir taqi jaqinakapampi kuna. Jerusalén markansti jaqinakax utjaskapuniniwa.

26Judá uraqita, Jerusalén marka jak'an utjir markanakatsti jaqinakax walipuniw jutapxani, Benjamín uraqitsa, quta iramatsa, qullu tuqinakatsa, Néguev tuqinakatsa. Tatitun utaparusti wilañcha luqtañatakiw uywanak apanipxani, granonakatsa, inciensonakatsa luqtäwinak churapxani, yuspagarañ luqtäwinak churapxarakini.

27Ukampisa, jumanakatix nayan arunakax jan ist'apkitäta, nayan sábado samarañ urunsa uka q'ipinakam Jerusalén markan punkunakap chiqa apantasipkakïta ukkhaxa, nayax Jerusalén markan punkunakap ninampiw q'al phichhantä, uka ninasti Jerusalenankir reyin utanakapsa q'al nakhantani, janirakiw khitis uka nin jiwaraykaniti.’ ”