JUECES 1 - Qullan Arunaka DC

I. PÄ QALLTA ARUNAKA1. Israelitanakan Canaán uraqir utjnuqtatapa(1.1—2.5)Judá, Simeón chachanakax Adonisédec reyiruw katuntapxi

1Josué chachan jiwxatapatsti, israelitanakax Tatituruw jiskt'apxäna, kawkïr ayllus nayraqata cananeo jaqinakampi nuwasispa uk yatiñataki.

2Tatitusti jupanakarux sänwa: “Judá ayllunkiriw nayraqat nuwasiñapa, nayax jupanakaruw uka uraqi katuyä” sasa.

3Ukatsti Judá ayllunkirinakax Simeón ayllunkir jilanakaparuw jawsäna, jupanakamp mayacht'asis Judá ayllur wakt'kki uka uraq katuntasiñataki. Simeón ayllunkirinakasti Judá ayllumpi mayacht'asiñatakix iyawsapxänwa,

4-5ukhamaw Judá ayllunkirinakax cananeonakana, ferezeonakan uraqinakap katuntasipxäna, Tatituw jupanakan amparanakaparux katuyäna. Bézec chiqansti tunka waranqa jaqinakaruw atipjapxäna, jupanak taypinsti Adonisédec reyiw jikxatasïna.

6Adonisédec reyix jaltxänwa, ukampis jupanakax arktasin katjanipxäna, ukatsti juparux amparanakapata, kayunakapat tayka luk'ananak khariqapxäna.

7Ukat Adonisédec reyix säna: “Nayrax paqallq tunka reyinakaruw amparanakapata, kayunakapat tayka luk'ananak khariqta, jupanakarux manq'añaxat williqtki uka jilt'anak pallasiyta. Jichhasti Diosax nayaruw kunjämtix nayax jupanakar lurkäyäta uka lurarakitu” sasa. Ukatsti Jerusalén markaruw irpxapxäna, ukan jiwxäna.

Judá ayllunkirix Hebrón, Jerusalén markanak katuntapxi

8Judá ayllunkirinakax Jerusalén markar chhukt'asin katuntasipxäna, ukatsti taqpach jaqinakapar espadampkam jiwarayasasti, ninampiw uka marka phichhantapxäna.

9Ukatsti jupanakax, qullunakana, Négueb uraqinakana, pampanakan jakiri cananeo jaqinakaruw katuntapxäna.

10Ukatsti Hebrón markan jakapkän uka cananeo jaqinakampi nuwasiriw sarapxarakïna, nayrasti uka markax Quiriat-arbá satänwa, ukansti Sesai, Ahimán, Talmai sat cananeo tamanakaruw atipjapxäna.

Otoniel chachax Debir marka katunti, Acsa sat tawaquruw warmipäñapatak katuqaraki(Jos 15.15-19)

11Ukatsti Judänkirinakax Debir marka tuqiruw sarantapxäna, uka markax nayrax Quiriat-séfer satänwa.

12Caleb chachasti sänwa: “Khititix Debir markar atipjasin katuntkani ukarusti, nayax Acsa sat phuchhax warmipäñapatakiw churä” sasa.

13Uka markaru atipjirix Otoniel chachänwa, jupasti Quenaz chachan yuqapänwa, Caleb chachan sullka jilaparakïnwa; ukat Caleb chachax Acsa phuchhapa warmipäñapataki churäna.

14Otoniel chachax Acsa warmimpi chikäxasinsti, awkipat uraq mayiñapatakiw iyawsayäna. Caleb awkipax, Acsa phuchhapan asnot saraqir uñjasinsti, jiskt'änwa:

—¿Kunas kamachtam? —sasa.

15Phuchhapasti sänwa:

—May achikt'asiñ munsma, niyakixay jan umani uraqinak churchistaxa, jichhax uma jalsunakay churarakita —sasa.

Caleb awkipasti amsta chiqankiri, aynach chiqankiri uma jalsunak churäna.

Judá, Benjamín ayllunakan uraqinak katuntapxatapa

16Moisesan awkch'ipat saraqiri quenita wawanakapasti, Judá ayllunkirinakamp chikaw Jericó markat mistupxäna, ukatsti Arad sat chiqankki uka wasararuw sarapxäna, ukan jupanakax ukankir jaqinakamp jakiri qhiparapxäna.

17Ukatsti Judá ayllunkirinakax, Simeón ayllunkirinakampiw kunjämtix amtapkatayna ukhamarjam sarapxäna, ukatsti jupanakax Sefat chiqan jakapki uka cananeonakaruw atipjapxäna, q'alpun uka markarux tukjapxäna. Ukat uka chiqarux Hormá sutimpi uchapxäna.

18Ukampisa, janiw Gaza, Ascalón, Ecrón chiqanak katuntapkänti, janirakiw uka jak'a markanakan uraqinakapsa katuntañatak ch'amanïpkänti.

19Tatitux Judá ayllunkirinakamp chikäkchïn ukasa, jupanakax qullu uraqinak katuntapkchïn ukasa, janiw pampa uraqinakan jakirinakarux jaqunukurjamäpkänti, uka jaqinakan hierrot lurat carronakanïpxatap layku.

20Caleb chacharux Hebrón uraqiw wakt'äna, kunjämtix Moisesax arsuwaykatayna ukhamarjama, Caleb chachasti uka uraqit Anac sat jach'a tansa jaqit saraqir kimsa yuqanakaparuw alisnuküna.

21Benjamín ayllunkirinakasti, janiw Jerusalén markata ukan jakiri jebuseo jaqinakarux alisnukurjamäpkänti. Ukat jichhürkama jebuseonakampi, Benjamín ayllunkirinakampix Jerusalén markan jakasisipki.

José sat ayllunkirinakax Betel marka katuntapxi

22-23José sat ayllunkirinakax Betel marka katuntañatakiw amtapxi, uka markasti nayrax Luz satänwa, ukatsti uñaqirinak ukar khithapxäna. Tatitusti jupanakarux yanapt'änwa.

24Uka uñaqirinakasti markat mä jaqir mistusinkir uñjapxäna, juparusti sapxänwa: “Jumatix kawkha chiqasa markar mantaña uk uñacht'ayapxität ukaxa, nanakax janiw kunsa kamachapkämati” sasa.

25Uka jaqisti, kawkha chiqatix markar mantañäki uk uñacht'ayäna, ukatsti uñaqir jaqinakax espadampkamaw uka markan jakirinakarux jiwarayäna; ukampis uñacht'ayiri jaqimpiru, wila masinakapampirux janiw jiwayapkänti.

26Ukhamasti uka jaqix hititanakan uraqiparuw sarxäna, ukan jupax mä machaq marka sayt'ayäna, ukarusti Luz sasaw sutichäna, uka markasti jichhürkamaw uka sutimpi uñt'atäski.

Manasés, Efraín ayllunakax katuntapkän uka uraqinakan qurpanakapa

27Manasés ayllunkirinakax janiw Bet-seán, Taanac, Dor, Ibleam, Meguido markanakan jakiri jaqinakaru alisnukupkänti, janirakiw uka jak'an jisk'a markanakan jakiri jaqinakarus alisnukupkänti, ukhamïpansti cananeonakax uka uraqinakan jakasipkakïnwa.

28Kunapachatix israelitanakax wali ch'aman tukxapxän ukkhaxa, cananeonakarux wali ch'ama irnaqañaruw uchapxäna, ukampis janiw uka uraqit alisnukurjamäpkänti.

29Efraín ayllunkirinakasti janirakikiw Guézer markan jakiri cananeo jaqinakar alisnukuñatakix ch'amanïpkänti, ukhamasti cananeonakax jupanak taypin jakasipkakïna.

Maynïr ayllunakan uraqinak katuntapxatapa

30Zabulón ayllunkirinakasti janirakikiw Quitrón, Nahalal markanakan jakir cananeonakarux alisnukurjamäpkänti, ukhamïpansti cananeonakax jupanak taypin jakasipkakïna, wali ch'ama irnaqäwinak lurayapkchïn ukasa.

31-32Aser ayllunkirinakasti janirakikiw Aco, Sidón, Ahlab, Aczib, Helbá, Afec, Rehob markanakan jakir cananeonakaru alisnukuñataki ch'amanïpkänti; uka markanakat jan alisnukupxatap laykusti, jupanak taypin jakiriw qhiparapxäna.

33Neftalí ayllunkirinakasti janirakikiw Bet-semes, Bet-anat markanakan jakir cananeonakarux alisnukuñatak ch'amanïpkänti, ukampis jupanakar wali ch'ama lurañanak lurayapkchïn ukasa, jupanak taypin jakasipkakïna.

34Amorreo jaqinakax, Dan ayllunkirinakarux qullunak tuqiruw kutjtayäna, janiw pampa chiqanakarux saraqayapkänti.

35Ukhamaw amorreonakax Jeres, Aialón, Saalbim markanakan jakasipkakïna. Ukampis kunapachatix José ayllunkirinakax wali ch'aman tukxapxän ukkhaxa, amorreonakarux wali ch'ama lurañanakaruw uchapxäna.

36Amorreonakan qurpapasti, Acrabim amstat qalltasin Selá chiqakamänwa, uka chiqatsti alaykam makhataskakïnwa.