ISAÍAS 1 - Qullan Arunaka DC

I. NAYRÏR JALJA(1—39)1. Jerusalén markata, Judá markat yatiyäwi arunaka(1—6)Judá markax jucharar markawa

1Tatitux Isaías profetaruw parlxayäna, jupasti Amós chachan yuqapänwa, israelitanakax Judá uraqin jakapkäna ukanakar yatiyañapatakiw walja yatiyäwinak churäna. Kunapachatix Uzías, Jotam, Ahaz, Ezequías uka reyinakax Judá marka apnaqapkäna uka maranakan Isaías profetax aka arunak Tatitut katuqäna.

2Alaxpachampi, akapachampi,

ist'apxam kuntix Tatitux siski uka:

“Wawanak jilarañapkamaw uywasta,

ukampis jupanakax

nayatakikiw sayt'asxapxi.

3Urqu vacax jaqiparux sum uñt'asi,

asnosti jaqipan uywa uyupxa uñt'asirakiwa;

ukampis Israel, nayan markaxaxa,

janiw uñt'askiti,

amuyt'askxarakisa.”

4¡Ay, jucharar jaqinaka,

ñanqhampi phuqhantat marka,

ñanqhanak lurir jaqinakat saraqirinaka,

jan ist'asiri ñanqha wawanaka!

Tatitut jayarst'atäpxtawa,

Israelan Qullan Diosaparux

apanukuwayapxtawa,

qhiparuw kutt'awayxapxta.

5Jumanakax Tatitur saykatañakpin munasipktaxa,

janchinakaman janiw kawkhat jawq'antañas utjkxiti.

P'iqimax q'ala chhuxriñchjatawa,

ch'amamas janirakiw utjkxiti.

6Kayumat qalltasin p'iqikamax

janiw kawkhas k'umaräkxiti;

taqpach janchimax q'ala chhuxriñchjatawa,

p'usuntata, llixtjtatarakiwa;

jan khitinsa qullxatt'ata,

janirak ch'uqxatt'ata,

usuyasitanakamsa janirakiw

khitis aceitempi qullxatt'as samart'aykiti.

7Israel uraqix q'ala tukjatawa,

markanakapas ninan nakhantatawa.

Jumanakan uñjkataw uñisirinakamas

yapuchatanakam manq'antapxi.

Taqi uraqpachaw wasarar tukuyata,

mä uñisir markan ejercitopaw

ukham tukjawayi.

8Jerusalén markakiw uka t'unjatäñat qhispiwayi,

ukampis apanukut markaw uñjasiwayi,

melón yapunak uñjañ mä chhujllar

sapak apanukutjama,

uñisirinakapan muyuntat markjama.

9Naya, taqi ch'aman Tatitutix jan mä qawqhansa qhispiykiriskäyätxa,

Jerusalén markax q'ala tukjatäsapänwa,

Sodoma, Gomorra uka markanakjam t'unjatäsapänwa.

Diosar chiqpach yupaychaña

10Sodoma markan jilïrinakapa,

Tatitun arunakap ist'apxam.

Gomorra markachirinaka,

Tatituxan yatichäwinakap ist'apxam.

11Tatitux siwa:

“¿Kunatakis ukataq wilañchanak apanipxta?

Jumanakan urqu ovejanakampi

wilañcha luqtapxatamampix qaritäxtwa,

lik'i vaca qallu luqtatanakamampis qaritäxaraktwa;

urqu vacanakana, urqu ovejanakana, cabritonakan wilanakapax axtasiyituwa.

12Nayar yupaychiriw jutapxtaxa,

ukampis janiw uka uywanak

apanipxañamatak mayipksmati,

jumanakax utax q'añuchirikiw jutapxtaxa,

nayatsa phiskasipxarakistawa.

¡Utaxat sarapxam!

13-14¡Nayatakix uka luqtanakamax

jan kunatak askiwa!

¡Janiw apanipxañam munkxti!

Inciensonaksa janirak q'aphicharapipxistati,

uka q'aphinakax nayatakix janiw askïkxiti.

Machaq phaxsi, samarañ uru

phunchhäwinakamsa, janiw munkti,

Jan wali jaqinakan tantachasitapsa

janirakiw munkti.

Uka luratanakam nayax wal uñista,

janipuniw jumanakat kuns yatiñ munkti.

15Jumanakax wal mayisipxtaxa,

amparanakam luqtasaw mayisipxtaxa,

ukampis nayax janiw uñjapksmasa, ist'apkaraksmasa.

¡Jaqinak jiwayapxatamatxa,

luqtapkta uka amparanakamaxa,

wilampi q'añuchjatawa!

16“¡Jariqasipxam, q'umachasipxarakim!

¡Uka ñanqha lurañanakamsti nayraqataxat jayar apapxam!

¡Ñanqha lurañanaksti apanukupxarakim!

17¡Aski lurañanak yatiqapxam,

kunatix chiqapäki uka lurañatak ch'amachasipxam,

t'aqhisiyatanakarus yanapt'apxam,

wajchanakarus chiqapar uñjapxam,

ijma warminakarus arxatapxarakim!”

18Tatitusti siwa:

“Jutapxam, uka jan wali luratanakamat parlapxañäni.

Juchanakamax wila samir uñtatäkchinisa,

nayax khunjam janq'uruw tukuyä;

ch'iyar wila isir uñtatäkchinisa,

nayax janq'u t'arwar uñtat tukuyä.

19Jumanakatix jaysapxitäta ukaxa,

kuntix uraqin sum achki ukanakat manq'asipxäta,

20nayatak sayt'asisipkakïta ukasti,

mä nuwasïwin jiwarapxäta.”

Pachpa Tatituw uk arsu.

Tatitux Jerusalén markarux q'umachaniwa

21¡Chiqa lurir Jerusalén marka,

kunjämatarak yaqha chachanakampi sarnaqir warmjam tuktasti!

Nayrax taqi jaqinakamax aski lurirkamakïnwa,

chiqapan sarnaqirkamakïnwa,

jichhasti taqinis jaqi jiwayirkamakiwa.

22Nayrax mä suma qullqjamäyätawa,

jichhasti q'añu t'unar tukutätawa,

suma vinor uñtatäyätawa,

jichhasti k'allk'u umar tukutakïxtawa.

23Jilïr apnaqirinakamas nayatak sayt'asirkamakiwa,

lunthatanakampis suman jakasipxi.

Taqinis qullqi chilltayasirkamakiwa,

waxt'äwinak katuqañak munasipki.

Wajcharux janiw chiqapar uñjapkiti,

ijma warminakarus janirakiw chiqapar uñjapkiti.

24Ukatpï taqi ch'aman Tatituxa,

Israel markan taqi ch'aman Tatitupax sixa:

“¡Ukkhakamaki! Nayaw uñisirinakaxarux juchañchä,

jupanakarusti ukhamat ukham lurjä.

25Wasitat jumatakix amparax aytä,

q'añu luratanakamsti ninampiw nakhantayä,

q'añuchasitamat q'uma tukuyäma.

26Kunjamäkäntix nayra taripirinakax uk kuttayxarakïma,

amuyt'ayirinakamasti qalltan kunjamäpkäntix ukhamäxapxaniwa.

Taqi ukanak lurkä uka qhipatsti sapxarakïtamwa:

‘Aski lurir marka’ ‘Chiqpach marka’ sasa.

27Jerusalén markan utjasirinakatix wasitat jaysxapxitanixa,

naya pachpaw jach'a ch'amaxampi uka jach'a t'aqhisiñat qhispiyä;

28ukampis nayar saykatirinakampiru,

juchararanakampirux akch'a akch'a tukjä,

nayar apanukurinakasti jiwarapxaniwa.

29Jumanakasti uka quqanakatxa,

panqar yapunakamatsa,

wal kusisipxäyätaxa,

jichhasti, ukanakat p'inqasipxätawa,

uka chiqanakan yaqha diosanakarux yupaychapxäyätaxa.

30Jumanakax ankuntat laphinakan quqar uñtataw tukupxäta,

jan umani panqar yapur uñtatarakiw tukupxäta.

31Jumanakat ch'aman jaqisti,

wichhjamaw ninan nakhantani,

jupan luräwinakapatsti, jupa pachpatsa,

janiw kunat amtasiñas utjkxaniti.”