JOB 1 - Qullan Arunaka DC

I. QALLTA ARUNAKA(1—2)Job chachan t'aqhisitapa

1Uz sat chiqan mä chachaw utjäna Job sutini. Jupasti aski, chiqa jaqïnwa, Diosar axsartirïnwa; ñanqha lurañatsa jithiqtatarakïnwa.

2Job chachax paqallqu yuqani, kimsa phuchhanïnwa,

3jupax paqallqu waranqa ovejani, kimsa waranqa camelloni, phisqa pataka yunta vacani, phisqa pataka asnonakanïnwa. Walja uywatanirakïnwa. Jupasti inti jalsu tuqinkir jaqinakat wali qamirïnwa.

4Job chachan yuqanakapax sapa mayniw urupan jach'a manq'äwinak utapan lurapxirïna, uka manq'äwirusti kimsa kullakanakap jawsapxirïna, jupanakamp chika kusisipxañapataki.

5Uka manq'äwi qhipatsti, Job chachax wawanakap jawsayasinxa, wali willjtat sartasin nakt'at wilañchanak luqtirïna, ukhamat sapa mayni jupanakan juchanakapat q'umachatäñapataki, jupax chuymapan sänwa: “inampisa wawanakaxax jucha lurapxchi chuymanakapan Tatitur ñanqhachasina” sasa.

6Mä urux Tatitun ukaruw uñstir jutapxäna alaxpachan luqtirinakapaxa, jupanakamp chikasti juchañchir angelax jutarakïnwa.

7Tatitusti juchañchir angelaruw jiskt'äna:

—¿Kawkitsa jumax jutta? —sasa.

Juchañchir angelasti sänwa:

—Nayax uraqi maysat maysa muytanïwit jutaskta —sasa.

8Ukat Tatitux juchañchir angelar sarakïna:

—¿Job luqtirixar uñjaniwaytati? Janiw khitis jupjamax uraqin utjkiti. Jupax chiqap jakiri aski jaqiwa, Diosar axsartiri, jan wali lurañat jithiqtatawa —sasa.

9Ukxaruw juchañchir angelax sarakïna:

—Jupax janiw inak jumar luqtktamti.

10Jumax janiw khitin jupar llamkt'añapsa munktati, utapankirirusa, kuna yänakapatix utjki ukanakarusa; jumax taqi luratanakaparuw askimp phuqt'araktaxa, ukat jupax taqi aka uraqin walja uywanakani qamir jaqixa.

11Kunanakapatix utjki ukanak apaqxam, ukapachaw uñjäta kunjämtix ñanqhachkätam ukxa —sasa.

12Tatitusti juchañchir angelarux sarakïnwa:

—Ukhamax walikiwa. Kunjämarutix jumax Job chachan taqi yänakapamp lurañ munkta ukhamar luram, ukampis juparux janiw kuna jan walsa lurätati —sasa.

Ukat juchañchir angelax Tatitun nayraqatapat sarawayxäna.

13Mä urusti, Job chachan yuqanakapampi, phuchhanakapampix mä jach'a manq'äwin jikxatasisipkäna jilïri jilapan utapana, ukchañkamasti

14mä jaqiw Job chachan utapar purinïna akham sasa:

—Nanakax vacanakampiw yapu qhullisipkäyäta, asnonakasti uka jak'an manq'asipkäna,

15ukatsti akatjamat sabeo sat jaqinakax jutasin uywanak lunthatawayapxitu, uywatanakarusti cuchillompkamaw jiwaräwayapxi. Naya sapakiw jumar yatiyir jaltanxta —sasa.

16Uka jaqix janïraw parlañsa tukuykänti, ukhamaruw maynix purinirakïna akham sasa:

—Mä qhixu qhixuw awatirinakampiru, ovejanakampir jiwarayi. Naya sapakiw jumar yatiyir jaltanxta —sasa.

17Uka jaqisti janïraw parlañsa tukuykänti, ukhamaruw maynix purinirakïna, akham sasa:

—Kimsa tama caldeo jaqinakaw jutasin katuntapxitu, ukatsti camellonak lunthatawayapxi, uywatanakarusti cuchillompkamaw jiwaräwayapxi. Naya sapakiw jumar yatiyir jaltanxta —sasa.

18Ukham parlkipan maynix purinirakïna, akham sasa:

—Yuqanakamampi, phuchhanakamampix, jilïri yuqaman utapan mä jach'a manq'äwinkasipkänwa,

19ukhamaruw akatjamat wasar tuqit thayax thayt'anisin utar pusi tuqitpach unxtayi, ukatsti jupanak patxaruw allxattayi. Jupanakasti taqiniw jiwarapxi. Naya sapakiw jumar yatiyir jaltanxta —sasa.

20Job chachasti uk ist'asin, sayt'asïna, ukat wali llakt'ataw isinakap ch'iyanuqasïna, ñik'utapsa mururasïnwa, ukatsti uraqir puriñkamaw Diosar yupachañatak alt'asïna.

21Ukat säna:

—Nayax taykaxan purakapat q'alalakiw yurta, q'alalakirakiw sarxä. Tatit Diosaw taqi kun churitu, Tatituw apaqasxarakitu. ¡Tatitun sutipax jach'añchatäpan! —sasa.

22Ukhamäkipansa, Job chachax janiw jucha lurkänti, janirakiw Diosarus ñanqhachkänti.