SALMOS 103 - Qullan Arunaka DC

SALMO 103Tatituruw jach'añchä 1a Davidan q'uchupa.

1 Taqpach chuymaxampiw Tatitur jach'añchä,

taqpach chuymaxampiw qullan sutip jach'ar aptä.

2Taqpach chuymaxampiw Tatitur jach'añchä,

janiw khuyapayasiñapat armaskäti.

3Tatituw taqpach juchanakaxat pampachitu,

jupaw taqi usunakaxat k'umarachitu,

4jupaw amay imäwit qhispiyitu,

juparakiw munasiñamp phuqt'itu,

5Tatituw askinakamp kusisiyitu,

pakar uñtat machaqar tukuyarakitu.

6Tatitux chiqaparuw uñji,

t'aqhisir jaqinakaruw arxati;

7Moisesaruw thakhip yatichäna,

Israelan wawanakaparusti

muspharkañ luräwinakap uñachayäna.

8Tatitux munasiriwa, khuyapayasiriwa;

janiw mäk q'apisirïkiti,

khuyapayasiñan phuqhantatawa.

9Janiw wiñay tuqinuqkistuti,

janirakiw wiñayas tima amxäskiti;

10janiw jucha luratasarjam t'aqhisiykistuti,

janirakiw juchanakasatjam mutuykistuti;

11kamisatix alaxpachax uraqit jayankixa,

ukhamaw munasiñapax arkirinakapatakixa.

12Kamisatix inti jalsut inti jalantkam wali jayaxa,

ukham jiwasanakat juchanakas jayarst'ayistu.

13Kunjämatix mä awkix wawanakapat khuyapayaski,

ukhamaw Tatitux iyawsirinakapat khuyapayasi;

14jupaw yati jiwasanakax kunat luratätansa uka:

jupax ask yati laq'at luratätasxa.

15Jaqin jakañapax qurar uñtatakiwa;

pampankir panqarar uñtatakiw panqarsu:

16may thayax thayt'anki ukatsti, q'alaw jiwsuwayxi,

janirakiw khitis jupat juk'amp yatkxiti.

17Tatitur waqaychirinakatakisti

munasiñapax wiñayawa;

aski kankañapax

wawan wawapatakis utjaskakiwa,

18arust'äwiparjam sarnaqirinakataki,

arsutanakaparjam phuqhirinakataki.

19Tatitux alaxpachan qunuñap utt'ayasi,

ch'amapampiw alaxpach akapach apnaqi.

20¡Wali ch'aman angelanaka,

Tatitur jach'ar aptapxam!

Arsutanakap phuqhirinaka,

arupar jank'ak jaysirinaka,

Tatitur jach'añchapxam!

21¡Tatitun alaxpach tamanakapa,

jupar jach'añchapxam,

munañap phuqhir luqtirinakapa,

jach'ar aptapxam!

22¡Taqpach luratanakapa,

Tatitur jach'añchapxam,

jupan apnaqat uraqpachan

jach'ar aptapxam!

¡Taqpach chuymaxampiw Tatitur jach'añchä!