GÁLATAS IGLESIANAKAR QILLQATAPA - Qullan Arunaka DC
IGLESIANAKAR QILLQATAPAQALLTA ARUNAKAAka qillqatax romanonakar qillqatäki niy ukar uñtatawa, ukansti Pablox Diosampi sumankthapiñax iyawsañ tuqiki utjatapat wayt'i, Romanonakar qillqatanxa, akanakat janiw sum qhanstkiti, ukampis Gálatas qillqatanxa, kamachin maynïr luräwipax qhanstiwa, ukasti circuncisión katuqaña satarakiwa. Romankir iglesiat sipansa, Pablox Galaciankir iglesianak utt'ayatayna, Asia Menor uksa uraqina; uka iglesianakan jan walt'añanak utjatapasti Pablorux llakisiyänwa. Galacia markan Pablox Criston qhispiyasiñ arunakapat parlawaykän uka qhipatxa, yaqha jaqinakaw mantantapxäna, uka jaqinakasti Diosampi sumankthapiñatakix Moisesan kamachiparjam phuqhañ wakisitapat parlapxäna, juk'ampis circuncisión luräwi phuqhañ wakisitapat parlapxäna. Uka yatichäwinakasti, kuntix Pablox qhispiyasiñ arunakat parlkän ukar jan walt'ayirïnwa, jan judiöpkis uka iyawsirinakarus kamachirjam phuqhayañ munapxatap layku. Ukhamarus uka jaqinakax Pablon munañanïñ kankañap contraw yatichapxarakïna.Pablox Galaciankir iyawsirinakaruw qillqäna, jupanakan iyawsañatsa, chiqa luräwinakatsa maysar saranukupxatapata. Qallta arunak qhipatxa (1.1-10), Pablox apóstol kankañapat arsusïna, uksti Tatit pachpat katuqäna suma yatiyäwi arunak parlañampi chikt'ata; janiw jaqinakat katuqkänti, janirakiw yaqha apostolunakatsa katuqkänti. Tatitut katuqat luräwisti, uka qhispiyasiñ arunak jan judiöpkis uka jaqinakar parlañatakïnwa (1.11—2.21). Ukatsti Pablox uka qhispiyasiñ arunakan chiqätapat amuyt'ayaraki, Cristor iyawsañ tuqiki qhispiyasiñ katuqañan utjatapata (3.1—4.31).Ukxarusti Pablox jan payachasisaw parlaraki, qhispiyat sarnaqañ taqinirus Criston churatapa, taqi chuymampiw Galaciankirinakan ist'asiñapatak parli, jupanakan uka qhispiyat sarnaqäwin jakapxañapataki, janirak wasitampi kamachin luräwinakapampi, saranakapampis t'aqhisiyatäpxañapataki; ukatsti Cristor iyawsañ tuqi utjki, uka munasiñarjam jakapxañapatakiw ixwt'araki (5.1—6.10). Tukuyäwipansti Pablox pachpa amparapampi qillqata jupan wali uñt'at arunak qhanañchi: “Jiwasatix Cristo Jesusampi mayakïstanxa, circuncisión katuqañasa, jan katuqañasa, janiw kunatakis askïkiti; ukatsipana, machaq jaqir tukuñasaw askixa” (6.15) sasa.
