RUT 1 - Qullan Arunaka DC

Elimélec chachax warmipampi, wawanakapampix Moab uraqin jikxatasi

1-2Israel markax jilïr jaqinakan apnaqatäkäna ukapachaxa, taqi uksa tuqinakan mach'aw utjäna, uka maranakan janiw manq'añax utjkänti. Ukhamïpansti, Judá markankir Belén markata, Elimélec chachax Moab jach'a markaruw warmipampi, pä wawapamp jakir sarxäna. Warmipax Noemí sutinïnwa, maynïr wawapax Mahlón sutini, maynïristi Quelión sataraki. Jupanakax Belén jisk'a markankirïpxänwa, Moab markar purisasti ukan jakxapxarakïna.

3Mä qawqha pachatsti, Elimélec chachax jiwxänwa, Noemí mamasti pä yuqapampikiw qhiparxäna.

4Uka qhipatsti, Mahlonampi Quelionampix moabita tawaqunakampiw jaqichasipxäna, maynix Orfá sutinïnwa, maynisti Rut sutiniraki. Niya tunka mara qhipatsti,

5Mahlonampi Quelionampix jiwxapxarakïnwa, Noemí mamasti sapakiw qhiparxäna jan chachani, jan yuqanakani.

Noemí mamampi, Rut warmimpix Belén markaruw sarapxi

6Mä urusti, Noemí mamax Moab markan suma yatiyäwi ist'äna, Tatitux Israel markapat khuyapt'ayasitapa, mach'a maranakasti tukusxataparaki.

7Ukat Noemí mamax Judá markar kuttxañ amtäna. Kawkhantix jakapkäna uka chiqat yuxch'anakapamp chikaw sarxäna.

8Thakhinjam sarkasasti, Noemí mamax yuxch'anakaparuw säna:

—Jumanakax sarxapxam, utanakamar taykanakam thiyar kutt'xapxam. Tatitux jumanakat khuyapayaspan, kunjämtix jumanakax nayatsa yuqanakaxatsa khuyapasipkista ukhama,

9Diosax munpan jumanakan wasitat jaqichasipxañama, sapa maynin utaparuy kusisiñ churarakpan —sasa.

Ukatsti, Noemí mamax sapa mayniruw jaytawayxañatak jamp'att'äna, jupanakasti wal jachapxäna,

10sapxarakïnwa:

—¡Janiwa! ¡Nanakax jumamp chikaw markamar sarañ munapxta! —sasa.

11Noemí mamasti saskakïnwa:

—Wawanakaxay, kutt'xapxam, ¿kunatakirak nayamp chik sarañ munapxtasti? Janiw nayax juk'amp wawanïkxäti jumanakamp jaqichasiñapatakixa.

12Sarxapxam, utanakamar kutt'xapxam. Nayax wasitat jaqichasiñatakix taykäxtwa, jichha arumpach jaqichasirista, ukat wawanakanïrista ukasa,

13jumanakax, ¿jupanakamp jaqichasiñatak jilsupxañapkam suyapxasmati? ¿Jupanak suyañ laykukit wasitat jan jaqichasipkasmasti? Wawanaka, janiw ukhamäkaspati. Tatitux nayar wali llakisiñanak apayanitu, nayax juk'ampi llakisirista jumanakar t'aqhisir uñjasaxa —sasa.

14Uk ist'asasti yuxch'anakapax juk'amp jachapxäna. Ukatsti, Orfá warmix taykch'ipar jamp'att'asin kutt'awayxäna. Ukampis Rut warmix taykch'ipamp chikaw qhiparxäna.

15Ukat Noemí mamax Rut yuxch'apar säna:

—Uñtam, yuxch'a masimax markaparu, diosanakapan ukaruw kuttawayxi, jumasti jupamp chik sarxarakim —sasa.

16Ukampis Rut warmix taykch'iparux sarakïnwa:

“Jumar jaytjañ jan mayistati,

kawkharutix jumax sarkäta ukkharuw nayax sarä,

kawkhantix jumax jakkäta ukkhan jakä.

Juman markamax markaxäniwa,

Diosamasti, Diosaxarakïniwa.

17Nayasti kawkhantix jumax jiwkäta ukkhan jiwä,

uka chiqanarak p'amp'achatäñ munta.

¡Dios Tatitusti taqi ch'amapamp mutuyitpan,

nayatix jumar jaytanuküma ukaxa.

Jiwañakiw jumampiru, nayampirux jaljtayistani!”

18Noemí mamasti, Rut yuxch'apan jupamp chik sarañ munatap amuyasaxa, janiw juk'amp kunsa siskxänti.

19Ukhamaw jupanakax panpachani sarapxäna, Belén markar puriñkama.

Belén markar mantapkän ukkhasti, markpachaw jupanakar uñjasax chuymanakap ch'allxtayasipxäna. Warminakasti sapxänwa:

—¿Janit akasti Noemí warmïkisti? —sasa.

20Noemí mamasti, jupanakarux sänwa:

—Jan juk'amp Noemí sapxistati, jan ukasti Mará sapxita. Taqi ch'amani Tatitux jach'a llakisiñanak nayar apayanitu.

21Aka markatxa, taqi kun phuqt'ataw mistuwayta, Tatitun ukham munatapatxa, jichhax jan kunaniw kutt'anta. ¿Kunatarak Noemí sasipkakitätasti? Nayarux taqi ch'aman Tatituw juchañchitu, llakinak apayanirakitu —sasa.

22Ukhamaw Noemí mamax Rut yuxch'apamp Moab markata Belén markar kutt'anxäna. Uka markar puripkäna ukapachasti, cebada apthapiñ pacha qalltäxänwa.