MALAQUÍAS 2 - Qullan Arunaka DC

1“Sacerdotenaka, aka arunakax jumanakatakiwa:

2Jumanakasti nayarux jaysañanakamawa, sutixsa taqi chuymampiw jach'añchapxañama. Janitix ukham lurapkäta ukaxa nayax ñanqhachapxämawa. Taqi chuymampi jan jach'añchapxatamatxa, jumanakatak aski waxt'äwinakaxsa, ñanqhachañaruw tukuyä, sacerdote kankañ katuqapkta ukanaksa apaqapxämawa” siwa, taqi ch'aman Tatituxa.

3“Taqi ch'amanïñamsa nayax apaqapxämawa, ukatsti kawkïr uywanaktix luqtañatak apanipkäta uka uywanakan wanupampiw ajanut qhallkatapxäma, uka wanump chikarakiw pichanukut uñjasipxäta.

4Ukhamat yatipxäta, nayan aka kamachi arunak jumanakaru churataxa, Leví ayllumpi suma arust'äwir mantataxan jan tukusiñapataki” siwa, taqi ch'aman Tatituxa.

5“Nayan arust'äwixax Leví ayllutakix jakañänwa, samarañarakïnwa. Uka arust'äwsti jupan nayaru waqaychañapataki, axsarañapatakiw churarakïyäta, jupasti alt'at chuyma, axsartañ chuyma uñacht'ayitu.

6Leví sacerdotex kunatix chiqapäki uk yatichäna, janirakiw lakapan ñanqha parlañax utjkänti. Nayampisti sumana, aski samarañan jakarakïna, waljanirurakiw jucha lurañat jithiqtayäna.

7Sacerdotenakan lurañanakapasti, jaqinakaru nayar uñt'aña yatichapxañapawa, ukatsti taqinirakiw jupanakan ukaru sarapxañapa suma yatichäwinak katuqiri, jupanakax taqi ch'aman Tatitun suma arunakap qhanañchiri khithanita jaqinakäpxatap layku.

8“Ukampis juma sacerdotenakax suma chiqa thakhit saranukupxtawa, waljaniruw yatichäwinakamampix lanktasiyapxtaxa. Leví chachampi lurat suma arust'äwi ñanqhar tukuyapxtaxa.

9Ukat nayax jumanakar taqi jaqinakamp uñisiyapxäma, jan wali jaqinakat uñt'ayapxarakïma, jumanakan nayar jan ist'apxatamata, jaqinakar yatichapkta ukkhasa, mä khuskhak taqpachanir jan uñjapxatamata” siwa, taqi ch'aman Tatituxa.

IV. CHACHA WARMI JALJTAÑAX JUCHAÑCHATÄTAPA, YAQHA MARKANKIR WARMINAKAMP JAQICHASIÑATA(2.10-16)

10¿Janit jiwasasti mä sapa awkinikïktansti? ¿Janit mä sapa Diosan uskutäktansti? ¿Kunatarak jiwasasti maynit maynikam sallqjasis sarnaqasktansti, kawkïr suma arust'äwirutix Tatitumpi awkinakasampix mantawayapki uka arunak p'akintasasti?

11Judá markax Tatitumpi arust'äwir mantatapxa janiw phuqkiti, Jerusalén markansa, Israel uraqinsa wali axtaskay juchanak lurapxi. Judá markasti jan wali sarnaqañanakampiw Tatitun munat qullan utap q'añuchi, Judá markankir jaqinakax k'ari diosanakar yupaychir warminakampiw jaqichasipxi.

12¡Walïspawa, Tatitux ukham q'añu sarnaqir jaqinakaru aka markat jaqunukuñapaxa, kawkïrïskpasa, khitïskpasa, taqi ch'aman Tatitur waxt'äwinak luqtirïskpasa!

13Ukhamarus jumanakax janiw ukanakak lurapktati, jan ukasti jumanakan waxt'äwinakam Tatitux taqi chuymamp jan katuqxatap laykusti, jachañanakamampi, warariñanakamampiw Tatitun altarap phuqhantayapxtaxa.

14Ukatsti jiskt'asisipkaktawa: “¿Kunatsa ukhamäpacha?” sasa. Tatituw uñjaraktam, kuna arunaktix jumax waynäkasin, jaqichaskta uka warmir arsutam jan phuqhatama. ¡Warmimax jumamp chika sarnaqirïnwa, jumasti jupa sapampik jakañatakiw arsuraktaxa!

15Diosax jiwasar mä janchiki, mä sapa ajayukïñasatakiw uskusistu. Jupar luqtat mä suma markäñasatakiw irnuqarakistu.

16Israel markan taqi ch'aman Tatitupax siwa: “¡Jumanakpachat amuyasipxam, jan warminakamarux sallqjapxamti. Nayasti uñistwa kawkïri jaqitix warmipampi jaljtki ukaruxa, uka jach'a jucha lurasin jakäwipa q'añuchasi!”V. JAQINAKAN Q'UMA KANKAÑANÏÑAPATA(2.17—3.5)

17Tatitux jumanakan arunakam isch'ukkäwix qaritäxiwa; jumanakasti jiskhisisipkaktawa: “¿Kunarak jiwasasti parltan jiwasar isch'ukkäwi qarjasiñapatakisti?” sasa. Jumanakasti sapxtawa: “Jan wali lurir jaqinakax Tatitutakix walikïskiwa, ukanakampix kusisikiwa” sasa; ukatsti arusipxaraktawa: “¿kawkinkarak chiqapar uñjir Diosasti?” sasa.