NEHEMÍAS 9 - Qullan Arunaka DC

Esdras sacerdotex Israelankirinakan juchanakap arsu

1Uka pachpa phaxsina, pä tunka pusini uru saraqataruw israelit jaqinakax ayuno lurañatak tantachasipxäna; jupanakasti chhankha isinakampiw uchasipxäna, p'iqinakapxarus laq'ampiw willxatasipxäna,

2ukatsti yaqha markat jutir jaqinakat jithiqtasinxa, sayt'asisin juchanakap arsusipxäna, nayra awkinakapan juchanakapat arsusipxarakïna.

3Jupanakax kimsa horaw pachpan sayt'atäsipkäna, ukchañkamasti Tatit Diosan kamachi arunakapax taqi jaqinak nayraqatan ullarasïna, ukxar kimsa horasti, juchanakap arsusipxäna, ukatsti Tatituruw yupaychapxarakïna.

4-5Ukatsti Josué, Binuy, Cadmiel, Sebanías, Binui, Serebías, Baní, Quenaní uka levita chachanakax tarim patxar makhatasaw Tatit Diosapar jach'at art'asipxäna: “¡Sartasipxam, wiñayan wiñayapataki jakir Tatitu Diosamar yupaychapxam! ¡Tatitux yupaychatäpan jach'a qullan sutipas jach'añchatäpan!” sasa.

6Esdrasasti sarakïnwa: “Jumakïtaw Tatituxa, janiw yaqha Diosax utjkiti. Jumaw alaxpachsa, alaxpachat juk'amp amstankki uksa, taqi warawaranaksa lurtaxa; jumarakiw uraqsa lurtaxa taqi kunatix ukan utjki ukanakamppacha, jach'a qutanaksa, ukhamarak kunatix ukan utjki taqi ukanaksa. Jumaw taqi kunanakarus jakañ churtaxa. Ukatarak alaxpachankir warawaranakas yupaychapxtamxa.

7“Juma Tatit Diosaw Abramarus ajllisiraktaxa; jumaw caldeonakan Ur markapat irpsuntaxa, ukatsti Abraham sutimpiw suticharaktaxa.

8Jumasti jupan jumar iyawsatam uñjtaxa, ukat jupampix mä suma arust'äwi lurtaxa; jupat saraqiri jaqinakaru cananeonakana, hititanakana, amorreonakana, ferezeonakana, jebuseonakana, gergeseonakan uraqinakap churañataki. ¡Jumasti arsutamarux phuqhapuntawa!

9Jumax uñjtawa, kunjämsa nayra awkinakaxax Egipto markan t'aqhisipkäna ukxa, Mar Rojo quta jak'an jachatanakapsa ist'araktawa.

10Jumax wali muspharkaya jach'a luräwinak faraonar saykatañatakix lurtaxa, ukhamarak uywatanakaparu, markapankiri taqi jaqinakapar saykatañatakisa; kunja jach'a jach'a tukuñampitix jupanakax israelita jaqinakaru apnaqapkäna ukanaksa jumax amuytawa. Ukhamat sutimax jichhürkam wali aytataxa.

11Nayra awkinakaxan nayraqatapanxa qutsa payaruw jaljtaytaxa, jupanakasti uka chiqxa waña uraqinjam makhatapxäna; ukampis jupanakar arktirinakarux quta manqhiruw utjantaytaxa, kunjämtix mä qalax uma manqhiru utjantki ukhama.

12Ukatsti, jumax mä qinay tuqiw urun markamar irptaxa, arumasti mä nina tuqiraki, kawkinjamtix sarapxañapäki uka thakhipa qhant'ayañataki.

13“Ukatsti Sinaí qulluruw saraqantaxa, jupanakampiw alaxpachatpach parltaxa; jupanakarusti suma aski arsüwinak churtaxa, chiqpach yatichäwinaka, suma kamachi arunakampi.

14Jupanakarux yaticharaktawa sábado uru jumatak imapxañapataki; ukatsti Moisés luqtirim tuqiw kamachi arunaka, chiqpach yatichäwinak jupanakar churaraktaxa.

15Manq'at awtjatäpkäna ukkhasti sist'asipxañapatakix alaxpachat t'ant'a churantaxa, umat pharjatäpkäna ukkhasti umt'apxañapatakix qarqat uma jalsuyaraktaxa. Ukatsti jupanakar churañatak arsut uraqiruw mantayaraktaxa.

16“Ukampis nanakan nayra awkinakaxax jach'a jach'aw tukupxäna, chuymanakapsa qalarayasipxänwa, ukatxa janiw kamachi arunakamar jaysapkänti.

17Kuna jach'a luräwinaktix jupanak layku lurkta uk janiw jupanakax ist'añ munapkänti, janirakiw amtañsa munapkänti. Jupanakax chuymanakap qalarayasisax mä jilïri ajllisipxäna, Egiptor wasitatampi t'aqhisiyatäñaru irpañapataki. Ukampis jumax pampachasir Tatitütawa, munasiri, khuyapayasir Tatitütawa, llamp'u chuymanïtawa, janiw jank'ak phiñasktati, munasiñamax jach'awa, ukat jupanakar jan jaytanukktati.

18Jupanakax qhuya umatatayasas mä vaca qallu lursusipkchïna, ukarus diosasawa, Egiptot jiwasar apsunir diosaw sapkchïna, juma tuqi jan walinak lurapkchïna ukasa,

19juman jach'a khuyapayasiñam laykuw jupanakarux wasaran jan jaytanukktati. Jupanakan thakhip irpañatakixa, qinayax uru phuqhataw thakhinjam jupanakat jan jithiqtas irpäna, arumasti nina qhanarakiw sarañ thakhip qhant'ayäna.

20Ukhamarus jumax suma chuymanïtam jupanakar uñacht'aytaxa, khuyapayasir ajayumampisti jakañ yaticharaktaxa; janipuniw alaxpach t'ant'a manq'añapataki pist'ayktati, umat pharjatäpkäna ukkhas uma churaraktaxa.

21Pusi tunka maraw wasaran manq'añ churtaxa, janipuniw kuns jupanakatakix pist'ayktati; janirakiw isinakapas thanthaskänti, kayunakapas p'usuntkarakïnti.

22“Jupanakarusti marka apnaqäwinaka, markanaka, katuytaxa, jupanakan uraqinakap jalanuqtaxa, ukatsti jupanakax Sihón reyin Hesbón uraqip katuntasipxäna, Og reyin Basán uraqipa katuntasipxarakïna.

23Jupanakarux alaxpachan utjir warawaranakjam walja wawanak churtaxa, ukatsti nayra awkinakaparu churañatak arsuta uraqi katuqasipxañapatakiw irparaktaxa.

24Jupanakasti Canaán uraqir mantasin uka uraq katuntasipxäna; jupanakan nayraqatapan uka uraqin jakir jaqinakampiru, reyinakapampir jisk'achjtaxa, ukatxa uka chiqan jakirinakarusa amparanakaparuw katuytaxa, jupanakaru kuntix munapki uk lurapxañapataki.

25Israel markax suma uraqinak katuntasïna, pirqamp muyuntat markanaka, suma yänakan phuqt'at utanaka, phujunaka, uva yapunaka, olivo yapunaka, walja yaqha achunak churir quqanak katuntasirakïna; sist'asiñkamaw ukat manq'asipxäna, lik'intapxarakïnwa, juman jach'a munasiñamat kusisipxarakïna.

26“Ukampis jupanakax jan ist'asirïpxänwa, jumatak sayt'asisin kamachimar jisk'achapxarakïna. Ukxarusti profetanakamarux jupanakar juchañchatapat jiwayapxäna, uka profetanakasti jupanakan jumar wasitat makhatxañapatakiw jupanakar parläna; jach'a juchanakpun jumatak sayt'asisin lurapxäna.

27Ukat jumax uñisirinakapan amparanakapar katuytaxa, jupanakar t'aqhisiyapxañapataki. Ukatsti jupanakax ukham t'aqhisiyat uñjasisaw jumarux yanap mayipxtamxa, jumasti, jach'a khuyapayasiñam laykuw, alaxpachatpach jupanakar ist'taxa; t'aqhisiyiripan amparapat antutayañatakisti jaqinak khithantaxa.

28“Ukampis jupanakax mä juk'a samarañ jikxatasinxa, wasitatampiw juman nayraqataman jan walinak lurañar kutt'apxäna; ukat uñisirinakapan amparanakapar katuytaxa jupanakar apnaqapxañapataki. Ukatsti wasitatampiw yanap mayipxtamxa, jumasti jach'a khuyapayasiñampiw alaxpachatpach ist'taxa, jupanakar sapa kuti qhispiyasina.

29Jumax kamachinakam wasitat phuqhapxañapatakiw jupanakar iwxt'äyätaxa; ukampis jupanakax walikjamak amuyasipxäna, ukat kamachinakamarux jan jaysapkänti; kamachinakarjam sarnaqirinakar jakañ churir arsutanakamaruw ñanqhachapxäna; jupanakax jumatakiw sayt'asipxäna, chuymanakap qalarayasisax janiw ist'apkänti.

30Walja maranakaw jupanakar llamp'u chuymamp uñch'uktaxa, ajayum tuqisa, profetanakam tuqis iwxt'araktawa; ukampis janiw ist'asipkänti, ukat uraqinkir jaqinakan munañapar jupanakar apnaqapxañapatak katuyaraktaxa.

31Ukampis jach'a khuyapayasiñam laykusti janiw jupanakarux taqi tukjktati, janirakiw jaytanukktasa; juman munasiri, khuyapayasir Diosätam layku.

32“Ukhamasti, nanakan Diosaxay, taqi ch'amani axsarkañ Diosay, sumankäwir mantatamsa, munasiñamsa imtawa, jichhax uñjamaya ukataq jan walt'añanaka jutatapa, reyinakaxarusa, jilïrinakaxarusa, sacerdotenakaxarusa, profetanakaxarusa, nayra awkinakaxarusa, Asiria markan reyinakapan amparapar jalt'apkta ukkhat jichhürkama.

33Ukampis jumax chiqapätawa, taqi kunanakatix nanakxaru jutkäna ukanakat mutuñanakaxax wakisïnwa; jumax chiqaparuw uñjapxistaxa, nanakaw kunatix jan walïki uk lurapxtxa.

34Janiw reyinakaxasa, jilïrinakaxasa, sacerdotenakaxasa, nayra awkinakaxas kamachim phuqhapkänti, janirakiw kamachi arunakamsa ist'apkänti, iwxanakamsa yäqapkänti.

35Jupanakax munañanïxasinxa, jupanakaru walja yänaksa jumax churkta ukatsa, jach'a suma uraqsa katuykta ukatsa, janiw jumarux yupaychapktamti, janirakiw jan wali luräwinakapsa apanukupkänti.

36“Jichhürusti nanakax t'aqhisiyat jaqir tukuyatäpxtwa, kawkïr uraqtix nayra awkinakaxaru churkta, achunakapata, utjirinakapat manq'asipxañapataki uka uraqina.

37Kunanakatix jilarkir achki ukanakax reyinakatakikiwa, nanakan jucha luratanakax laykuw ukar puriyapxista, jupanakax munañaparuw apnaqapxitu nanaksa, uywanakaxsa. Ukat nanakax wali llakt'asitäpxta.”

Israelitanakax kamachi arunak phuqhañatakiw arsupxi

38 38 (1) Taqi ukanakat nanak israelitanakax, aka qillqata tuqiw phuqhañatak arsupxta, uka qillqatasti jilïrinakaxana, levitanakana, sacerdotenakan sutinakapamp qillqantatawa.