JOSUÉ 1 - Qullan Arunaka DC

ISRAELITANAKAN CANAÁN URAQ KATUNTATAPA(1—12)Diosax Josué chacharuw jawsi

1Tatitun luqtiripa Moisesan jiwxatapatxa, Tatitux Nun chachan Josué yuqapampiw parläna, khititix Moisesan yanapiripäki, juparusti sänwa:

2“Moisés luqtirixax jiwxiwa, jichhasti jumaruw taqi israelit jaqinakampix Jordán jawir makhatañax wakt'tam, kawkïri uraqtix jumanakar churapkäma ukar sarañataki.

3Kunjämtix Moisesar arskäyäta uka arunakarjamaw, nayax kawkïr uraqtix kayunakamax takt'kani uka uraqinak jumanakar churapxäma.

4Jumanakarux wasarata, Líbano qullunakat qalltasa, Éufrates jach'a jawirkam churapxäma, hitita jaqinakan taqi uraqinakapa, Mediterráneo sat jach'a qutakama.

5Juman jakañamkamax janiw khitis atipjkätamti, nayasti kunjämatix Moisesamp chikäkäyät ukhamarakiw jumampïskä, janipuniw jumarux jaytanukkämati.

6Jumasti wali ch'amani sayt'asim janirak axsaramti, jumaruw aka markaru uraq lakiñax wakt'tam; uksti nayaw nayra awkinakapar churañatak arsüyäta.

7Nayax ch'aman sayt'asiñamak maysma, ukatsti kuna kamachinaktix Moisés luqtirixax churktam ukanak phuqharakim. Kuntix uka kamachinakax siski ukanakat janipun maysar saranukumti, ukhamat taqi luräwinakamax sumaki sarañapataki.

8Kuntix Tatitun kamachi qillqatapanxa siski ukanak amtasipunïtawa, uruy arumaw lup'irakïta, kuntix uka arunakan siski ukhamarjam phuqhañamataki. Ukhamat taqi luräwinakamax sumaru sarani.

9Nayaw jumarux ch'amani sayt'asiñamatak sisma. Jan axsaramti, janirak mayjt'asimsa, naya, Tatitu Diosamaw kawkharutix sarkäta ukkhan jumampïskä” sasa.

Josué chachax uraq katuntañatakiw wakichasi

10Ukatsti Josué chachax markankir jilïrinakaruw lurapxañapatak säna:

11“Jumanakax campamentpacharu sarapxam, ukatsti taqi jaqinakar sapxarakim: ‘Manq'añanak wakichasipxam, akat kimsürurux Jordán jawir makhatasin kawkïr uraqtix Tatitu Diosasax churkistani uka uraqi katuntañäni’ ” sasa.

12Josué chachax Rubén, Gad, Manasés ayllun chikat jaqiparux sarakïnwa:

13—Tatitun luqtiripa Moisesan arunakapat amtasipxam: Tatitu Diosamax aka uraqi churasax samarañ jumanakarux churapxätam, sasa.

14Warminakamsa, wawanakamsa, uywanakamsa Jordán jawirat akkataru, kawkharutix Moisesax uraqi churapxtam uka chiqaru jaytasiwayapxam. Ukampis kawkïri chachanakatix nuwasiñatak wakicht'atäpkta ukanakasti nuwasiñ yänakam apxarusisin jilanakamar yanapt'añatak sarxarupxam,

15Tatitun jupanakaru samaraña churañapkama, kunjämtix jumanakar churapktam ukhama, kawkïr uraqtix Tatitux churkani uka uraqin jupanakankañapkama. Ukatsti jumanakax jawirat akkatanki uka uraqinakamaruw kuttanxapxäta, kawkharutix Tatitun luqtiripa Moisesax churapktam uka uraqi wiñayatak katuntasipxañamataki —sasa.

16Jupanakasti sapxänwa:

—Nanakax kuntix sapkista ukanak lurapxäwa, kawkharutix khithapkitäta ukkharuw sarapxarakï.

17Kunjämtix nanakax Moisesar taqi kunan jaysapxäyäta, ukhamarakiw jumarux jaysapxäma. Nanakasti Tatitu Diosaman jumampïñap munapxta, kunjämtix Moisesampïkan ukhama.

18Khiti jaqitix arunakamar jan ist'kani ukax jiwaniwa. Nanakax ch'amampi, chiqa chuymampi sayt'asiñamak munapxta —sasa.