SALMOS 108 - Qullan Arunaka DC

SALMO 108Chuymaxax wakichatawa(Sal 57.7-11; 60.5-12) 1 Davidan q'uchupa.

1 1 (2) Diosaxay,

chuymaxax wakichatawa,

¡jumar q'uchuñatakix wakicht'atawa!

Ajayuxay, sartasikimaya;

2 2 (3) arpa, salterio, sartasipxam,

¡nayax qhantat willjtaruw sartayä!

3 3 (4) Tatay,

markanak nayraqatan q'uchunakamp yupaychäma.

4 4 (5) Munasiñamax alaxpachat juk'amp jach'awa.

¡Aski kankañamax alaxpachkamaw puri!

5 5 (6) Diosaxay,

jumax alaxpachat juk'amp jach'ätawa,

jach'a kankañamax uraqiruw phuqhanti.

6 6 (7) Ch'amamampiy qhispiyapxita,

munat wawanakaman antutatäpxañapataki.

¡Mayisitanakaxarux ist'akimaya!

7 7 (8) Diosax qullan utjäwipatpach arsüna:

“¡Atipjañampiw Siquem uraq jalanuqä,

Sucot pampa uraq lakinuqarakï!

8 8 (9) Galaad uraqixa, Manasés uraqis nayankiwa;

Efraín uraqix p'iqixar jark'aqiriwa,

Judá uraqix jilïr kankañ thujruxawa;

9 9 (10) Moab uraqix jariqasiñ llataxawa,

Edom uraqiruw wiskhunakax liwnuqä;

¡filisteonakar atipjasin q'uchü!” sasa.

10 10 (11) ¿Khitirak uyuchrantat markar irpitanisti?

¿Khitirak Edom markar sarir thakhi uñacht'ayitanisti?

11 11 (12) Diosay,

jumax nanakar apanukupxistawa;

nuwasir tamanakaxampi chikax janiw mistkxtati.

12 12 (13) Timanakaxar saykatañatakiy yanapt'apxita,

jaqin yanapapax janiw kunatakïkisa.

13 13 (14) Diosan yanapapampix muspharkañanak lurañäni,

¡jupaw timanakasarux takxatani!