ECLESIASTÉS 10 - Qullan Arunaka DC

1Jiwat chhichhillankhan thujsatapaxa,

suma q'apkir qullarux janiw walt'aykiti.

Ukham pisi amuyt'anïñax yatiñ kankañampiru,

jach'ar aptatäñampirux aynacht'ayiwa.

2Yatiñan jaqin amuyupax aski lurañaruw wayusi;

pisi amuyt'an amuyupasti jan wali lurañaruw wayusiraki.

3Pisi amuyt'an jaqix taqi luratanakapanxa,

jan suma amuyt'anïtap uñacht'ayi,

qawqhasay saskpan pisi amuyt'aninakax

“jupanakäpxiwa” sasa.

4Mä marka apnaqiritix jumatak thitchini ukaxa,

jan mayjt'asimti;

llamp'u chuymampiw

jach'a pantjasïwirux atipjäta.

5Akapachan mä pantjasiñ utjatap uñjta, uksti pachpa marka apnaqirinakaw lurañ qallti.

6Pisi amuyt'an jaqinakarux jach'a lurañanak churapxi, yatiñan jaqinakasti jisk'a lurañanakak katupxi.

7T'aqhisiyat jaqinakarux caballot sarnaqaskir uñjta, jilïrinakarusti t'aqhisiyat jaqïkaspas ukham kayuk sarnaqaskir uñjarakta.

8P'iya allirixa,

pachpa p'iyaruw liwirantti.

Pirqa tinkuyirirusti,

katariw achji.

9Qala k'uthir jaqixa,

pachpa qalampiw usuchjasi.

Lawa ch'ixtir jaqixa,

pachpa lawampiw usuchjasi.

10Hachatix muthuptaspa

ukat janirak ariptayksna ukaxa,

ch'amamp phat'antañaw wakisispa.

Yatiñ kankañampi lurañaw

taqi kunat sipan askixa.

11¿Kuna askirakïspa mä katari axachirix

nayraqat katarimpi achjayasispa ukasti?

12Yatiñan jaqin arunakapax

taqinin chuymaparuw purt'i,

pisi amuyt'irin arunakapasti

jupa pachparuw aynacht'ayi:

13jupax jan wali arunak parlañampiw qallti,

ukatsti juk'ampi ñanqha arunak parlasaw tukt'ayi.

14¡Pisi amuyt'an jaqix kuns parlakiwa!

¿Khitis saspa kunatix luraskani ukxa?

¡Janiw khitis jutir urunakat kuns yatkiti!

15Pisi amuyt'an jaqix irnaqkäwiw qarjti,

janiw kawki chiqa markar sarañsa yatkiti.

16¡Ay kunakïkani, kawkïr markatix reyipas

mä jisk'a wawakïki,

jilïr jaqinakapas jach'a manq'äwinakan

qhantatisipki ukanakatakixa!

17¡Kusisiñaniw kawkïr markatix

askit uñt'at reyinïki ukaxa,

jilïr jaqinakapas

pachaparuw manq'asipxi,

ukhamat ch'amañchasiñataki,

janiw machjasiñataki!

18Jayratakix uta utacht'atax jalaqtiwa;

jan kun luriritakisti utpachaw tinku.

19Kusisit jakañatakisti, t'ant'aw munasi,

k'uchikïñatakisti, vinow munasi,

taqi ukanakamp kusisiñatakisti, qullqiw munasi.

20Reyitxa janipun jan wal parlamti,

munañan jaqinakatsa janirak jan wal parlamti,

janis khitis ist'kiristam ukhamxa.

Ukham parlatanakax jank'akiw yatisi,

jamach'inakjamaw arunakax sari,

ukatsti, taqi kunaw yatisi.