JEREMÍAS 10 - Qullan Arunaka DC

Yaqha diosanakar yupaychañampita, Diosar chiqpach yupaychañampita

1Israel marka, kuntix Tatitux siskätam uka arunaka ist'am.

2Tatitux siwa:

“Yaqha markanakan luräwinakapar jan arkapxamti,

alaxpachan unañchäwinakatsa janirak mulljasipxamti,

kunjämatix uka markanakax mulljasipxi ukhama.

3Uka markanakan iyawsäwinakapax

janiw kunatakis askïkiti.

Ch'umi taypin mä quqa jaqunukupxi,

uka quqatsti ídolo luririw sum lursuski,

4mayninakasti qurimpi qullqimpiw

uka lursutarux k'achachapxi,

jan liwisiñapatakix

clavonakampiw liq'thapipxi.

5Uka idolonakax melonanak yapuchat taypin,

jamach'inakar sustjañatak jaqi t'ixitar uñtatäpxiwa;

ukanakax janiw parlapkiti,

janirakiw sarnaqapkisa,

ukat ukanakarux q'ipnaqañax wakisi.

Ukanakar jan axsarapxamti,

janiw khitirus kuna ñanqhsa, asksa lurkiti.”

6Tatay, janiw jumjamax khitis utjkiti:

Jumax jach'a ch'aman Tatitütawa,

sutimas jach'arakiwa.

7Jumax markanakan reyipätawa,

juma nayraqatan taqiniw khathatipxi.

Aka uraqin yatiñan jaqinakat sipansa,

reyinakat sipansa,

janiw jumjamax khitis utjkiti.

8Uka markanakan utjasirinakapax

t'axmar jaqikamakïpxiwa,

jupanakan yatichirinakapasti,

mä k'ullut khitsut diosanakakiwa.

9Uka diosanakapax

Tarsis markat apanit qullqimpi luratakiwa,

Ufaz tuqit apanit qurimpi luratakiwa;

ch'iyar wila sami isinakampi,

chupika sami isinakampi isthapiyata,

ukanakasti jaqinakan amparanakapampi luratakiwa.

10Tatitu sapakiw chiqpach Diosaxa,

jakkir Tatituxa, wiñay Reyixa.

Jupan q'apisiñapansti, aka uraqix khathatiwa;

markanakasti janirakiw

phiñasitaparux saykatkaspati.

11(Jumanakasti, israelitanaka, Tatitur jan uñt'ir jaqinakarux sapxam: “Kawkïr diosanakatix alaxpachsa, akapachsa jan lurki ukanakax aka uraqit chhaqtayatäpxaniwa; janirakiw mayas ukanakat aka uraqin qhiparkaniti”).

Diosar yupaychañ q'uchu(Jer 51.15-19)

12Tatitux ch'amapampiw aka uraqi lurt'i,

amuyt'apampiw aka uraqsa sayt'ayi,

ch'ikhi kankañapampiw alaxpachsa uskuraki.

13Jach'a arupampisti,

alaxpachanak wal qhuthutiyi,

qinayanakarusti jayanakat sarthapiyani,

jach'a lliju llijunak taypina,

jach'a thayanak sartayasin

Tatitux jallu purintayi.

14Taqi jaqinakas pisi chuymäpxiwa,

jan amuyt'asirïpxiwa.

Uka diosanakasti

luririnakapatakix mä p'inqawa:

sallqjañatak diosanakakiwa,

janirakiw jakañanïpkisa;

15jan kunatak inamay yänakakiwa,

Tatitusti taripäwipanxa

ukanakarux q'al t'unjarakini.

16¡Ukatsipana, kunja jach'as Israelan Diosapaxa,

jupaw taqi kunatix utjki ukanaksa utt'ayi!

Juparakiw Israelarux jupatak ajllisi;

Taqi Ch'aman Tatitu, ukaw sutipaxa.

Profetampi, markampi parlapxatapa

17-18Israel markan Diosapax siwa:

“Jerusalén markankirinaka,

jichha kutix jayaruw apanukupxäma,

kunjämtix mä qalax q'urawampi

jayar q'urawt'aski ukhama.

Jan walt'añanakaruw puriyapxäma,

uñisirinakampiw katuntayapxäma.

Jichhax kuntix apasiñ munapkta

ukanak apxarusin jalakamak sarxapxam,

uñisirimax niyaw jutantaski.”

19Jeremías profetasti sarakïnwa:

¡Ay, nayata, akataqi ust'ataw uñjasta!

¡T'aqhisiñaxas jan tukuskiriwa!

Markaxan ñanqha luratapatxa,

naya pachpaw janchixan t'aqhista.

20Markaxasti q'ala t'unjatawa,

janiw wasitat sayt'ayirjamäkti.

Janiw khiti nayar yanapt'iris utjkxiti;

taqinis jiwaratkamakiwa.

¡Taqinin apanukutaw uñjasta!

21Aka markar irpirinakax

pisi chuymäpxiwa;

janiw Tatiturux thaqtapkiti.

Ukatpï aynacht'apxixa,

jichhasti, jiwasanakax

ananukut oveja tamar uñtatätanwa.

22¡Wal ist'apxam! ¡Mä jan wali yatiyäwiw purini!

Amsta tuqit mä jach'a ejercitow jutanti,

ukasti Judá uraqinkir markanakxa

ch'usa wasararuw tukuyani,

qamaqinakakiw ukan jakxapxarakini.

23Tatay,

nayax yattwa, jaqix janiw jakañap alaskiti,

janirakiw kawkir saratapsa yatiskiti.

24Chiqa kankañamarjam askicht'apxita,

jan phiñasisak iwxt'apxita,

ukhamäspa ukkhasti, t'unjapxitasmawa.

25Jumaru jan uñt'ir markanakaru,

jumaru jan art'asiri markanakarux

q'apisiñamampi mutuyam,

jupanakax q'alpun t'unjapxitu,

markarus jan walt'añaruw puriyapxi.