1Ukatsti Salomón reyix Jerusalenan Israelankir jilïr irpirinakaru, ayllunakan jilïrinakaparu, israelitanak taypin utjir wali aytat jaqinakaruw jupa nayraqatan tantachäna, Tatitun arust'äwi arcap Sión chiqat Davidan markapkam apxañataki.
2Ukatsti, Etanim sat paqallqür phaxsina, phunchhäwi jach'a urun israelitanakax Salomón reyimpi taqpachan tantachasipxäna.
3Ukarusti Israelan taqpach jilïr jaqinakapaw purinipxäna, ukat sacerdotenakax arca apxarupxäna,
4ukatsti Tatitump Jikisiñ Carpamp chik apasxapxäna, kawkïr qullan yänakatix ukan utjkän ukanakamppacha, ukanaksti sacerdotenakampi levitanakampiw apapxäna.
5Salomón reyimpi, jupamp tantachasipkatayna taqi uka israelita jaqinakampix, arca nayraqatan jan jakt'kay ovejanaka, urqu vacanakat wilañchanak luqtapxäna.
6Ukxarusti sacerdotenakax Tatitun utap manqhiruw arust'äwi arca apapxäna Qullanansa Qullanapa chiqawjkama, querubines sat chhiqhap manqhïxaru,
7uka querubines satan chhiqhanakapasti Tatitun arcapampi, kallañ lawanakapamppach imt'äna.
8Ukampis uka kallañ lawanakapax wali jach'anakänwa, uka lawanakan maysa thiyapax Qullan chiqawjatpach uñstäna, ukasti Qullanansa Qullanap chiqawja uñkatasinkänwa, janiw anqäxatpach uñstkänti; jichhürkamaw ukax ukhamäski.
9Arcansti janiw kuna yaqhas utjkänti, jan ukasti kawkïr qalat lurat pä tablanaktix Moisesax Horeb chiqankkasin uchkatayna ukakiw ukankäna, Egiptot mistunipkäna ukapacha Tatitux israelitanakampi arust'äwi lurkäna uka.
10Sacerdotenakax Qullan chiqawjat mistunipkän ukapachaxa, qinayaw Tatitun utapar phuqhantäna,
11uka qinayïpan sacerdotenakax yupaychäwi lurañatak jan qhiparkxapxänti, Tatit Diosan qhapaq kankañapax utaparu phuqhantatap layku.
Salomón reyin Diosan utap luqtatapa(2 Cr 6.1—7.10)12Ukatsti Salomonax sänwa:
“Jumax Tatay, sistawa:
‘Nayax ch'amak qinay taypin jakasta’ sasa.
13Ukampis nayax mä uta jumatak utacharapsma,
ukawjan wiñay jakasiñamataki” sasa.
14Ukat reyix kutikipstanisin sayt'at ukankapkäna uka israelitanakarux jach'añchäna,
15akham sasa: “Israelan Tatit Diosapax jach'añchatäpan, jupax David awkixar arskatayna uk phuqhi, jupax sänwa:
16‘Kunüruttix Israel markaxar Egipto markat irpsunkta uka urutxa, janiw nayax Israelan taqi ayllunakapatxa, kawkïr marksa chhijllaskti ukan mä uta lurasiñapataki, sutixas ukankañapataki. Ukampis Israel markaxar apnaqañapatakix Davidaruw ajllista’ sasa.
17David awkixasti Israelan Tatit Diosapar jach'añchañatakix, mä uta lurañ munäna.
18Ukampis Tatitux sänwa: ‘Nayatak mä uta utachañ munatamax walikiwa;
19ukampis janiw jumax utachkätati, jan ukasti, wawanakamat maynïriw nayatak mä uta utacharapitani’ sasa.
20“Jichhasti Tatitux arsutap phuqhiwa. Kunjämtix jupax siskäna ukhamarjama, nayaw David awkix lanti Israelan reyi qunuñapar qunt'asta, ukatsti mä uta Israelan Tatit Diosapatak utacharakta.
21Arust'äwi arca uchañatakisti mä chiqawja wakicharapta, Tatitux nayra awkinakasampiw uka arust'äwi luräna, Egipto markat jupanakar irpsunkän ukapacha” sasa.
22Ukatsti Salomonax Tatitun altarap nayräxaruw sayt'asïna, taqpach israelita jaqinak nayraqatana, ukatsti amparanakap alaxpachar luqtasaw jach'at säna:
23“Israelan Tatit Diosapa, janiw alaxpachansa, aka uraqinsa jumjam yaqha Diosax utjkiti, jumax arust'äwimar phuqtawa, taqi chuymampi jumar jaysirinakarux khuyapayasiñam uñacht'ayaraktaxa;
24jumasti David awkixar arsutamxa phuqharaktawa, ukhamat jichhürun luräwimpisa arsutampisa phuqhasi.
25Ukhamasti Israelan Tatit Diosapa, kuntix David awkixa luqtirimaru arsktas uk phuqharakimaya: ‘Wawanakamatix naya nayraqatan askin sarnaqapxani, kunjämtix jumax nayraqataxan sum sarnaqkta ukhamxa, jumat saraqir mayni wawamax Israelan reyi qunuñapar qunt'asirix nayraqataxan utjapuniniwa’ sasa.
26Ukhamasti, Israelan Tatit Diosapa, kuntix David awkixa luqtirimar arskta ukan phuqhasiñap munakimaya.
27“Ukampisa Diosaxay, ¿chiqpachapunit jumasti aka uraqin jakasmasti? Alaxpachatix jach'a kankañapampi jumar jan katxäsirjamäkstamxa, ¡janiw jumatak utacharapksma ukax katxäskiristamti!
28Ukhamïpansa, Tatit Diosaxay, achikt'asitaxsa, mayisitaxsa jaysitaya; jichhürun arnaqasitaxaru, mayisitaxarus ist'akitaya.
29Arumay uruy aka utam uñch'ukinim, kawkhantix ukankaña arskta ukkhana. Jichhasti uywataman mayisitaparux ist'akimaya.
30Kunapachatix Jerusalén markat jayan jikxatasipkä, ukatsti utam tuqi uñtat mayisipkä ukapachax, nayan achikt'asitanakaxsa, Israel markaman achikt'asitanakapsa ist'akimaya. Jumax alaxpachatpach ist'am, kawkhantix jaktaxa ukkhatpacha, ukatsti pampachapxarakita.
31“Kunapachatix maynix jaqi masipa tuqi jan wali lurani, ukatsti aka utan altaram nayraqatan juramento lurayapxani ukkhaxa,
32alaxpachatpach ist'anim, juchañcharakim, uywatanakamarusti chiqapar uñjam. Juchanirusti juchañcham, jan wali luratapat mutuyäwix jupxankañapataki, jan juchanirusti chiqapar uñjarakim, kunjämatix wakt'ki ukhamarjama.
33“Kunapachatix uñisirinakax Israel markamar atipjkani, juma nayraqatan juchachasitap layku, ukatsti markamatix jumar wasitat makhatxasin sutimaru yupaycharakini, ukat aka utan mayisirakïtam ukkhaxa,
34jumax alaxpachatpach ist'anim, juchanakapsa pampacharakim, ukatsti nayra awkinakapar churktas uka uraqiparurakiy kuttayanxam.
35“Kunapachatix jallux jan purxatkxani, markaman juma nayraqatan juchanak lurapxatap layku, ukatsti aka chiqar uñtas jumat mayisini, sutimsa yupaycharakini, juman mutuyäwim layku juchanakapsa uñt'asipxani ukkhaxa,
36jumax alaxpachatpach ist'anim, ukatsti Israel markamampina, uywatanakamampin juchanakap pampacham, aski thakhinjam sarnaqapxañapäki uk yaticharakim. Ukatsti kawkïr uraqtix markamar churkta uka uraqirux wasitatay jallum purxatayanim.
37“Kunapachatix aka uraqin mach'anakasa, usunakas utjani, ayrunakas lupimpi wañsxani, sirk'is sirk'intxani, t'iju t'ijunakas mirantxani; uñisirinakaxas markanakaxar muyuntasin katuntapkani, jan ukax kuna jan walt'añanakasa, usunakas jutkani ukapachasti,
38-39jumax khiti jaqina, jan ukax taqpach Israel markamana, chuyma ust'at uñjasisa t'aqhisiñapan aka uta tuqir uñtat amparanakap luqtanis jumat mayisitanakaparu, achikt'asitanakaparus ist'akimaya. Jumax alaxpachatpachay ist'anim, kawkhantix jakta ukawjatpacha, ukatsti pampachamaya; sapa maynirus luratanakapatjam churarakim, juma sapakiw jaqin amtäwinakapa, chuymapsa uñt'taxa.
40Ukhamat jaqinakax, nayra awkinakaxar churkta uka uraqin jakañapkamax jumar axsartapxätam.
41“Kunapachatix yaqha markankir jaqinakax juman jach'a Diosätam yatipxani,
42ukatsti aka utam tuqi uñtat mayisipxani ukkhasti,
43jumax alaxpachatpach ist'animaya, kawkhantix jaktaxa ukkhatpacha, ukatsti kuntix maykätam uk churarakim, ukhamat aka uraqinkir taqpach markanakan juman sutim uñt'añapataki, jach'añchañapatakiraki, kunjämatix Israel markamax lurki ukhama, ukatsti sutimax aka uta jumatak lurkta ukan aytatätap yatipxañapataki.
44“Kunapachatix markamax uñisirinakapampi nuwasir sarkani, ukatsti kawkharutix jumax khitkäta ukkhatpach jumar mayisïtam, ajlliskta uka markam tuqi uñtata, nayax jumatak lurkta uka uta tuqi uñtata mayisirakïtam ukapachaxa,
45jumax alaxpachatpachay mayisitapsa, achikt'asitapsa ist'anim, jupar arxatarakim.
46“Diosaxay, taqiniw juchararäpxta, markamatix juma nayraqatan jucha lurani, ukatsti jumax jupanakatak q'apisitam layku uñisirinakapan amparapar katuyarakïta, katuntat jaya markarusa, jak'a markarusa apatäñapataki,
47ukatsti kawkha jaya markarutix apanukut uñjaskani ukkhatpach jumar makhatxapxätam, achikt'asipxarakïtam jucha luratanakap uñt'asisa,
48ukatsti apatäpkani uka uñisirin markapan taqi chuymapampi, taqi jakañapampi jumar makhatxapxätam; ukatsti ukawjatpach jumar mayisipxätam aka uraqi tuqir uñtata, kawkïr uraqtix nayra awkinakapar churkta, juman ajllit markam tuqi uñtata, nayax jumatak lurkta uka uta tuqi uñtatarak mayisipxarakïtam ukapachaxa,
49jumax alaxpachatpachay mayisitanakapsa, achikt'asitanakapsa ist'anim, kawkhantix jumax jaktaxa ukkhatpacha jupanakar arxatarakim.
50Markamarusti juma nayraqatan jucha luratanakapata, jumatak sayt'asitanakapatsa pampacham, ukatsti jupanakar katuntasin apirinakarusti khuyapayasiñ chuyma churam markamat khuyapayasiñapataki.
51Juman markamawa, jumankarakiwa; jumaw Egipto markat irpsuntaxa, uka markasti hierro umatatayañ hornor uñtatänwa.
52“Mayisitanakaxar ist'itaya, Israel markaman achikt'asitanakapsa ist'amaya. ¡Dios Tatay, jumar art'asinipxäma ukkhax ist'apxitaya!
53Tatay, jumaw taqi aka uraqin utjir markanak taypit markamar jumatak yaqhachastaxa, kunjämtix Moisés luqtirim tuqi arsktaxa, kunapachatix nayra awkinakaxar Egiptot jumax irpsunkta ukapacha” sasa.
54Salomonax Tatitun utapan altarap nayräxan killt'ata, alaxpach tuqir amparanakap aytataw Diosat mayisïna. Mayisiñ tukt'ayasinsti,
55sayt'asïnwa, ukatsti Israel markpacharuw askinakamp phuqt'äna. Jach'at arsurakïna:
56“¡Tatitux jach'añchatäpan, jupaw Israel markapar samarañ churi, taqi arsutaparjama! Janiw armaskiti Moisés luqtirip tuqi kuna aski arsüwinaktix phuqhañatak arskäna ukanakxa.
57“Jichhasti, Tatitu Diosax jiwasampïpan, kamisatix nayra awkinakasampïkän ukhama. Janipuni apanukustpanti, janirak jaytistpansa,
58jan ukasti, chuymanakasxa jupa tuqir wayusiyistpan taqi kunansa jupan munañap lurañasataki, ukatsti kamachi arunakapsa, arsüwinakapsa phuqhañasataki, nayra awkinakasar phuqhapxañapataki churkäna ukanaka.
59Tatit Diosasaru taqi akanak mayisitaxasti, uruy aruma jupan chuymapankpan, ukhamat luqtiripampiru, Israel markapampir wakisitarjam chiqapar uñjañapataki,
60ukhamat aka uraqinkir taqi markanakax, Tatitun Diosätapa, yaqhax jan utjatapa yatipxañapataki.
61Ukhamasti, jumanakax Tatit Diosasampix chiqa chuymanïpxam, kamachinakap phuqhapxam, kamachi arunakaparus jaysapxarakim, kunjämtix jichhürun lurasipkta ukhama” sasa.
62Uka qhipatsti, reyimpi, taqpach Israel markampix wilañchanak Tatitur luqtapxäna.
63Salomonasti Tatiturux sumankthapiñ wilañchanak luqtäna: pä tunka payani waranqa urqu vacanakampi, patak pä tunkan waranq ovejanakampi.
Reyimpi, taqpach israelit jaqinakampisti, Tatitun utap ukham luqtapxäna.
64Ukürpachaw reyix Tatitun utapa uñkatasinkki uka chikachik utänqap luqtäna, ukan nakt'ayat wilañchanaka, granonakat waxt'äwinaka, sumankthapiñ wilañchanakan lik'inakap luqtarakïna, Tatitun nayraqatapan utjir broncet lurat altarax jisk'akïtap layku.
65Uka urusti, Salomonax taqpach Israel jaqinakamp chikaw Chhujllanak lurañ uru uruyäna, Tatit Diosar jach'añchasa, ukasti paqallq urünwa. Jaqix waljapunïnwa, israelitanakax taqi chiqat jutapxatayna, Hamat chiqata, Egipto jawiratpacha. Uka qhipatsti yaqha paqallq urumpi uruyapxarakïna; taqpachasti tunka pusin uruw uruyapxäna.
66Uruyañ tukt'ayasasti, reyix markachirinakarux khithanukxänwa, ukatsti jupanakax reyir jach'añchawayasaw utanakapar wali kusisita sarxapxäna, Tatitun David luqtiripampiru, Israel markapampir aski luratap layku.
Who We AreWhat We EelieveWhat We Do
2025 by iamachristian.org,Inc All rights reserved.
