LEVÍTICO 25 - Qullan Arunaka DC

Uraq samarayañ mara

1Tatitux Moisesaruw Sinaí qullun

2israelitanakar akham sañapatak mayïna:

“Kuna uraqtix jumanakar churapkäma ukar mantapkäta ukapachasti, uka uraqix mä maraw samarañapa, uka samaräwisti Tatitutakïniwa.

3Yapunakamxa suxta maraw yapuchasipxäta. Uva yapunakamsa suxta maraw alinakap khuchhurapxäta, uva achunaksa apthapipxarakïta,

4ukampis paqallqu mara purinxipansti uka uraqix Tatitutakiw samarani; uka marasti janipuniw yapunakam yapuchapxätati, janirakiw uva alinaksa khuchhurapxätati.

5Qhipa trigo achunak apthapitat jupapachpa külltanir trigo jan yawthapipxamti, jan khuchhurat uva alinakan uvanakapsa janirak apthapipxamti, uraqix marpach samarañapapuniwa.

6Kunatix uka samarañ maran uka uraqin jupapachpa achkani ukax jumanakana, uywatanakamana, luqtirinakamana, jumanak taypin jakapki uka yaqha markat jutirinakan manq'apxañapatakïniwa;

7ukhamarak uywanakamatakisa, qullunkir animalanakatakis manq'añax utjaskani. Kunatix uraqin achkani ukax taqinin manq'añapatakïniwa.Qhispiyasiñ mara

8“Jumanakasti paqallqu kutiw paqallqu mara jakt'apxäta, ukhamat uka paqallqu maran pusi tunka llätunkan mara jakt'asiñapataki,

9uka marana paqallqu phaxsina tunka uru saraqatarusti, uka urux juchanakat pampachatäñ jikxatañ uruwa, ukapachaw jumanakax mä pututu phust'as taqi uka markpachar ist'ayapxäta.

10Phisqa tunka mara purinxipansti jumanakax uka mararux qullan mara sasaw sapxäta; uka marasti qhispiyasiñ maräniwa, uka maranarak markpachan taqinitak qhispiyasiñ utjatap yatiyapxäta. Uka maransti khitinakatix uraqinakap apt'asipkäna ukanakax uraqinakap tumpasxapxani, t'aqhisiyat jakirinakasti wila masipan ukaruw kutt'xapxani.

11Uka phisqa tunka marasti jumanakatakix qhispiyasiñ maräniwa, uka marasti janiw jumanakax yapuchapkätati, jupapacha achuri trigsa janiw yawthapipkätati, janirakiw uva yapuman achunakapsa apthapipkätati,

12uka maran qullan marätapata, jumanakatak qhispiyasiñ marätap layku. Kunatix uraqin jupapach achkani ukak manq'apxäta.

13“Uka qhispiyasiñ maransti jumanakax taqiniw uraqinakam tumpasxapxäta.

14Maynitix mä uraqi aljani jan ukax khititsa alasini ukasti, jan jumanakkamax sallqjasipxamti;

15khititix alaskani ukasti, kunapachatix qhispiyasiñ marax utjkän ukkhatpach qawqha maratix sarakipkani uk sum jakt'asin chiqpach alap churxañapawa, aljiristi qawqha maranakas uka uraqix yapuchañäski ukarjamaw aljañapa;

16walja maratix yapuchañatak utjaskchi ukkhasti, uka uraqin alapax jiläniwa; juk'a marakïxani ukasti, alapax juk'akirakïniwa, ukampis kunatix aljaski ukax qawqha maras yapuchañatakix utjaski ukak aljasixa.

17“Jan khitis mayni masiparux jan wal lurpati. Tatit Diosarusti axsartapxapunim, nayätwa jumanakan Tatit Diosamaxa.

18Nayan kamachinakaxarjam sarnaqapxam, arsutanakaxarus phuqhapxarakim. Ukanakarusti phuqhapxapunim, ukapachakiw uka uraqin kusisit jakasipxäta;

19uraqix suma achunak churani, jumanakasti uka uraqin kusisitaw jakasipxäta, uka achunaksa sist'asiñkamaw manq'asipxarakïta.

20“Inas jumanakax sapxarakchïta: ‘¿Ukhamasti kunarak manq'añänisti uka paqallqu mara purinin ukkhasti, jan yapuchkañäni, janirak achunaksa apthapkañäni ukkhasti?’ sasa.

21Nayaw jumanakarux suxtïri maräki ukkhax walja achunak apayasinipkäma, uka achunakasti kimsa maratakix jilarkiriw apthapisini;

22ukhamat jumanakax kimsaqallqu maran yapuchasipkäta ukkhax uka imat trigot manq'asipkäta, ukhamarus kunapachatix achu apthapiñax purinkani uka llätunkiri marakamas manq'asipkakïtawa.

23“Uraqisti janiw wiñayatak aljatäñapäkiti, uka uraqix nayankiwa; jumanakasti uka uraqinxa sart'ir jaqinakakïpxtawa.

24Ukhamasti kawkïr uraqinaktix jumanakax katupkta ukanaksti, nayra uraqiniruw kuttayxapxäta, jupanakaw wasitat uka uraqinak tumpasxapxani.

25“Mayni marka masimatix aynacht'at uñjasini, ukat uraqipa jumar aljätam ukaxa, mayni jak'a wila masipaw kuntix wila masipax aljkatayna uka uraq kutsuyir jutani.

26“Maynitix uka uraq kutsuyañatak jan jak'a wila masinïkani, ukampis uka uraq kutsuyasiñatak jupapachpa qullqi jikxatani ukasti,

27qawqha maranakas mäkipxatayna uka uraq aljatapatxa ukhamarjamaw amuyt'ani, ukatsti alasirirux qawqhatix qullqix churañ wakiski ukkha kuttayxani, ukatsti jupax wasitat uraqip tumpasxani.

28Ukampisa janitix uka uraq kutsuyasiñatak qawqha qullqitix munaski uk jikxatkani ukasti, uka uraqix alasirin amparapankaskakiniwa qhispiyasiñ mara puriniñapkama; uka maraw uka uraqix wasitat kutsuyatäxani, aljiristi wasitat uka uraq katusxarakini.

29“Maynitix uyuchrantat markan mä uta aljani ukasti, aljatat uksarux mä maraw utjaski aljasirin uka uta kutsuyasxañapataki.

30Ukampis uka utatix uka maran jan kutsuyatäkani ukapachasti, alasirimpi, wawanakapampiw uka uta wiñayatak katxapxani. Qhispiyasiñ maransti janipuniw uka utax kutsuyatäkxaspati.

31Ukampisa, kawkïri utanakatix markat anqäxankki ukanakampix kunjämtix uraqinakampi luraski ukhamäniwa; qhispiyasiñ maranxa nayra utanipar kutkatayatäxaniwa.

32“Levitanakasti kawkïri utanakatix jupanakan markanakapankki ukanak wasitat kutsuyasipxani.

33Maynitix levitanakan markapan mä uta alasini ukasti, uka utax qhispiyasiñ maran levitar kutkatayatäxaniwa, kawkïri utanakatix levitanakan markapan utjki ukanakax Leví ayllunkirinakankiwa, israelitanakan jupanakar uka utanak churapxatap layku.

34Kawkïr uywa awatisiñ uraqinakatix levitanakan markapan utjki ukanakax janipuniw aljatäkaspati, uka uraqinakax wiñayatak levitanakar churatawa.

35“Mayni marka masimatix aynacht'at uñjasini, ukat juman ukar yanap mayir jutani ukasti, jaya markat jutir jaqïkaspas ukham utamarux katuqäta.

36Kuntix mayt'käta ukanakatsti janipuniw juk'amp jila mayïtati; jan ukasti, Diosamar axsartam, uka marka masimarux utamar katuqarakim.

37Kuna qullqtix mayt'käta ukatsti janiw juk'amp jila mayïtati, kuna manq'tix churkäta ukatsa janirakiw juk'amp jila mayisïtati.

38Nayätwa jumanakan Tatit Diosamaxa, nayaw jumanakarux Egipto uraqit irpsunipxsma, aka Canaán uraqsa churapxaraksma, nayan jumanakan Diosamäñataki.

39“Mayni marka masimatix jumampïkasin aynacht'at uñjasini, ukat jumar aljasxarakïtam ukapachasti, juparux jan mä t'aqhisiyat jaqjam irnaqaykamti;

40juparusti utaman irnaqirïkaspasa, jan ukax mä qurpachasir jaqïkaspas ukhamar uñjam. Jumatakisti qhispiyasiñ mara puriniñapkamaw irnaqarapïtam,

41ukatsti qhispitaw jupasa, wawanakapasa uñjasxani, kawkhankkitix wila masinakapax ukkharuw pachpa uraqipar kuttawayxani,

42jupanakasti nayan luqtirinakaxäpxiwa; nayaw jupanakarux Egiptot irpsunta, janipuniw jupanakax t'aqhisiyat jaqjam aljatäñapäkiti.

43Jan qhuru kankañamp jupanakarux uñjamti, jan ukasti, Diosamar axsartam.

44“Jumatix t'aqhisiyat jaqinakanïñ munsta ukasti, kawkïr yaqha markanakatix markam jak'ankki ukanakat alasinim.

45Jan ukax kawkïrinakatix yaqha markat jutir jaqinakan wawanakapäki, jumanak taypinarak jakapki ukanakarux jumankañapatak alasiskasmawa,

46ukatsti kunapachatix jumanakax jiwxapxäta ukkhax wawanakaparuw mä tutïkaspas ukham jaytxapxäta; ukhamat luqtayasipxañamataki. Ukampis jumanakax janipuniw israelita masinakamarux t'aqhisiyapxañamäkiti.

47“Yaqha markat jutir jaqitix jumanak taypin qamiriptxani, ukatsti mayni israelita jaqitix aynacht'at uñjasini, ukham aynacht'atätap laykutix t'aqhisiyat jaqjam uka jaya markat jutir jaqir aljasxani ukasti,

48uka israelita jaqix wakisiw kutsuyatäñapaxa. Uksti pachpa wila masipaw ukham luraspa,

49mä tiopa, mä primo jilapa, jan ukax kawkïri jak'a wila masipas kutsuyakispawa, qullqip utjaspa ukkhax jupa kipkas kutsuyasirakispawa.

50Jupampi alasiripampisti qawqha maräxisa jupan aljasitapata qhispiyasiñ marakamax uk sum jakt'apxani. Kutsuyasiñatakix qawqtix mä irnaqirix uka maranakan irnaqatapat katuqkaspa ukhamarjamaw kutsuyasiñapan alapax tantiyt'atäni.

51Walja maranakatix utjaskchi ukapachasti, qawqha qullqirutix jupapachpa aljaskäna ukat chikat qullqimpiw kutsuyasxani,

52ukampis uka qhispiyasiñ maratakitix juk'a urunakakïxani ukkhasti, qawqha maranakatix qhispiyasiñatak jilt'ki ukarjamakiw qullqi kuttayxarakini.

53Juparusti mä maratakis irnaqañapatak jawsatäkaspa ukhamarjamaw uñjatäni; janipuniw uka israelita masimarux qhuru kankañamp uñjayätati.

54“Uka maranakantix uka jaqix jan kutsuyatäkani ukkhasti, kunapachatix qhispiyasiñ marax purinkani ukapachaw wawanakapampach qhispitäxani,

55israelitanakasti nayan luqtirinakaxawa; nayaw jupanakarux Egipto markat irpsunta. Nayätwa jupanakan Tatit Diosapaxa.