DANIEL 6 - Qullan Arunaka DC

Danielax leonanakan putupar jaquntataw uñjasi

1 1 (2) Darío reyix markapan jan walt'añanak jan utjañapatakixa, patak pä tunkan jaqinak utt'ayäna, marka apnaqäwin jupar yanapapxañapataki.

2 2 (3) Uka patak pä tunkaninakxarusti, kimsa jach'a jilïrinak utt'ayarakïna, jupanakar uñjapxañapataki. Uka uñjirinakatsti maynix Danielänwa.

3 3 (4) Danielasti maynïr uñjirinakat sipansa wali askïnwa; ukat reyix jupar taqinin jilïripat utt'ayäna, ukhamarus markan jilïr apnaqiripat utt'ayañ amtarakïna.

4 4 (5) Ukhamïpan, uñjir jaqinakaxa, marka apnaqirinakasa kunaymanit Danielarux aynacht'ayañ thaqhapxäna, janiw sum apnaqirïkiti sasa reyi nayraqatan aynacht'ayañataki, ukampis Danielax lurañanakap sum luräna, janiw juparux kunjämatsa aynacht'ayirjamäpkänti.

5 5 (6) Ukhamäkipansa, kunjämat aynacht'ayañsa lup'isipkakïnwa, ukat sapxarakïna: “Janiw Danielarux kunjämatsa aynacht'ayañjamäkiti, inas Tatitupar arkatap tuqit aynacht'aysna” sasa.

6 6 (7) Ukat uñjirinakasa, marka apnaqirinakas jupanakkam arust'asisin Darío reyimp parliriw sarapxäna, juparusti sapxänwa:

—¡Jach'a munañan reyix wiñayatak jakpan!

7 7 (8) Taqpach jilïrinaka, aka marka apnaqirinakawa mä tantachasïwi lurapxi, uka tantachasïwinsti reyin mä arsüwi apsuñapatakiw amtapxi. Uka arsüwisti akhamäñapawa: Kimsa tunka urunxa janipun khitisa kuna diosarusa, kuna jaqirus yupaychpati, jan ukasti juma rey saparuki mayisitäpan. Khititix uka arsutaru jan phuqkani ukax, leonanakan putupar jaquntatäpan.

8 8 (9) Ukhamasti, juma reyix uka arsüwim apsupunim, sutimamp qillqantarakim, jan mayjt'ayatäñapataki, kunjämäkitix medonakana, persanakan kamachinakapax ukhamarjama, ukasti janiw p'akintatäkaspati —sasa.

9 9 (10) Darío reyisti uka arsüwir iyawsasin sutipampiw qillqantäna.

10 10 (11) Danielasti uka arsüwin reyin sutipamp qillqantatäxatap yatisinxa, utaparuw sarxäna, ukatsti uta ventananak jist'arasïna, uka ventananakasti Jerusalén marka tuqir uñtanitänwa, killt'asisin Diosat mayisïna, yupaycharakïna. Uksti Danielax kimsa kutiw urun luräna, kunjämatix lurirïkäna ukhamaru.

11 11 (12) Kunapachatix marka apnaqir jilïr jaqinakax Danielar Diosat mayisiskir uñjapkäna ukkhaxa,

12 12 (13) ukspachaw reyin ukaru uka kamachxat parlir sarapxäna, ukatsti juparux sapxänwa:

—Juma jach'a reyix mä kamachi yatiytaxa, ukasti, aka kimsa tunka urunakanxa janiw khitis kuna diosarusa, khiti jaqirus mayisiñapäkänti, jan ukasti juma jach'a reyirukiwa mayisiñapänxa, uka kamachi p'akintirirusti, leonanakan putupar jaquntatäñapataki, ¿janich jan ukax ukhamäkixa?

Reyisti ukxarux sarakïnwa:

—Ukhamapunïskiwa. Uka kamachisti medonakana, persanakan kamachinakaparjamax phuqhasiñapapuniwa, janirakiw p'akintatäkaspati —sasa.

13 13 (14) Jupanakasti ukxarux sasipkakïnwa:

—Judá markat katuntat apanitäki uka Daniel waynax, janiw juma reyirux axsarktamti, janirakiw yatiyatäki uka kamachimarus yäqkiti, nanakasti utapan urunxa kimsa kuti Tatitupat mayisiskir uñjapxta —sasa.

14 14 (15) Uk ist'asasti reyix wal llakt'asïna, ukatsti Danielar kunjämatsa qhispiyaspa uk lup'irakïna. Inti jalantañapkamaw reyix ch'amachasïna Danielaru kuna tuqit qhispiyañsa,

15 15 (16) ukampis uka jaqinakax wasitat reyin nayraqataparux jutapxäna, sapxarakïnwa:

—Juma reyix sum yattaxa, medonakana, persa jaqinakan kamachinakaparjamaxa, reyin sutipamp qillqantat kamachinakax janiw p'akintatäkaspati —sasa.

16 16 (17) Ukat reyix Danielar irptayanïna, leonanakan putupar jaquntapxañapataki. Ukampis janïr jaquntapkipan reyix Danielar sarakïna:

—Jumax taqi chuymamamp yupaychkta uka Diosamax jumar qhispiypan —sasa.

17 17 (18) Ukatsti Danielar ukspachaw leonanakan putupar jaquntapxäna. Ukatsti, mä jach'a qalampiw uka putur atkatapxäna, reyisti ukarux sellopampiw limxatarakïna. Uka pachparak marka apnaqir jach'a jilïri jaqinakax lurapxäna, uka putut Danielar jan khitis irpsuñapataki.

18 18 (19) Uka qhipatsti reyix jach'a utaparuw sarxäna, janiw uka arumax kuns manq'känti, janirakiw k'uchirt'asirïkän ukhamsa k'uchirt'askänti; uka arumax janiw ikthapirjamäkänsa.

19 19 (20) Qhanjtanxipansti, jank'akiw sarthapisin leonanakan putupar jaläna,

20 20 (21) uka putur jak'achasisasti llakt'at arumpiw Danielar jawsäna:

—Daniel, jakkiri Diosan luqtiripa, ¿taqi chuymamamp yupaychkta uka Diosamax leonanakan lakapat qhispiytamti? —sasa.

21 21 (22) Danielasti sarakïnwa:

—¡Juma jach'a reyix wiñayatakiw jaktaxa!

22 22 (23) Diosaxax, leonanakan lakap jist'antiriw angelap khithani, ukhamat nayar jan kuns kamachapxañapataki, Diosax nayan jan juchanïtax yatiwa, ukhamaraki juma rey tuqis jan kuna juch lurataxsa yatirakiwa —sasa.

23 23 (24) Reyisti uk ist'asax walpun kusisïna, ukatsti Danielar leonanakan putupat apsuyxänwa. Apsxapxäna ukkhasti, janiw jupan janchipan kuna usuchjatsa jikxatapkänti, Danielan taqpach chuymapampi Diosapar katuyasitap layku.

24 24 (25) Uka qhipatsti, kawkïr jaqinakatix Daniel tuqi jan wali amtapkatayna ukanakaruw reyix irptayanïna, uka jaqinakasti warminakapamppacha, wawanakapamppachaw leonanakan putupar jaquntat uñjasipxäna; janïraw sumsa putu manqhar puripkänti ukkhaw leonanakax jupanakar manq'antäna.

25 25 (26) Ukapachaw Darío reyix mä qillqat uraqpachan utjir taqi markanakaru, ukhamaraki kunayman arut parlir jaqinakar apayäna, akham sasa: “Jumanak taypin jilarkir sumankañ utjpan.

26 26 (27) Nayaw arsta: taqpach markanakaxan Danielan Diosapax yupaychatäpan, yäqatarakïpan.

“Jupaw wiñayatak jakkiri Diosaxa.

Jupan markapax janipuniw t'unjatäkaniti,

ch'amapas janirakiw tukuskaniti.

27 27 (28) Jupaw qhispiyirixa, arxatirisa;

alaxpachansa, akapachansa,

luratanakapax muspharkañawa.

Leonanakan lakapatsa,

jupaw Daniel arkiriparux qhispiyaraki” sasa.

28 28 (29) Danielasti Darío reyin taqi markanak apnaqañapkamaxa, mä jach'a jilïri jaqit uñt'atakïskänwa, ukhamaraki Ciro reyix Persia marka apnaqkän ukapachasa.